Kryetari i Komunës së Malishevës, Ragip Begaj, ka vizituar Qendrën Kryesore të Mjekësisë Familjare (QKMF) në Malishevë.

Ai ka ofruar mbështetjen e plotë për QKMF-në. “Jemi në sezonin e përballjes me problemin e etheve hemorragjike dhe thumbimet nga rriqrat, dhe ju keni përkrahjen e plotë, në mënyrë që së bashku, të arrijmë t’ju dalim në ndihmë qytetarëve tanë dhe në të njëjtën kohë të punojmë për parandalimin e etheve hemorragjike”.

Drejtori i QKMF-së, Besim Zogaj, njoftoi kryetarin Begaj për gjendjen e përgjithshme në QKMF, si dhe për nevojat që ka kjo qendër për t’i rritur shërbimet ndaj qytetarëve të Komunës së Malishevës.

“Si QKMF, kemi planifikuar që ligjëratat të fillojnë një muaj më herët, se vitet e tjera, sikur edhe fushatat e vetëdijesimit, po ashtu të fillojnë më herët”.

Zogaj, bëri të ditur se deri më tani janë regjistruar tri raste të thumbimit nga rriqrat dhe të gjitha rastet janë në gjendje të mirë.

”Nuk kanë indikacione të infektimit eventual me ethe hemorragjike”./PrizrenPress.com/

Avokatët mbrojtës të kryetarit të Prizrenit, Ramadan Muja dhe pesë drejtorëve të tij, në seancën e sotme gjyqësore, kanë thënë se klientët e tyre nuk janë fajtorë.

Ruzhdi Berisha, avokat i kryetarit Muja,tha se klienti i tij nuk e ka bërë shkelje ligjore gjatë ushtrimit të detyrës zyrtare si kryetar i Prizrenit.
.Edhe Sahit Bibaj, avokat i drejtorit Drejtorisë së Urbanizmit,Sadik Paqarizi, tha se klienti i tij nuk ka kryer asnjë vepër penale.

Seanca gjyqësore ndaj kryetarit të Prizrenit, Ramadan Muja dhe pesë drejtorëve të tij, do të vazhdojë edhe nesër në Gjykatën Themelore të Prizrenit.

Prokurorja e EULEX-it, Natasha Vikeri, ndërkaq në fjalimin e saj përfundimtar ka kërkuar dënimin me burg prej 3 deri 8 vjet, për kryetarin Ramadan Muja dhe pesë drejtorët e tij. Sipas saj, të dyshuarit kanë keqpërdorë detyrën zyrtare.

Vikeri, akuzon kryetarin e Komunës së Prizrenit, Ramadan Muja, Sadik Paçarizin – drejtor i Urbanizmit dhe Planifikimit Hapësinor, Avni Ademajn – ish-u.d. së drejtorit të Gjeodezisë dhe Kadastrës, Kadri Ukimerin – ish-drejtor i Gjeodezisë dhe Kadastrës, Abdullah Tejecin – drejtor aktual i Gjeodezisë dhe Kadastrës dhe Minir Krasniqin – drejtor i Administratës, për kryerjen e veprave penale gjatë ushtrimit të detyrës zyrtare./PrizrenPress.com/

Anëtarët e Komisionit për Punë të Brendshme, Siguri dhe Mbikëqyrjen e FSK-së dhe ekspertë të çështjes së sigurisë kanë kërkuar që emri i ardhshëm i kësaj force të jetë Ushtria e Kosovës.

Ahmet Isufi, Rexhep Selimi dhe Ramadan Qehaja kanë vlerësuar se shndërrimi i këtij institucioni në ushtri do t’u jepte kuptim të plotë pavarësisë dhe sovranitetit të Kosovës. Ndërsa ministri Agim Çeku ka thënë se ky emërtim ende mbetet opsioni i parë për pagëzimin e kësaj force. “Normalisht se ai është opsioni i parë, por unë më shumë jam marr me substancën dhe besoj se substanca është e mirë. Për emër do të shikojmë dhe do ta vendosë kryeministri. Ne jemi duke debatuar. Ka qenë një debat i cili, fatkeqësisht, ka dalë edhe në media, por nuk ka dalë ashtu siç ka qenë. Pra, ky është një proces, i cili është duke u harmonizuar brenda Qeverisë dhe me partnerët tanë strategjikë ndërkombëtarë, e kjo do të na marrë pak kohë”, ka thënë Çeku për “Epokën e re”.

Ai ka treguar se ky proces do të përmbyllet pas 6-vjetorit të shpalljes së pavarësisë së Kosovës. Sipas tij, substanca e kësaj force do t’i përmbushë pritjet e opinionit. “Ka shumë opsione dhe në fund do të vendoset njëri prej tyre, por nuk është personalisht punë e imja emri. Unë e kam propozuar substancën e forcës, ndërsa emri është çështje e fundit, e cila do të vendoset. Substanca do t’i plotësojë pritjet e opinionit, jo emri. Substanca qind për do t’i plotësojë pritjet e opinionit publik”, ka thënë Çeku.

Ai ka deklaruar se ky institucion është një nga tregimet më të suksesshme të Kosovës së pavarur, duke shtuar se në këtë proces do të ndryshojë edhe emri i ministrisë që drejton. “Në Kuvend do të shkojë kërkesa për ndryshime të Kushtetutës. Po në Kuvend do të shkojë Ligji për Mbrojtje dhe do të shkojë Ligji për Ministrinë e Mbrojtjes”, ka deklaruar Çeku.
Ndërsa kryetari i Komisionit për Punë të Brendshme, Siguri dhe Mbikëqyrjen e FSK-së, Ahmet Isufi, ka deklaruar për “Epokën e re” se për të marrë kuptim të plotë pavarësia dhe sovraniteti i Kosovës, FSK-ja duhet të bëhet ushtri. “Duke pasur parasysh se Kosova do të kompletohet me të gjitha institucionet si një shtet funksional, atëherë emri i kësaj force do të duhet të ishte Ushtria e Kosovës, në mënyrë që pavarësia dhe sovraniteti i Kosovës ta marrin kuptimin e vet. Kjo ndihmon paqen dhe stabilitetin në rajon. Po ashtu, ndihmon në misionet ndërkombëtar nëpërmjet integrimit në NATO”, ka thënë Isufi. Ai ka deklaruar se për misionin e ardhshëm të kësaj force do të ketë rëndësi edhe emri. “Ka rëndësi shumë struktura, emri dhe misioni që ka ky institucion. Gjithashtu, kanë rëndësi edhe përgatitjet profesionale dhe trajnimet që janë kryer, sidomos vlerësimet që janë bërë shumë pozitive, duke u ngritur si një forcë kredibile në nivel të Kosovës. Pra, emri ushtri është emri i vërtetë i kësaj strukture”, ka deklaruar Isufi.
Edhe zëvendëskryetari i parë i këtij komisioni, Rexhep Selimi, ka deklaruar se deri më tash është harxhuar kohë kot duke menduar se cili do të jetë emri i ardhshëm i FSK-së. Sipas tij, vetë diskutimi dhe harxhimi i kohës për këtë çështje e konteston të ardhmen e këtij institucioni. “Nëse Kosova është shtet, FSK-ja duhet të bëhet ushtri, nëse FSK-në nuk e bëjnë ushtri, atëherë të njëjtit e kontestojnë shtetin e Kosovës”, ka thënë Selimi për “Epokën e re”. Ai ka treguar se emërtimi i FSK-së me këtë emër është shtyrë vetëm për shkak të mosgatishmërisë së Qeverisë së Kosovës.

“E ardhmja e kësaj force duhet të jetë vetëm një, që është Ushtri e Kosovës. Do të duhej të ishte e tashmja e tillë, por për shkak të mosangazhimit të duhur dhe mosgatishmërisë politike të Qeverisë së Kosovës nuk ka ndodhur kjo. Sidoqoftë, nëse kjo nuk ka ndodhur, atëherë nuk do të duhej Qeveria e Kosovës të harxhonte kohë duke diskutuar se çfarë emri do të duhej ta kishte forca e ardhshme që do ta pasonte FSK-në, përveçse Ushtria e Kosovës”, ka deklaruar Selimi. Ai ka mohuar se shndërrimin e FSK-së në ushtri po e pengojnë ndërkombëtaret. Sipas tij, një gjë e tillë i pengon vetëm Serbisë dhe aleatëve të saj që nuk e kanë njohur Kosovën. “Nuk ka shtet ndërkombëtar, i cili e ka njohur pavarësinë e Kosovës. të ketë deklaruar se shteti i Kosovës të cilin po e njohin nuk duhet të ketë ushtri. Përkundrazi, të gjitha shtetet që e kanë njohur Republikën e Kosovës e kanë njohur si shtet të pavarur dhe sovran. E kjo nënkupton që ne t’i kemi të gjitha institucionet, edhe ushtrinë si mekanizëm partner me të gjitha shtetet që na kanë njohur”, është shprehur Selimi.
Të njëjtin mendim me anëtarët e komisionit për mbikëqyrjen e FSK-së ka edhe eksperti i çështjeve të sigurisë, Ramadan Qehaja, i cili ka deklaruar se është bërë vonesë e madhe në këtë drejtim. E për këtë vonesë ai i ka fajësuar vendorët. “Pavarësisht se jemi të vonuar dhe presionit bukur të madh të bashkësisë ndërkombëtare, mendoj se këtë forcë duhet ta quajmë Ushtria e Kosovës, assesi ndryshe”, ka thënë Qehaja për “Epokën e re”.

Ai ka bërë me dije se nëse NATO-ja nuk e dëshiron një gjë të tillë atëherë kjo organizatë duhet të kërkojë edhe nga vendet e tjera të rajonit t’i zvogëlojnë këto forca. “Unë e kuptoj atë se dikush nga lidershipi ynë do të thoshte se lehtë e ka ai të flasë, por si ekspert i çështjeve të sigurisë dhe ekspert ushtarak mendoj se ne duhet të shkojmë në këtë drejtim. Pse vetëm ne të privohemi nga një e drejtë që e kanë të gjitha shtetet këtu në rajon. Nëse nuk duhet të kemi ushtri, atëherë së paku pse NATO nuk kërkon të zvogëlohen ushtritë e shteteve të rajonit ose ato të hiqen në tërësi”, ka deklaruar Qehaja.

Policia ka arrestuar një boshnjak, nën dyshimet se i njëjti kishte vjedhur një televizor Plazma në vlerën e 700 eurove.

Sipas policisë, televizori ishte vjedhur ditë më parë në fshatin Neprogosht të komunës së Prizrenit, dhe viktima gjithashtu ishte boshnjak.

Me urdhër të prokurorit i dyshuari dërgohet në mbajtje

Në raportin më të ri të organizatës Reporterët pa Kufij, me seli në Paris, për lirinë e shtypit, Kosova është klasifikuar në vendin e 80-të, duke shënuar kështu përparim për 5 vende nga viti i kaluar, kur ishte në vendin e 85-të.

Prej vendeve të rajonit, Shqipëria është në vendin e 85-të, ndërsa Maqedonia ka shënuar rënie prej vendit të 116-të, në venin e 123-të.

Klasifikimin më të mirë nga vendet e Ballkanit, në raportin “Indeksi i Lirisë së Shytpit në Botë”, e ka Sllovenia (34).

Serbia është në vendin e 54, Koracia është e 65-ta, Bosnjë Hercegovina e 66-të, ndërsa Mali i Zi plasohet në vendin e 114-të.

Në krye të listës, gjenden Finlanda, Holanda, Norvegjia, Luksembuergu dhe Andora, ndërsa Shtetet e Bashkuara kanë shënuar rënie duke u plasuar në vendin e 46-të, ndërsa një vit më parë ishin në vendin e 13.

Në listë gjenden gjithsej 180 shtete dhe territore, ndërsa në fund të listës janë Turkmenistani, Koreja Veriore dhe Eritrea.
(REL)

Kryetarja e Komisionit Parlamentar për Integrime Evropiane, Vjosa Osmani, është shprehur e pakënaqur me ecurinë e procesit të liberalizimit të vizave për qytetarët e Kosovës. Në një intervistë për ‘Epokën e re’, Osmani ka thënë se si rezultat i papërgjegjësisë së Qeverisë aktuale janë duke pësuar qytetarët.

“Deri tani plotësim i këtyre kritereve ka ecur me ritëm shumë të ngadaltë, që ka rezultuar edhe me prolongimin e një vendimi pozitiv për liberalizim. Fatkeqësisht nga kjo më së shumti pësojnë qytetarët e Kosovës, të cilët mbesin të vetmit të getoizuar që nuk mund të udhëtojnë lirshëm në zonën schengen për faj të papërgjegjësisë së Qeverisë”, ka theksuar ajo.

Osmani ka thënë se qytetarët e Kosovës do të vazhdojnë të mbesin të izoluar derisa të largohet nga pushteti kjo Qeveri.

“E kam deklaruar edhe më herët se getoizimi i qytetarëve të Kosovës do të marrë fund atëherë kur t’i vijë fundi Qeverisë Thaçi”, ka deklaruar ajo.

Sipas saj, Qeveria nuk është duke treguar vullnet politik për t’i luftuar krimin dhe korrupsionin që janë dy sfida kryesore për liberalizimin e vizave.

“Procesi i liberalizimit kërkon plotësim kriteresh në shumë fusha, ndër të tjera edhe në fushën e sundimit të ligjit, luftimin e krimit e korrupsionit dhe fusha të tjera të rëndësishme. Në këtë aspekt, Qeveria nuk ka treguar vullnet politik për t’i luftuar këto dukuri negative, e në këtë situatë natyrisht se Komisioni Evropian nuk ka sit ë evidentojë progres”, ka thënë Vjosa Osmani për “Epoka e re”.

Pesë fshatra të Opojës, së komunës së Dragashit, kanë mbetur në terr informativ sepse është ndërprerë rrjeti kabllor i vendosur para katër vjetësh.

Banorët shprehin shqetësim për gjendjen e krijuar dhe kërkojnë zgjidhje nga Komuna e Dragashit.

Në komunë thonë se inspektorët e ATK-së e kanë penguar pronarin që ta ushtrojë veprimtarinë për shkak të mënyrës së funksionimit të këtij biznesi.