Një bord prej nëntë pjesëtareve femra, nga legjislativi dhe ekzekutivi kishin paralajmëruar të fillojnë me 16 qershor nismën për organizimin e një peticioni me të cilin kërkohet nga OKB, “Drejtësi Ndërkombëtare për Gratë e Dhunuara gjatë Luftës në Kosovë”. Por, ky peticion duket se ka gjasë të dështojë.

Në kohën kur ishte miratuar një ligj që përkrah financiarisht viktimat e dhunës seksuale të luftës në Kosovë, presidentja kishte inicuar një Këshill për rehabilitimin tyre. Pas këtyre një grup prej nëntë grash nga ekzekutivi, legjislativi dhe shoqëria civile po synonte drejtësinë ndërkombëtare për to, përmes një peticioni për një tribunal.

Por, kjo e fundit nuk duket se është në rrugë të mirë për të shkuar përpara. Disa nga anëtaret e këtij grupi i kanë thënë Radio Kosovës se nisma nuk është mirëpritur nga përfaqësues diplomatik në Kosovë.

Inicuesja e organizimit të peticionit “Kërkojmë Drejtësi Ndërkombëtare për Gratë e Dhunuara gjatë Luftës në Kosovë”, Edita Tahiri tani nuk po e sheh të nevojshme të flas për ngecjen e kësaj nisme. Ajo kishte thënë se peticion po bëhet për shkak se nuk pati drejtësia për krimet gjenocidale serbe ndaj Kosovës.

Një anëtare e këtij bordi, Suzan Novoberdaliu që në legjislaturën e shkuar ishte kryesuese e Komisionit për Barazi Gjinore ka thënë se”nuk ka informacion tjetër se çfarë po ndodhë me peticionin”.

Anëtarja tjetër Teuta Sahatçiu ka thënë se zëvendëskryeministrja, Edita Tahiri duhet të flas se ku ka ngecur procesi. Sipas Sahatçiut Tahiri u ka thënë ekipit se ajo do t’i koordinoj veprimet me presidenten dhe segmentet e tjera dhe ka përmendur datën 16 qershor. “Ne zonja Edita Tahiri na ka thënë që ajo ka ideuar dhe do të bisedoj me presidenten për të bashkërenduar veprimet dhe se pas datës 16 qershor dot niset procesi. Tani nuk e dimë çfarë po ndodhë”, ka thënë Sahatçiu.

Në zyrën e Presidentes së Kosovës nuk janë përgjigjur rreth peticionit dhe koordinimeve të mundshme.

“Për peticionin pyeteni organizatoren e saj! Presidentja Jahjaga ka krijuar Këshillin për të Mbijetuarit e Dhunës Seksuale gjatë luftës në Kosovë, që është një përpjekje e përbashkët e institucioneve për të ndihmuar viktimat. Presidentja gjithashtu ka nënshkruar Deklaratën e Përbashkët të Veprimit, për parandalimin e dhunës seksuale në konflikte, nën organizimin e sekretarit të jashtëm britanik William Hague”, i ka thënë Radio Kosovës këshilltari i presidentes Arbër Vllahiu.

Ky peticion kishte për qëllim që sekretari gjeneral i OKB-së të bëjë një raport për çështjen e viktimave të dhunës seksuale në Kosovë, siç kishte ndodhur me disa vende të tjera. Por raportet e ngjashme nuk kishin rekomanduar ndonjë tribunal të natyrës se çfarë kërkonin 9 inicueset kosovare, 15 vjet pas luftës në Kosovë.

I gjithë spektri politik është duke pritur nën “ethe” interpretimin që Gjykata Kushtetuese mund ta japë për çështjen e mandatarit për krijimin e Qeverisë së re, pas pyetjeve që presidentja ia ka drejtuar këtij mekanizimi.

Derisa dy blloqet si PDK por edhe tri partitë opozitare insistojnë se mund të krijojnë Qeverinë e re, Kushtetuesja ka filluar punën në përgatitjen e interpretimit në 16 pyetjet e presidentes që i kishte dërguar javën e kaluar.
Burime të gazetës Tribuna kanë bërë të ditur se anëtarët e gjykatës janë në fazën e mbledhjes të sa më shumë fakteve në bazë të të cilave do të bëhet edhe interpretimi i cili duhet të jetë i zbatueshëm nga të gjitha palët, pasi i njëjti nuk mund as të kontestohet.

Të njëjtat burime kanë bërë të ditur po ashtu se Kushtetuesja si pjesë të mbledhjes së fakteve po e shqyrton mundësinë që të kërkojë mendime dhe vlerësime nga ish-anëtarët e komisionit përbërës që kanë punuar në hartimin e Kushtetutës.

“Gjykata Kushtetuese aktualisht në bazë të procedurave të rregullta, është duke mbledhur sa më shumë fakte, në mënyrë që ta hartojë interpretimin e kërkuar nga presidentja Atifete Jahjaga. Këto janë procedura të zakonshme që bëhen nga anëtarët e gjykatës të cilët më pas e kanë më lehtë të vendosin kur kanë më shumë fakte”, ka thënë burimi./Tribuna/

Rezultatet e zgjedhjeve të 8 qershorit do të publikohen të enjten pasdite. Kështu ka deklaruar shefja e KQZ-së, Valdete Daka.

Ajo nuk ka bërë me dije për orën e saktë, mirëpo sipas saj rezultatet do të bëhen gati paradite, ndërsa pa precizuar orën, ato sipas Dakës do të publikohen të plota pasditen e së enjtes.

Kur në mes të korrikut të qëndrojë në Prishtinë, Clint Williamson, kryeprokurorit amerikan që po i kryen hetimet për raportin e Dick Martyt, do t`i bëhet një kërkesë specifike. Atij do t`i kërkohet raport i detajuar mbi raportin e Martyt.

Raport i detajuar mbi hetimet po shihet si rruga e vetme që do t’i zbardhte të gjitha dyshimet e ngritura në raportin e ish-senatorit zviceran, raport që ka akuza të rënda dhe që dyshohet se e ka rrënuar imazhin e Kosovës, të shqiptarëve dhe të luftës së UÇK-së.
Në kërkesën për raport mbi raportin e Martyt, institucionet e Kosovës nuk janë vetëm.

Edhe shtetet mbështetëse të SIFT-it dhe mbështetëset e pavarësisë së Kosovës duan që Williamson të tregojë detajet e hetimeve, në mënyrë që pos akuzave që do të ngrihen dhe do të përballen me Gjykatën Speciale, dyshimet e tjera të mëdha si trafikimi i organeve, ai i armëve, i drogës dhe të tjera të sqarohet nëse kanë qenë të bazuara apo jo./Tribuna/.

Astrit Haraqija, ka folur për zhvillimin e LDK’së, humbjen e zgjedhjeve nga kjo parti dhe për angazhimin e tij më aktiv në LDK.
Ai ka thënë së lista “Ibrahim Rugova”, nuk ekziston më.

Haraqija ka treguar se do t’i hyjë garës për t’u bërë pjesë e udhëheqjes së LDK’së në zgjedhjet e brendshme që do të mbahen në shtator.

Nuk e përjashton mundësinë që pas katër vjetësh të jetë lideri i LDK’së.

Haraqija në një intervistë për Epokën e Re ka thënë se Isa Mustafa deri hedhjet e partisë është vetëm kryetar në detyrë i LDK’së, ashtu siç është Hashim Thaci kryeministër.

Erzen Vraniqi nga Sekretariati për Media dhe Komunikim i Vetëvendosjes, ja bërë me dije se ende nuk kanë marrë një përgjigje nga blloku opozitar LDK, PDK e Nisma për kriteret që kjo lëvizje ua ka bërë atyre për t’i përkrahur për formimin e qeverisë së re.

Ai ka thënë për Epokën e Re se me këto kritere ndalohet rrëshqitja e Kosovës drejt humnerës.

Sipas tij, kriteret e VV’së janë shpëtim për Kosovën.

Maskat grabitëse janë riaktivizuar, në fillimin e sezonit turistik, pikërisht në rrugën nga ku qarkullojnë më shumë vizitorët për në Shqipëri.

Në aksin rrugor Milot-Kukës-Morin janë regjistruar dy grabitje me maska brenda 48 orësh, ku viktimë kësaj radhe kanë qenë një autogrill në afërsi të Repsit dhe një drejtues automjeti nga Tirana në Fushë-Milot.

Bilanci i këtyre grabitjeve ka qenë xhiroja ditore e pikës së shpërndarjes së karburantit në autogrill dhe një automjet “Mercedes” dhe 10 mijë lekë i qytetarit nga Tirana.

Policia e cila ka shkuar në vendin e ngjarjes nuk ka mundur të arrestojë apo të identifikojë autorët e grabitjes me maska në pikën e karburantit në Reps, por ka shoqëruar në policinë e Lezhës një të dyshuar si autor të grabitjes së “Mercedesit”.

I dyshuari është punonjës i policisë së burgjeve në burgun e Shënkollit në Lezhë.

Në Qendrën e Numërimit dhe të Rezultateve (QNR) ka përfunduar rinumërimi i 439 vendvotimeve, proces që shënon edhe fundin e numërimit të fletëvotimeve të zgjedhjeve të parakohshme parlamentare të 8 qershorit.

Koordinatori i Qendrës së Numërimit dhe të Rezultateve (QNR), Burim Ahmetaj, ka bërë me dije se në orët e mbrëmjes të së mërkurës ka përfunduar procesi i rinumërimit të 439 vendvotimeve dhe raporti final me rezultatet përfundimtare do t’i dërgohet KQZ-së.

“Tashmë ka përfunduar procesi i rinumërimit të 439 vendvotimeve dhe raportin final të rezultateve do t’ia dërgojmë Komisionit Qendror të Zgjedhjeve. Pra, të enjten KQZ-ja do ta ketë raportin me të gjitha rezultatet sa iu përket zgjedhjeve të parakohshme të 8 qershorit”, ka thënë Ahmetaj për “Epokën e re”.

Ai ka vlerësuar se i tërë procesi i numërimit dhe rinumërimit në Qendrën e Numërimit të Rezultateve (QNR) ka ecur sipas dinamikës së paraparë dhe është zhvilluar në mënyrë shumë transparente. Po ashtu, ai ka thënë se nuk ka pasur asnjë shans për manipulime eventuale në QNR.

“Në përgjithësi i gjithë procesi i numërimit dhe rinumërimit ka shkuar shumë mirë. Është me rëndësi se të gjitha parregullsitë janë korrigjuar me procesin e rinumërimit. Prandaj, nuk ka pasur asnjë mundësi për keqpërdorime sepse ka pasur menaxhim dhe mbikëqyrje të rreptë nga Qendra e Numërimit dhe Rezultateve. Po ashtu, çdo aktivitet dhe proces është vëzhguar nga vëzhguesit vendorë e ndërkombëtarë, kështu që nuk ka pasur asnjë mundësi që dikush ta keqpërdorë. Përkundrazi, nëse ka pasur ndonjë s’përputhje, QNR-ja ka korrigjuar aty për aty, duke mos lejuar as më të voglën parregullsi”, ka deklaruar Ahmetaj.

Partia Demokratike e Kosovës do të respektojë vendimin e Gjykatës Kushtetuese se kë duhet të mandatojë për kryeministër Presidentja edhe nëse nuk është në favor të PDK-së.
Nënkryetari i Partisë Demokratike të Kosovës, Hajredin Kuçi ka thënë se partia e tij do të respektojë vendimin e Gjykatës Kushtetuese edhe nëse ai nuk është në favor të saj.

Këto deklarata Kuçi i ka bërë në Rrokum TV, teksa ka komentuar çështjen e dërgimit të një sërë pyetjesh në Kushtetuese nga presidentja e vendit, Atifete Jahjaga, e cila pret të marrë përgjigje se kë duhet ta mandatojë për formimin e qeverisë së ardhshme të Kosovës.