Zëvendëskryeministri dhe njëherësh njëri prej themeluesve të “Lista Ibrahim Rugova”, Bujar Bukoshi ka demantuar ministrin Dardan Gashi se kjo listë si e tëra do t’i bashkohet Aleancës Kosova e Re (AKR)

Bukoshi ka konfirmuar se ai nuk do të jetë pjesë e listës zgjedhore të AKR-së, raporton ORAinfo.

“Jo unë nuk do të jem pjesë e AKR-së”, ka thënë shkurt Bukoshi duke mos dashur të flas më shumë nëse do të garoj në këto zgjedhje me ndonjë subjekt tjetër politikë.

Ndryshe, një ditë më herët Dardan Gashi kishte thënë se “Lista Rugova” si e tëra do t’i bashkohet AKR-së.

Subjektet politike serbe, veçanërisht ato që veprojnë në veri të Kosovës, ende nuk kanë marrë vendim zyrtar për pjesëmarrje në zgjedhjet e parakohshme parlamentare, të cilat pritet të mbahen më 8 qershor. Por, përfaqësuesit e këtyre subjekteve politike thonë se ekziston gatishmëria për të marrë pjesë në to.
Lidhur me këtë pjesëmarrje, Iniciativa qytetare serbe e njohur si “Lista serbe”, e cila në zgjedhjet e fundit lokale ka fituar në pjesën më të madhe të komunave me shumicë serbe, është duke pritur të konsultohet me autoritetet e Beogradit. Këtë e konfirmon për Radion Evropa e Lirë edhe Goran Rakic, kryetar i Mitrovicës veriore, i cili vjen nga radhët e Listës serbe.

“Megjithatë, duke pasur parasysh që kemi marrë pjesë në zgjedhjet lokale, mendoj se serbët duhet të marrin pjesë në zgjedhje. Natyrisht, duke iu dhënë garanci për vendet e garantuara si dhe që t’ju mundësohet të votojnë me letërnjoftimet apo dokumentet personale, të cilat aktualisht i posedojnë dhe jo të kushtëzohen me atë që dokumentet personale të jenë vetëm të Kosovës”, thekson Rakic.

Subjekti tjetër politik në veri të Kosovës, Iniciativa qytetare “Serbia, demokracia, drejtësia” e Oliver Ivanovicit, paralajmëron pjesëmarrjen në zgjedhjet e parakohshme parlamentare në Kosovë, edhe pse për një gjë të tillë nuk është marrë vendimi zyrtar i këtij subjekti.

Përfaqësuesja e këtij subjekti, Ksenija Bozovic, që aktualisht është kryetare e Kuvendit komunal të Mitrovicës së veriut, thotë se lidhur me pjesëmarrjen në zgjedhje janë të gatshëm të bisedojnë jo vetëm me Beogradin, por me të gjithë ata që e konsiderojnë si opsion serioz politik subjektin të cilit ajo i takon.

“Iniciativa qytetare SDP e Oliver Ivanovicit do të marrë pjesë në zgjedhje parlamentare. Ne e kemi caktuar për ditën e hënë mbledhjen, ku ne përfundimisht do të marrim vendimin për veprimet e mëtutjeshme”, thekson ajo.

Por, a do të jenë në gjendje subjektet politike serbe në veri të Kosovës që t’i mobilizojnë qytetarët për një dalje sa më të lartë në votimet e 8 qershorit?

Rakic vlerëson se një gjë e tillë do të jetë mision i vështirë për partitë politike serbe, duke pasur parasysh incidentet që kanë ndodhur para dhe gjatë zgjedhjeve lokale. Megjithatë, shpreson se njerëzit do ta kuptojnë rëndësinë e zgjedhjeve parlamentare.

“Unë mendoj se do të jetë vështirë. Por, me mbështetjen e Beogradit njerëzit do ta kuptojnë seriozitetin dhe do të bëjnë atë”, shprehet Rakic.

Vështirësi lidhur me përgatitjen e elektoratit në veriun e Kosovës, për të dalë në zgjedhje, paralajmëron edhe Bozovic.

“Do të na duhet më shumë kohë që të bisedojmë me njerëzit, që t’i gjallërojmë në mënyrë që ata të dalin në numër sa më të madh në zgjedhje”, thekson Bozovic.

Lidhur me deklarimet që zyrtarët e Komisionit Qendror të Zgjedhjeve kanë dhënë se Organizata për Siguri dhe Bashkëpunim Evropian mund të ketë rol në mbështetjen logjistike për organizimin e zgjedhjeve parlamentare edhe në veri të Kosovës, Rakic shprehet skeptik. Sipas tij, në zgjedhjet e kaluara lokale OSBE-ja ka treguar se nuk mund të japë ndihmë domethënëse. Ndryshe, Bozovic, vlerëson se ndihma e OSBE-së për zgjedhjet e 8 qershorit do të jetë më se e nevojshme. /REL/

Para pak minutash në autostradën “Ibrahim Rugova” ka ndodhur një aksident. Siq merr vesh Express aksidenti duket të jetë i rëndë.

Në vendin e ngjarjes tash kanë shkuar veturat e auto-ambulancës.

Aksidenti ka ndodhur pak kilometra pas kalimit të zënës së Malishevës

Seremb Gjergji, bashkë me djalin Drinin e vajzën Djellën, kërkuan para Zyrës së Bashkimit Evropian në Prishtinë, liberalizimin e vizave për qytetarët e Kosovës, para mbajtjes së zgjedhjeve të BE-së, në Ditën e Evropës. Gjergji thotë se në veçanti të rinjtë e Kosovës nuk duhet të izolohen për arsye të shumta, duke vlerësuar se po vazhdohet të i bëhet një padrejtësi, dhe se sot në Kosovë sipas tij nuk duhet të festohet, por të protestohet.

“Kam dalë në kuadër të fushatës teme për president të Kosovës, si kandidat i pavarur për president, edhe mendoj që Bashkimi Evropian duke mos i liberalizu vizat n’Kosovë, po krijon izolimin e gjeneratës t’re t’Kosovës, që në Kosovë është 73 për qind e popullsisë. Edhe në kuadër të kësaj unë mendoj që është e padrejtë, populli i Kosovës nuk e meriton një gjë të tillë, e veçmas nuk e meriton rinia e Kosovës… Çka kanë ma shumë fëmija e Bosnjës, Serbisë, Shqipërisë, Maqedonisë, Malit të Zi, Moldavisë se sa fëmija Kosovës”, shpr ehet Gjergji.

Drini mbante në duar një pankartë në të cilën shkruhej “ Mos më izoloni në shtëpinë time”, dhe thotë se ka vizituar disa vende të Evropës e më gjerë dhe kërkon që liberalizimi të bëhet sa më parë.

“Unë jetoj në Kosovë, por kam qef të shëtitëm në të gjithë Evropën. Unë kam qenë në shumë vende të Evropës, kam qenë në Kroaci, Greqi, Itali, po ashtu kam qenë edhe në Amerikë, por në shumicën e rasteve u duft për me pritë shumë për vizat, kështu që liberalizimi i vizave kish mujt me na ndihmu shumë për të gjithë njerëzit”, thotë Drini, dhe se gjithë këtë e kërkon për vizita të ndryshme dhe pushime.

Diella, sikurse edhe Drini, flet dy gjuhë të huaja gjermanisht e anglisht. Ajo mbante në duar një pankartë në të cilën shkruhej se “Ardhmëria nuk ndërtohet me izolim”, dhe thotë që ka shumë dëshirë liberalizimin për vizita tek të afërmit e saj nëpër Evropë.

“Te tanë kanë qef me shku në vende të jashtme me jetu me i ba disa pushime, te tanë i kanë dajtë hallat e veta tezet kanë qef me nejt te ata, tash, te tanë duhet me pas një liberalizim që ta shfrytëzojnë në jetë, ta shfrytëzojnë kohën duke shkuar te dajtë, në vende tjera, kështu që ne nuk duhet me nejt në shpi, por me dalë me pasë liri si te tanë me shku me familje gjithkah ka të mujna na dhe në çdo kohë që mujna”, shprehet Djella.

Për gjysmë ore sa ka zgjatur protesta e tyre, askush nga zyrtarët e Zyrës së BE-së në Prishtinë nuk ka dalë për të parë se çfarë po bëhet, ndërkohë që protestuesit u argëtuan edhe me një aktivitet sportiv.

Sekretari i Përgjithshëm i NATO-s Anders Fogh Rasmussen ka thënë se ndërhyrja e NATO-s ndaj krizës në Kosovë ka pasur për qëllim pengimin e gjenocidit dhe ka qenë në përputhje me kartën e Kombeve të Bashkuara.

“Duke u përpjekur që të mbrojnë aneksimin antiligjor të Krimesë, liderët rusë kanë sulmuar legjitimitetin e operacioneve të NATO-s në Libi e në Kosovë”, ka thënë Rassmusen në Tallinn, Estoni, njoftojnë medie ndërkombëtare.

Sekretari i Përgjithshëm ka akuzuar Rusinë se përmbys faktet, duke theksuar se operacionet në Libi janë bërë në përputhje me Këshillin e Sigurimit të KB-së.

“Në Kosovë qëllimi ka qenë që të pengohet gjenocidi dhe kjo është në përputhje me kartën e OKB-së”, ka thënë ai, transmeton koha.

Pjesën më të madhe të fjalimit, Sekretari i Përgjithshëm i NATO-s ia ka kushtuar krizës në Ukrainë për të cilën ka akuzuar kryetarin rus Vladimir Putin.