Problemi mjedisor, me të cilin është ballafaquar Kosova prej vitesh me pickimin e rriqrave dhe ethet hemorragjike, sipas profesionistëve shëndetësorë, është bërë një problem kronik.

Zyrtarë në Institutin Kombëtar të Shëndetit Publik kanë bërë të ditur se Ministria e Shëndetësisë bashkë me Qeverinë e Kosovës dhe institucione tjera relevante, kanë ngritur një komitet ndërministror, i cili këtë vit ka shërbyer për parandalimin e sëmundjes në fjalë.

Si rezultat, këtë vit nuk ka pasur vdekje të personave nga ethet hemorragjike, krime kongo.

Ndryshe, nga ethet hemorragjike vetëm gjatë vitit 2013, kanë vdekur 11 persona dhe janë pickuar nga rriqrat 5.200 qytetarë, raporton REL.

Këtë vit kur edhe është paraqitur rasti i parë i pickimit nga rriqrat me datën 8 shkurt në Malishevë, ndihmë mjekësorë në këtë vend kanë kërkuar 2,125 qytetarë.

Drejtori i Qendrës Kryesore të Mjekësisë Familjare në Malishevë, Besim Zogaj, jep hollësi të tjera.

“Këtë vit situata paraqitet më e qetë krahasuar me vitet e kaluara. Nga data 8 shkurt kur edhe është paraqitur rasti i parë i pickimit të rriqrave, 2,125 qytetarë kanë kërkuar ndihmë në Qendrën Kryesore të Mjekësisë Familjare, derisa prej tyre 55 qytetarë janë udhëzuar në Klinikën Infektive, ndërsa 4 kanë rezultuar me ethe hemorragjike, por që asnjë nuk ka humbur jetën këtë vit”.

Ndërkaq, në Klinikën Infektive në Qendrën Klinike Universitare të Kosovës, sipas infektologes Lindita Ajazaj – Berisha, fluksi i pacientëve që kërkojnë ndihmë si pasojë e pickimit nga rriqrat, ka shënuar rënie.

“Këtë vit, 91 pacientë kanë qenë të shtrirë. 372 pacientë është dashur t’ua heqim rriqrat nga trupi. Situata epidemiologjike është nën kontroll. Këtë vit kemi pasur fluks më të vogël, krahasuar me vitin e kaluar. Vetëm 5 raste janë me ethe hemorragjike, por që janë në gjendje të mirë shëndetësore. Asnjë nuk është i hospitalizuar. Të gjithë janë në gjendje të mirë shëndetësore. Këtë vit kemi pasur edhe terapi dhe nuk kemi pasur telashe”, thotë ajo.

Ndërkaq, drejtori i QKMF-së në Malishevë, Besim Zogaj, ka theksuar se pavarësisht situatës së qetë epidemiologjike, sa i përket etheve hemorragjike, ndihmë mjekësore vazhdojnë të kërkojnë qytetarët që pickohen nga rriqrat.

“Është një rënie e numrit. Tash në ditët e fundit 10 deri 15 persona vizitojnë Qendrën e Mjekësisë, por situata është e qetë”, shpjegon Zogaj.

Zyrtarë nga Instituti Kombëtar i Shëndetit Publik thonë se këtë vit, gjithashtu është punuar edhe në vetëdijesimin e popullatës, gjë që konsiderohet si shumë e rëndësishme në uljen e numrit të njerëzve që pickohen nga rriqrat.

Nënkryetari i AAK-së, Ardian Gjini ka thënë se sipas PDK-së, kur ata janë në pushtet qeveria bën edhe me 55 vota. Ndërkaq, sipas tij, kur janë në opozitë, qeveria duhet t’i ketë të paktën 80 deputetë.

Ai në një shënim në Facebook ka thënë se edhe disa ditë qeveria do të formohet pa PDK-në.

“Sipas PDK, kur ata janë në pushtet bën qeveria edhe me 55 vota. Kur vjen puna të jenë në opozitë, sipas tyre, ‘republika’ duhet ta ketë një qeveri me së paku 80 deputetë. Epo, edhe disa ditë, do të ketë qeveri pa PDK, do të jetë shumë stabile, ju do të jeni në opozitë dhe sipas të gjitha gjasave do të jeni opozitë konstruktive!! Ashtu siç keni provuar ti mësoni tjerët”, ka shkruar Ardian Gjini në profilin e tij në Facebook.

Shiu i rrëmbyeshëm që ka rënë në Prizren të premten në orët e pasdites ka bërë që uji të depërtojë në një numër të shtëpive e bizneseve në lagje të ndryshme të qytetit. Autoritetet lokale kanë bërë të ditur se niveli i lartë i të reshurave ka shkaktuar dëme materiale në rezidenca e lokale biznesi dhe se ekipet e emergjencës dhe zjarrfikësve kanë dalë në terren për t’i dalë në ndihmë qytetarëve, pas raportimeve të këtyre të fundit.

“Ekipet e emergjencës kanë dalë menjëherë në terren pas thirrjeve që kemi pranuar nga qytetarët. Ata po punojnë në sanimin e gjendjes, respektivisht largimin e ujit që ka depërtuar në podrume. Deri më tani ndihma është kërkuar nga në 5 lagje të ndryshme të qytetit”, ka thënë për Kohën Ditore, drejtori i Emergjencës dhe Shpëtimit në komunën e Prizrenit, Bedrija Ejupagiq.

Sipas tij në bazë të konstatimeve fillestare shiu i rrëmbyeshëm ka shkaktuar dëme materiale, kryesisht në orenditë shtëpiake.

“Sasia e madhe e të reshurave ka bërë që kanalet e ujërave sipërfaqësore të bllokohen dhe kësisoj uji ka depërtuar në shtëpitë në disa lagje të qytetit. Situata më problematike është raportuar të jetë në lagjen Tusuz”, ka deklaruar Ejupagiq.

Ai ka shtuar se aktualisht po punohet në sanimin e gjendjes dhe se më pastaj ekipet përkatëse do të përgatisin raportin mbi dëmet e shkaktuara.

Krerët e institucioneve të Kosovës janë mbledhur sot për të diskutuar për sigurinë, si dhe për hapat që duhet ndërmarrë për të pamundësuar aktivitetet, organizimin dhe çfarëdo veprimtarie radikale e ekstremiste.

Presidenca ka njoftuar se Presidentja Atifete Jahjaga ka zhvilluar sot një takim të përbashkët me Kryeministrin Hashim Thaçi, Ministrin e Punëve të Brendshme, Bajram Rexhepi, si dhe me udhëheqësit e institucioneve të sigurisë në Kosovë, Drejtorin e AKI’së, Bashkim Smakaj, Drejtorin e Përgjithshëm të Policisë së Kosovës, Shpend Maxhuni, Kryeprokurorin e shtetit në largim, Ismet Kabashi dhe u.d të Kryeprokurorit të shtetit, Sylë Hoxha, si dhe Kryesuesin e Këshilli Gjyqësor të Kosovës, Enver Peci.Ata janë mbledhur për të diskutuar parandalimin dhe luftimin e ekstremizmit dhe të radikalizmit.

“Presidentja Jahjaga theksoi domosdoshmërinë e bashkërendimit të veprimeve ndërmjet të gjitha institucioneve të vendit, posaçërisht atyre që kanë përgjegjësinë për sigurinë kombëtare, me qëllim të luftimit të dukurive që po kërcënojnë stabilitetin dhe sigurinë e vendit, të rajonit dhe më gjerë.”

“Në takim, krerët e institucioneve kërkuan nga mekanizmat përgjegjëse për sigurinë që të veprojnë mbi bazën e ligjeve në Kosovë për të pamundësuar aktivitetet, organizimin dhe çfarëdo veprimtarie radikale e ekstremiste që kërcënojnë jetën e qytetarëve jo vetëm të Kosovës dhe që synojnë shndërrimin e vendit në burim të ekstremizmit.”

“Presidentja Jahjaga ritheksoi qëndrimin se Kosova asnjëherë nuk do të bëhet strehë dhe nuk do të shërbejë si një burim për grupet radikale e ekstremiste”, thuhet në deklaratën e Presidencës.