Mungesa e një zgjidhjeje për dalje nga kriza e formimit të institucioneve, mund ta çojë Kosovën përfundimisht kah alternativa e fundit, që nënkupton thirrjen e zgjedhjeve të reja të parakohshme.

Presidentja e Republikës së Kosovës, Atifete Jahjaga, ua ka bërë me dije liderëve të partive politike parlamentare se kriza institucionale dhe politike po e cenon edhe partneritetin ndërkombëtar.

Në një prononcim për Radion Evropa e Lirë, zëdhënësi i Presidentes, Arbër Vllahiu, ka thënë se “presidentja ka shfaqur shqetësimin e thellë, që për shkak të paaftësisë për ndërtimin e institucioneve të qëndrueshme në vend, po lëkundet partneriteti me bashkësinë ndërkombëtare, në veçanti me partnerët strategjikë”.

Këto lëkundje posaçërisht kanë të bëjnë me fushën e sigurisë, ku Kosova ka treguar shembull në ruajtjen jo vetëm të sigurisë së saj kombëtare, por edhe si një partner i fuqishëm në luftën globale kundër terrorizmit.

“Anashkalimi i Kosovës nga agjenda e partnerëve ndërkombëtarë, për shkak të bllokadës për të ndërtuar institucionet, është shqetësues dhe e vë Kosovën në një gjendje të rëndë që pengon fuqizimin e subjektivitetit ndërkombëtar të saj”, thuhet në qëndrimin e Presidentes të prezantuar nga zëdhënësi i saj.

Andaj, Vllahiu ka thënë se presidentja Jahjaga pret në ditët në vijim, “që liderët e partive politike parlamentare të reflektojnë mbi gjendjen e krijuar dhe të vijnë me propozime shumë konkrete për daljen nga situata e krijuar”.

Po në këtë vijë, ka reaguar të hënën edhe ambasadori britanik në Prishtinë,Ian Cliff. Gjatë një konference në Prishtinë, të mbajtur nga Grupi për Studime Juridike e Politike ku është folur për Raportin e fundit progresit, ambasadori Cliff ka kërkuar që Kosova të lëviz sa më shpejt drejt formimit të Kuvendit dhe Qeverisë.

“Po vërehet se ka rritje të frustrimit me politikanët në Kosovë që nuk janë në gjendje të zgjidhin një problem mjaft të vogël që ka të bëjë me formimin dhe funksionalizimin e institucioneve. Frustrime me ta ka edhe në Bruksel, në Londër dhe gjithandej”, ka thënë ambasadori britanik.

Duke e parë mungesën e një zgjidhjeje politike për krizën institucionale, presidentja Atifete Jahjaga u ka bërë me dije liderëve të partive politike se mungesa e zgjidhjes mund të çojë edhe në zgjedhje të reja.

Analisti politik, Ilir Ibrahimi, ka thënë për Radion Evropa e Lirë se roli i presidentes është që të garantojë funksionimin e institucioneve. Kështu që nëse ngërçi i krijuar nuk mund të tejkalohet, ai parasheh se presidentes Jahjaga, nuk po i mbetet opsion tjetër përveç zgjedhjeve të reja.

“Në qoftë se partitë politike me të vërtetë nuk e gjejnë një lloj kompromisi për të tejkaluar këtë ngërç, atëherë presidentes nuk i mbeten edhe shumë zgjidhje tjera, do të thotë, nëse zgjedhjet e parakohshme janë ajo zgjidhje që do të dërgojë në themelimin e institucioneve të Kosovës, atëherë ajo (presidentja) duhet ta shikojë edhe këtë si një opsion real”, ka thënë Ibrahimi.

Dështimi i partive politike që t’i formojnë institucionet e reja, për analistin Ilir Ibrahimi paraqet një lloj fatkeqësie, pasi që zgjedhjet e 8 qershorit ishin vlerësuar të standardeve evropiane. Mirëpo, rezultati që prodhuan këto zgjedhje dhe pozicionimi i partive politike në dy blloqe, sipas tij, më pas pamundësuan edhe formimin e institucioneve.

“Nëse të dy blloqet politike, si PDK-ja me partitë e koalicionit në njërën anë, ashtu edhe partitë e bllokut LDK – AAK – Nisma dhe Vetëvendosje, në anën tjetër, nuk arrijnë të bëjnë një kompromis me njëri-tjetrin, atëherë zgjedhjet mbeten opsioni i vetëm për të dalë nga kjo krizë. Të shohim edhe njëherë vullnetin e qytetarëve dhe të përcaktohet se kush do të dalë fitues dhe se si do të themelohen institucionet”, ka theksuar Ilir Ibrahimi.

Zgjedhja e kryetarit të Kuvendit mbetet pika neuralgjike, për të cilën partitë politike nuk po arrijnë një zgjidhje. PDK-ja si fituese e zgjedhjeve, në dy raste të seancave konstituive të ndërprera ka dëshmuar se nuk e ka shumicën për të marrë nën drejtim këtë post.

Përderisa blloku paszgjedhor LDK – AAK – Nisma dhe Vetëvendosje, ndonëse ka pretendime për të marrë postin e kryetarit të Kuvendit si pjesë të zbatimit të marrëveshjes së tyre të brendshme për koalicion, nuk ka hapësirë kushtetuese që të bëjë kandidaturën e vet në Kuvend.

Konstituimi i Kuvendit është i domosdoshëm për formimin e Qeverisë së re, andaj edhe kriza politike mbetet e pazgjidhur përderisa nuk tejkalohet kjo pikë./rel/

Ministria e Diasporës nuk ka publikuar të dhëna ose shifra lidhur me mërgimtarët që janë regjistruar deri më tani, nëpërmes procesit të regjistrimit të mërgatës, që ka nisur në dhjetor të vitit të kaluar.

Zyrtarë të kësaj Ministrie kanë thënë se e tëra çfarë mund të thonë është se procesi është duke shkuar me dinamikën e pritur.

Ndërkohë që për kredibilitetin e këtij procesi janë ngritur dyshime, nga persona që janë marrë me analizim të tij. Është vlerësuar si proces që ka filluar mbrapsht dhe se do të prodhojë të dhëna jo të sakta për numrin e mërgimtarëve.

Autori i kapitullit për Diasporën dhe mërgatën në raportit e UNDP-së, të publikuar rreth dy javë më parë, Shpend Kursani, ka thënë se procesi i regjistrimit është i koklavitur. Gjithashtu ai ka deklaruar se nuk mund të bëhet një regjistrim i mirëfilltë, pa u bërë një investim më serioz sesa është bërë deri më tani, nga Ministria e Diasporës.

Lideri i LDK-së, Isa Mustafa ka thënë se gjatë takimit që ka pasur me Presidenten, Atifete Jahjaga, ka kërkuar nga ajo që t’i drejtohet Gjykatës Kushtetuese për të kërkuar shpjegim, si të kompletohet vendimi lidhur me seancën konstituive, kur njëra palë ka votat e tjetra të drejtën e propozimit.

Ai ka vlerësuar se ky do të ishte një veprim pozitiv, i cili mund të hapë rrugë për daljen nga kriza.

“Nëse këtë nuk e bënë Presidentja, atëherë duhet ta bëjmë ne”, është shprehur Mustafa duke shtuar se PDK-ja dhe Kryesuesja e Kuvendit, Flora Brovina janë duke e keqpërdorë vendimin e Gjykatës Kushtetuese.

Mustafa ka thënë se vendi nuk është në bllokadë, pasi ka shumicën parlamentarë për formimin e institucioneve të reja. Ai ka deklaruar se PDK-ja ka qeverisur me vendin për më shumë se 10 vjet, dhe tash rendi është të shkohj në opozitë.

Lideri i LDK-së thotë se nuk sheh asnjë arsye për të shkuar në zgjedhje të reja, aq më pak për qeverisje teknike./Epoka e Re/

Sekretari i Aleancës për Ardhmërinë e Kosovës (AAK), Burim Ramadani, ka thënë për Telegrafin se zgjedhje të parakohshme nuk do të ketë, sepse sipas tij, ekziston shumica parlamentare dhe kjo shumicë e ka zgjidhjen e qartë të situatës.

Ramadani ka theksuar se pikërisht Partia Demokratike e Kosovës (PDK) është ajo që ka problem me zgjedhjet.

“Strukturat dhe anëtarët e PDK-së e kanë tejet të qartë se pas këtyre zgjedhjeve hipotetike, PDK-ja do të dilte me më pak se 20 deputetë, ndërsa shumica parlamentare do të kishte mbi 80 deputetë shqiptarë”.

“Përfundimisht, zgjedhjet si opsion janë një balon i PDK-së, porse më së shumti kundërshtar i zgjedhjeve është vetë PDK-ja. Balonat e tillë në opinion nuk duhet të merren seriozisht, sepse nuk meritojnë të humbet kohë”, ka thënë Ramadani.

Edhe sikur presidentja t’i shpallte zgjedhjet e jashtëzakonshme, ato do ta ketë të pamundur t’i organizojë KQZ-ja.

Ky institucion do të kishte probleme në marrjen e vendimeve, pasi anëtarëve tashmë iu ka humbur mandati.

Në rast të zgjedhjeve, presidentja do të duhej t’i rimandatonte anëtarët, përpos atij të AKR-së dhe të komuniteteve.

Një anëtar i KQZ-së në kushte anonimiteti i ka thënë KTV-së se KQZ-ja ka më shumë se një muaj që s’ka mbajtur mbledhje nga frika e marrjes së vendimeve, të cilat, sipas tij, do të mund të kontestoheshin.

Deklarimi i presidentes për shpallje të zgjedhjeve shihet vetëm si presion. Vetë presidentes i propozohet që të dalë me ide konkrete për tejkalimin e ngërçit politik.

Jahjaga mund të propozojë zgjedhje, por, gjithsesi për shpërbërje do të duhej të votonin me shumicë votash deputetët.

Presidentja Atifete Jahjaga mund t’i shpallë zgjedhjet e parakohshme vetëm në dy skenarë të mundshëm.

Skenari i parë është shpërbërja e Kuvendit me 2/3 e votave të deputetëve dhe e dyta në rast se propozimi për kryeministër dështon dy herë radhazi.

KTV-ja ka provuar të flasë me zyrtarë të KQZ-së dhe presidencës për çështjen e mandatit të anëtarëve të KQZ-së, por ka qenë e pamundur.

Presidentja Jahjaga ua ka bërë me dije të gjithë liderëve gjendjen në të cilën ndodhet vendi.

Jahjaga ka alarmuar rrezikun institucional dhe buxhetor, në rast se së shpejti nuk do të kemi institucione.

Sot në Fushë-Arrëz, janë përkujtuar viktimat e aksidentit të Fushë-Arrëzit, aksident i ndodhur 10 vite më parë, më 14 tetor 2004, ku humbën jetën 16 persona, prej tyre 15 ishin maturantë të gjimnazit të Malishevës. Në homazhin e mbajtur në vendin e aksidentit, morën pjesë familjarë të 15 maturantëve, i pari i Malishevës, Ragip Begaj, zyrtar tjerë komunal, zëvendës kryetari i Bashkisë së Fushë-Arrëzit, Gjokë Nikolli, maturantë të aksidentuar dhe rreth 300 maturant të gjimnazit të përgjithshëm të Fushë-Arrëzit.

Në homazhe morën pjesë edhe drejtor të drejtorive komunale, ish drejtori i gjimnazit, Januz Kastrati dhe profesor të gjimnazit “Hamdi Berisha”.

Ky aksident u cilësua si ngjarja më e rëndë që ka ndodhur, jo vetëm për arsimin në Kosovë, por edhe në Shqipëri në përgjithësi dhe aksidenti më i rëndë i trafikut, ku humbën jetën 16 persona.

“Në ato ditë e gjithë shqiptaria ishte me ne, ishte me familjet që kishin humbur më të dashurit e tyre, por sot, kjo ngjarje, të cilën ne e kujtojmë, le të shërbejë për zhvillimin e dy vendeve tona, kjo lidhje krijuar nga kjo fatkeqësi, le të shërbejë për zhvillimin e Malishevës dhe Fushë-Arrëzit”, tha kryetari i Komunës së Malishevës, Ragip Begaj.

Ndërsa zv/kryetari i Bashkisë së Fushë-Arrëzit, Gjokë Nikolli, shprehi “ngushëllimet e Bashkisë së Fushë-Arrëzit dhe kujtoi ngjarjen e rëndë, e cila nuk kishte tronditur vetëm Komunën e Malishevës, por të gjithë”. Nikolli, foli edhe në emër të kryetarit të Bashkisë, Alfred Qafa, i cili për shkak të obligimeve si kryetar i Bashkisë, nuk ishte sot prezent, por me zemër e me mendje, ishte me familjet që kishin pësuar në këtë aksident.

Pas fjalimeve të rastit, i pari i Malishevës, Ragip Begaj, zv/kryetari i Bashkisë s Fëushë-Arrëzit, Gjokë Nikolli, përfaqësues të familjeve të maturantëve, përfaqësues të maturantëve tjerë të mbijetuar të aksidentit dhe maturantë të gjimnazit të Fushë-Arrëzit, vendosën lule në lapidarin e ngritur në vendin e aksidentit./PrizrenPress.com/

Ish-shefi i GP të LDK-së në Prizren, Haziz Hodaj, ka komentuar padinë që bashkëpartiaku i tij, Ridavn Hoxha, ka bërë ndaj tij dhe ish-kryesuesit të KK të Prizrenit, Nijazi Kryeziu, dhe dy zyrtarëve ligjorë të KK të Prizrenit, Ibrahim Krasniqi dhe Visar Islamaj. Gjykimin që do të mbahet nesër, Hodaj e vlerëson “gjykim shumë interesant”.

“Shume gjykim interesant do te jete ky”! Unë si shef i Grupit të kuvendarëve të LDK-së pata propozuar riformatizimin e komisioneve të LDK-së në Kuvend, për shkak të funksionalizimit më të mirë të tyre. Kishte një kohë të gjatë që z.R.Hoxha nuk ju përgjigjej ftesave të grupit të kuvendarëve për KPP-ne dhe natyrisht nga një anëtar i kuvendit doli propozimi që ai të zëvendësohej me z.Xhavit Ukaj, sic u zëvendësuan edhe disa të tjerë”, tregon Hodaj në Facebook.

“Pasi u kryen të gjitha propozimet, unë kërkova që kjo listë e propozuar të aprovohet nga Kryesia e Degës. Kryesia nuk u mblodh një kohë të gjatë dhe këtë listë me propozime nga grupi i kuvendarëve z. Xhavit Ukaj (anëtar i KK -se dhe anëtar i Kryesisë së Degës së LDK-së) e ka dërguar në administratë të Kuvendit. Kjo në pika të shkurtra është “vepra penale e imja” dmth. propozimi per riformatizim të komisioneve!”.

“Ja me çka merren gjykatat tona! Problemet tjera i kanë zgjidhur! Për akuzuesin nuk dua të flas asgjë, përveç një pohimi të tij se e ka shtëpinë afër institucioneve të drejtësisë dhe sa herë të lëvizë aty pari e lenë nga një letër, ashtu pati pohuar njëherë. Do të bëhej e mirë një shfaqje komike kjo…”, shkruan Hodaj/PrizrenPress.com/

Në Gjykatën Themelore të Prizrenit sot mbahet seanca gjyqësore ndaj ish-kryesuesit të KK të Prizrenit, Nijazi Kryeziu, ish-shefit të grupit të këshilltarëve të LDK-së, Haziz Hodaj, dhe dy zyrtarëve ligjorë të KK të Prizrenit, Ibrahim Krasniqi dhe Visar Islamaj, të cilët në bazë të padisë subsidiare të ish-këshilltarit të LDK-së, Ridvan Hoxha, akuzohen për kryerjen e veprave penale shpërdorim të detyrës zyrtare, falsifikim të dokumenteve dhe legalizimin e përmbajtjes së pavërtetë. Seanca mbahet në ora 10:00.

Ish-këshilltari i LDK-së, Ridvan Hoxha ka konfirmuar mbajtjen e seancës gjyqësore.

“Po sot mbahet seanca e radhës”, konfirmoi Hoxha për “PrizrenPress” .

Ridvan Hoxha në seancën e parë fillestare ka paraqitur akuzat e tij ndaj katër personave të sipërpërmendur, me ç’rast ka kërkuar nga Gjykata që padia e tij në bazë të fakteve të dëshmohet dhe ata të shpallen fajtorë për kryerjen e veprave penale. /PrizrenPress.com/

Duket se jo i gjithë blloku është për zgjedhje të reja. Njëri nga partnerët e Bllokut LVAN, kryetari i Nismës për Kosovën, Fatmir Limaj është shprehur kategorik kundër zgjedhjeve të reja.
Burime brenda Blloku i kanë thënë Gazetës Blic se Limaj ka kërkuar nga treshja Mustafa- Haradinaj e Kurti që vendi të mos shkoj në zgjedhje të reja, por të gjindet zgjidhja, në mënyrë që të formohen institucionet.
Merret vesh se Limaj ka kërkuar që zgjidhja të bëhet bazuar në Kushtetutën e Kosovës dhe në aktgjykimin e Gjykatës Kushtetuese të Kosovës.

“Nuk ka nevojë që të shkohet në zgjedhje të reja kur ka një shumicë parlamentare. Nëse është nevoja Limaj ka thënë se partia e tij nuk do të merr asnjë post në qeveri, prandaj ka kërkuar që edhe tre liderët tjerë të reflektojnë në mënyrë që të formohen institucionet”, i ka thënë Gazetës Blic një burim brenda Bllokut.

Fatmir Limaj edhe në një intervistë që e ka dhënë për emisionin “Rubikon” të KTV-së ka thënë se nuk bënë që të shikohen interesat personale, kur është në pyetje qeveria Thaçi 3.

“Projekti ynë është që të mos ketë qeveri Thaçi 3 dhe për të arritur këtë synim s’duhet askush prej nesh të shikojë interesat personale”, ka thënë Limaj.

Ndërkaq, anëtari i Kryesisë së Nismës për Kosovën, Bilall Sherifi ka thënë për Gazetën Blic se nuk ka nevojë që të shkohet në zgjedhje kur ka zgjidhje.

“Qëndrimi i Nismës për Kosovën ka qenë dhe vazhdon të mbetet se përderisa ka zgjidhje, zgjedhjet përjashtohen”, tha ai.

Sherifi ka thënë se jo vetëm Nisma, por edhe tri partitë tjera janë unike se nuk ka nevojë që të ketë zgjedhje të reja.

“Tanimë jo vetëm që të gjithë e dimë, por edhe e kemi konfirmuar se shumica parlamentare është krijuar dhe si rrjedhojë zgjedhjet vijnë në shprehje. Në këtë pikë nuk kemi dallime me partenerët e koalicionit”, tha ai për Gazetën Blic.
Mirëpo, Albin Kurti pas takimit me Jahjagën, para disa ditësh tha se partia e tij është e gatshme nëse do të ketë zgjedhje të reja.

Ndërkohë, sot ka raportuar Gazeta Blic se Blloku LVAN është i gatshëm që të heq dorë nga posti i kryetarit të Kuvendit, mirëpo sipas burimeve brenda Bllokut ekziston rreziku që presidentja Jahjaga do të marrë si precedent rastin e kryetarit të Kuvendit dhe nuk do të nominoj mandatarin e dytë, në rast se Hashim Thaçi, si i nominuari i PDK-së, nuk arrin që t’i marrë votat e mjaftueshmë në Kuvend, për ta themeluar qeverinë.

Sipas burimeve të Gazetës Blic, nëse Blloku LVAN do të merret vesh që PDK-së t’ia votoj kandidatin e saj për kryeministër, atëherë mund të të vij edhe deri te rishikimi i marrëveshjes ndërmjet LVAN-it.
Sipas këtij burimi janë disa ide që po diskutohen. Mirëpo, një nga idetë ndoshta më të realizueshme, do të ishte që posti i kryeministrit të ndahet në dy periudha kohore, pra dy vjet qeverinë ta udhëheq Isa Mustafa, në mënyrë që ky pastaj të kaloj në pozitën e presidentit, dhe dy të tjera qeverinë ta drejtoj Ramush Haradinaj.

Edhe deputeti i LDK-së, Arben Gashi kishte kërkuar që të rishikohet marrëveshja ndërmjet LVAN-it. Sipas tij, posti i kryeministrit duhet t’i takoj LDK-së, e cila është partia më e madhe, e jo AAK-së. Idenë e tij e ka përkrahur edhe nënkryetari i LDK-së, Lutfi Haziri.

Në anën tjetër, PDK sic merr vesh gazeta Blic me ngulm është duke kërkuar që të mbahen zgjedhjet e jashtëzakonshme, për faktin se nuk po gjen partner për bashkëqeverisje, dhe se nuk është e gatshme që të dalë në opozitë. / Gazeta Blic