Gjykata e Apelit nuk e ka përfillur aktgjykimin e Gjykatës Kushtetuese kur kishte vendosur që ta lironte Ukë Rugovën nga paraburgimi.

Është bazuar në imunitetin e deputetit si bazë ligjore që masën e paraburgimit t’ia shndërronte në masë të paraqitjes në polici dy herë në javë, shkruan Koha Ditore.

E prokurori që kishte urdhëruar të premten arrestimin e Rugovës me të dalë nga qendra e paraburgimit i është referuar shpërbërjes së Kuvendit të Kosovës më 7 maj. Prej ditës që shumica e deputetëve vendosën ta shpërbëjnë Kuvendin për t’u hapur rrugë zgjedhjeve të reja, Ukë Rugova nuk është më deputet.

Mirëpo, Gjykata e Apelit si dhe Prokuroria kanë anashkaluar aktgjykimin e Gjykatës Kushtetuese të Kosovës të 20 shtatorit 2012 lidhur me imunitetin. Kushtetuesja kishte dhënë interpretimin se deputetët mund të ndalohen dhe arrestohen, madje edhe gjatë kohës sa janë duke kryer detyrat në Kuvend.

Veprimtari i shquar i çështjeve kombëtare, Adem Demaçi, e ka quajtur veprim të keq formimin e bllokut opozitar.

“Ky është një veprim fort i keq për të gjithë shqiptarët e Kosovës dhe për marrëdhëniet tona me faktorin ndërkombëtarë, si edhe për vet krijuesit e bllokut pas zgjedhjeve të jashtëzakonshme të 8 qershorit”, ka thënë Demaçi, shkruan Epoka e Re.

Ai ka treguat se e drejta për ta formuar qeverinë i takon partisë apo koalicionit që ka fituar më 8 qershor me më shumë vota. Mirëpo, nëse kjo nuk ndodh, atëherë sipas Demaçit, besimi për ta krijuar qeverinë do t’i jepet partisë ose koalicionit pasues që ka fituar vota më pak se partia ose koalicioni paraprak.

Në qershorin e secilit vit tema më e nxehtë politike ka qenë rishikimi i buxhetit vjetor. Sivjet kjo çështje nuk është në rend dite.

Situata politike e krijuar para zgjedhjeve të 8 qershorit ka bërë që vendimmarrja të pushohet në Legjislativ, por edhe të reduktohet në Ekzekutiv.

Në mungesë të Kuvendit, Qeveria nuk ka sponsorizuar fare ndryshimet buxhetore. Dhe ndryshime mund të mos ketë fare sivjet, në rast se vendi shkon në zgjedhje të reja.

Në javën e parë të majit Kuvendi është shpërndarë, duke e çuar vendin në zgjedhje të parakohshme. Për pasojë, më asnjë ligj nuk është aprovuar. Madje është stopuar edhe procesi i hartimit të ligjeve nga Qeveria…

Në emisionin “Puls” të KTV-së, është debatuar për raportin e NATO-s të botuar në Koha Ditore për shërbimet sekrete partiake.

Vehbi Kajtazi tregon se ky raport tregon punët e këtyre shërbimeve.

“Këtu kemi Shërbimin Sekret të PDK-së, SHIK-un, shërbimin e LDK-së, AIK-un”, ka thënë Kajtazi, transmeton Koha.net.

“Sipas këtij raporti të NATO-s, ky shërbim ka qenë ilegal edhe pse ka qenë publik. Këto organizata kanë qenë ilegale. Të gjithë e kanë ditur që kanë funksionuar”, ka thënë më tej gazetari Kajtazi, duke theksuar se ky raport është përpiluar është nga qindra dokumente që janë mbledhur gjatë kohës.

Kajtazi ka ripërsëritur faktin se raportet e NATO-s, të publikuara në “Koha Ditore”, kanë specifikuar se “SHIK-u ka pasur financim kriminal”.

Ndërkaq, analisti Fadil Lepaja, ka thënë se shërbimet sekrete nëpër raporte përmendin shumë emra dhe ka raporte të ndryshme.

“Raport mund të bëjë një njësit i KFOR-it dhe një strukturë e KFOR-it. Nuk ishte shumë e specifikuar natyra e raportit. Është një dokument ku ka të dhëna me të cilat prokuroria duhet të merret në Kosovë. Ky është vetëm një raport. Tash nuk e di sa është serioz raporti i KFOR-it”, ka thënë Lepaja.

Ndaj kësaj deklarate, Vehbi Kajtazi është kundërpërgjigjur, duke thënë se ky raport tregon se ne i kemi mbledhë raportet, “dhe sa për informatën tuaj, kemi punuar gjatë”.

“Këta emra janë nga të gjitha partitë politike jo veç të një partie, sepse ka persona nga PDK, LDK, AAK, AKR e VV”, thotë Kajtazi.

“Dokumenti i sigurimit të atdheut ka qenë dokument i prodhuar nga SHIK-u, sipas raportit të KFOR-it, ndërsa ky raport që e kemi botuar është raport i NATO-s”, ka thënë më tej Kajtazi.

Sipas Kajtazit, shumica e këtyre dokumenteve janë britanike dhe thotë se shumica e këtyre dokumenteve e ka besueshmërinë të kategorisë A.

Ndërkaq, Fatmir Humolli nga LKÇK, ka thënë se SHIK-un e kanë përgatitur strukturat e NATO-s, por thotë se raporti nuk i përmend këto.

Anëtarët e Institutit për Hulumtimin e Krimeve të Luftës në Kosovë deklarojnë se janë duke punuar në disa projekte që kanë të bëjnë me krimet e luftës. Identifikimi i lokacioneve në nivel vendi ku janë kryer dhunime seksuale gjatë luftës, vende dhe dëshmitë e masakrave dhe çështja e të zhdukurve, janë disa nga projektet në të cilat është duke punuar instituti.

Anëtari i institutit, Pajazit Nushi, i cili është bartës i projektit për të dhunuarit seksualisht gjatë luftës dhe të zhdukurit, konsideron se instituti është duke kryer punët në bazë të projekteve dhe obligimeve që ka.

Për me tepër, Nushi thekson se një ndër punët më të rëndësishme që është bërë deri më tash është identifikimi i disa lokacioneve ku ka ndodhur dhuna seksuale.

“Ne deri më tash, kemi identifikuar 69 lokacione në qytete edhe fshatra të Kosovës ku janë kryer dhunimet seksuale dhe njëkohësisht jemi në vërtetim të 8 lokacioneve të dyshimta deri tash. Besoj se për një kohë të shkurtër mund të gjejmë dëshmitarë edhe për këto lokacione të tjera”, tha për Radion Evropa e Lirë, zoti Nushi.

Ai tha po ashtu se instituti është duke punuar në projektin që ka të bëjë me kualitetin e jetës ekonomike etike e sociale të femrave të dhunuara dhe familjes se tyre.

Kurse, sa i takon projektit tjetër për të zhdukurit, akademik Pajazit Nushi mendon se edhe ne ketë çështje është punuar konsiderueshme.

“Kanë ngelur ende prej 1712 veta që kërkohen e që me vështirësi mund të gjinden, por besojmë se ky numër do të zvogëlohet relativisht shumë me hapjen e varrezës masive afër Rashkës”, tha Nushi.

Anëtarët tjerë të institutit konsiderojnë se vonesa në kryerjen e shumë punëve të tyre është duke i pamundësuar mosmiratimi i Ligjit për Institutin e Krimeve të Luftës.

Thuhet se instituti deri më tash nuk ka përfunduar ende publikimet rreth masakrave në Kosovës, publikime këto që së pari duhet t’i ofrohen Ministrisë së Drejtësisë.

Anëtarët e instituti kanë thënë që nga themelimi i Institutit kanë dalë në terren për të gjetur informacione lidhur me projektet e tyre.

Ata janë takuar me autoritete komunale në nivel vendi dhe persona kompetentë të cilët kanë pasur mundësi të japin të dhëna apo dëshmi lidhur me masakrat e luftës, aktet gjenocidale apo edhe të tjera.

Nga ana tjetër, Feride Rushiti nga Qendra Kosovare për Rehabilitimin e të Mbijetuarve të Torturës, punën e deritanishme të institutit nuk e sheh në nivelin e kënaqshme duke marr parasysh kohën sic thotë ajo, kur është themeluar ky institut.

“Natyrisht ky institucion kur është themeluar, ambiciet kanë qenë shumë të larta për faktin se është menduar se do të merret me dokumentimin e të gjitha krimeve të luftës, përfshirë këtu edhe viktimat e dhunës seksuale gjate luftës.Megjithatë, për faktin që ky institucion përbëhet nga gjinia mashkullore, ka qenë e ndjeshme natyra e dokumentimit të grave të dhunuara gjatë luftës. Prapë se prapë rezultati i deritanishëm (i punës së institutit) nuk është në nivel të kënaqshme për periudhën ku jemi tani”, tha Rushiti.

Instituti për Hulumtimin e Krimeve të Luftës në Kosovë është institucioni publik hulumtues me qëllim të mbledhjes, sistematizimit, përpunimit dhe publikimit të dhënave për krime kundër paqes, krime të luftës, krime kundër njerëzimit dhe akteve të gjenocidit të kryera në Kosovë gjatë vitit 1998, deri në qershor të vitit 1999.

Udhëheqësit e këtij Instituti kanë deklaruar se Kosova mbetet një dosje e madhe e krimit të pandëshkuar.

Kryeministri i Republikës së Kosovës, Hashim Thaçi, priti sot një delegacion të Bordit të Drejtorëve të “Institutit Kombëtar për Demokraci” të Shteteve të Bashkuara të Amerikës i kryesuar nga Howard Dean, anëtar i Bordit, në ndërtesën e Kryeministrisë në Prishtinë.

Kryeministri Thaçi shprehu falënderimet e tij për mbështetjen që “Instituti Kombëtar për Demokraci” ka dhënë për partitë politike dhe për spektrin politik në Kosovë në përgjithësi për tërë këto vite. Kryeministri Thaçi u shpreh krenar me raportet që ka Republika e Kosovës me Shtetet e Bashkuara të Amerikës dhe shtoi se Kosova mundohet vazhdimisht të dëshmojë përkrahjen e vet për partnerin e vet, Shtetet e Bashkuara.

“Suksesi i fundit i Kosovës janë zgjedhjet e mbajtura në qershor e që ishin më të mirat që nga përfundimi i luftës dhe tani Kosova po angazhohet që të tregojë se funksionon në respektim të plotë të ligjeve të saj” theksoi Kryeministri Thaçi.

Anëtari i Bordit të “Institutit Kombëtar për Demokraci”, Howard Dean, u shpreh i kënaqur me të arriturat e demokracisë në Kosovë, duke theksuar veçanërisht të arriturat në fuqizimin e gruas në politikë, që është bërë shembull për rajonin dhe më gjerë. Dean gjithashtu tha se instituti që ai përfaqëson do të mbetet partner i partive politike në Kosovë. Ai gjithashtu lavdëroi mbarëvajtjen e zgjedhjeve të fundit në Kosovë.

Kryeministri i Republikës së Kosovës, Hashim Thaçi, duke falënderuar për mbështetjen e vazhdueshme për fuqizimin e demokracisë në Kosovë dhe përfundoi se shteti i ri po dëshmon që di të përballet me testet e demokracisë dhe këtë do ta dëshmojë edhe në procesin pas-zgjedhor.

Kryetari i Kryesisë së NISMA për Kosovën Fatmir Limaj, priti në takim një delegacion të Ambasadës së Belgjikës në Kosovë, të kryesuar nga ambasadorja, Anick Van Calster.

Në këtë takim u diskutua për situatën politike në Kosovë, zhvillimet pas zgjedhjeve të 8 qershorit, dhe për planet e ardhshme të NISMËS për Kosovën.

Limaj e ka njoftuar ambasadoren Van Calster për ecurinë e procesit pas zgjedhjeve si dhe për rolin e NISMA për Kosovën në zhvillimet politike të vendit, poashtu edhe për marrëveshjën e arritur mes partive opozitare për qeverisjen e ardhshme të vendit.

“NISMA për Kosovën do të ketë rol kyç në skenën politike të Kosovës, tani dhe në të ardhmën” u tha Limaj delegacionit të ambasadës belge në Kosovë.

Limaj foli edhe për vazhdimin e dialogut me Serbinë. /PrizrenPress.com/