Ministri i Punëve të Jashtme i Kosovës, Enver Hoxhaj, ka pritur sot në takim ministren e Jashtme të Italisë, Federica Mogherini, vendi i së cilës udhëheq me presidencën e BE-së.

Pas takimit, në një konferencë për gazetarë, Hoxhaj dhe Mogherini kanë vlerësuar progresin e Kosovës në liberalizimin e vizave si dhe kanë shprehur angazhimin e dyanshëm për të bërë të mundur nënshkrimin e MSA-së gjatë gjashtë mujorit të presidencës italiane të BE-së.

Hoxhaj dhe Mogherini pas takimit zyrtar, kanë nënshkruar edhe një marrëveshje për bashkëpunim në fushën e Transporteve ndërmjet dy shteteve.

Hoxhaj vlerësoi rëndësinë e kësaj vizite në dy momente të rëndësishme për Kosovën. “Sot Komisioni Evropian e ka prezantuar raportin për liberalizimin e vizave, këtë temë e diskutova edhe me ministren dhe është dëshmuar nga Komisioni Evropian që Republika e Kosovës ka bërë një progres të madh në jetësimin e kritereve dhe standardeve kyçe për liberalizimin e vizave. Ne jemi të vetëdijshëm se ai proces është teknik dhe që Kosova duhet t’i përmbush të gjitha obligimet e saj por unë kërkova nga ministrja Mogherini që presidenca italiane dhe shtetet anëtare të BE-së ta kenë një vullnet politik dhe ta caktojnë datën gjatë këtij viti kur qytetarët e Kosovës mund të udhëtojnë pa viza drejtë Evropës”, tha Hoxhaj, duke shprehur besimin se Kosova do të shpërblehet në fund të këtij viti.

Ai po ashtu tha se ngjarja e dytë ka të bëjë me atë që nesër do të vendosen inicialet në marrëveshjen e MSA-së ndërmjet Kosovës dhe BE-së, duke kërkuar mbështetjen e ministres Mogherini për Kosovën sa i përket edhe kësaj marrëveshjeje gjatë gjashtë muajve të ardhshëm. “Ne kemi dëshirë që procesi i përmbylljes së nënshkrimit të ndodhë gjatë udhëheqjes së presidencës italiane dhe shpresojmë që do ta kemi mbështetjen e Italisë”, tha Hoxhaj, duke e falënderuar ministren për mbështetjen që po i jep Kosovës për anëtarësimin në organizata ndërkombëtare.

Ai po ashtu tha se gjatë takimit është biseduar edhe për marrëveshjet që janë arritur ndërmjet Republikës së Kosovës dhe asaj të Serbisë, dhe domosdoshmërinë e jetësimit të tyre në veri.

Ministrja e Jashtme e Italisë, Federica Mogherini, tha se është interes strategjik jo vetëm i Italisë, por edhe i Bashkimit Evropian integrimi i Kosovës dhe fqinjëve të saj të Ballkanit Perëndimor në Evropë. Sipas saj, kjo është e rëndësishme për stabilitetin e Evropës dhe është e rëndësishme për zhvillimin e prosperitetin.

Mogherini ka uruar që të mund ta nënshkruhet MSA-ja gjatë gjashtë mujorit të presidencës italiane të BE-së, duke theksuar se kjo gjë nuk varet nga presidenca italiane, por mund të punohet së bashku që ta arrihet ky synim.

Ajo tha se gjatë takimit me ministrin Hoxhaj kanë folur edhe për bashkëpunimin bilateral. “Ideja është që dy qeveritë tona të takohen edhe përmes kryeministrave dhe ministrave të ekonomisë dhe të zhvillohet bashkëpunimi ekomomik ndërmjet dy vendeve”, tha Mogherini, duke përmendur përvojën pozitive të punës shumë të mirë me Kosovën dhe kosovarët.

I pyetur nga gazetarët, ministri Hoxhaj po ashtu ka mirëpritur udhëheqjen e politikës së jashtme të BE-së nga Mogherini si zëvendësuese e Ashton, duke shprehur besimin edhe në formatin e dialogut ndërmjet Republikës së Kosovës dhe asaj të Serbisë që do të mund të udhëhiqej nga ajo. /PrizrenPress.com/

Analisti politik Nexhmedin Spahiu, ka thënë se Gjykata Kushtetuese ka marrë vendimin e pezullimit të seancës konstitutive si rezultat i frikës.

Spahiu tha se kryetari i gjykatës kushtetuese, Enver Hasani, e bëri këtë veprim të shpejtë nga frika.

“Mendoj se Enver Hasani e ndërmori këtë veprim të shpejtë, pasi u frikësua mos Kuvendi i Kosovës po e shkarkonte atë. Të gjithë e dimë se Kuvendi e ka patur këtë mundësi, derisa blloku trepalësh edhe i ka pasur këto vota”, ka thënë ai, transmeton Klan Kosova.

Spahiu, si mysafir në Info Magazine të Klan Kosovës, tha se ekziston perceptimi i përgjithshëm se Gjykata Kushtetuese anon kah pushteti apo PDK-ja.

“Unë vetëm po e them atë që e thonë të gjithë. Të gjithë e dimë se si emërohen gjyqtarët dhe se kush i emëron ata. Mendoj se duhet marrë parasysh edhe mendimet ndryshe që i kishin gjyqtarët ndërkombëtarë. Besoj se ata janë më të mençur se këta tanët”, përfundoi ai.

Antraksi në Krushë të Madhe të Rahovecit ka mbytur 5 lopë, ndërsa rrezikon të prek edhe njerzit, raporton Klan Kosova.

Antraksi është një sëmundje akute që shkaktohet nga bakteria “Bacillus anthracis” prej ku janë prek edhe njerëz të kësaj zone të Rahovecit. Pesë veta u dërguan urgjentisht në klinikën infektive në Prizren.

Drejtoresha e Shëndetit publik në këtë qytete, Nurishahe Hulaj, i tha Klan Kosovës me telefon se mostrat e këtyre pacientëve në Prishtinë.

Te banorët e Krushës është shtuar frika. Në Krushë thanë se e dinë se çfarë mund të ju bëjë atyre antraksi i lopëve dhe i kafshëve të cilët i prekë edhe njerëzit.

Agjencioni i Veterinës urdhëroi vaksinimin e të gjitha kafshëve kundër sëmundjes , por nuk dihet sa lopë janë prekur.

Atraksi siç thanë epidemiologët mund të jetë fatal edhe për njerzit nëse të prekurit nga kjo sëmundje nuk trajtohet me kohë.

Kjo sëmundje ngjitëse bartet kafshët nëpërmjet kontaktit. Njerëzit mund ta marrin atë duke e konsumuar mishin e qumështin.

Ministri i Punëve të Brendshme (MPB), Bajram Rexhepi e ka vlerësuar real dhe pozitiv raportin e Komisionit Evropian (KE) për përmbushjen nga Kosova të kritereve për udhërrëfyesin për liberalizimin e vizave.

Rexhepi ka thënë për “Epokën e re”, se raporti i KE-së paraqet gjendjen faktike të shtetit të Kosovës, por, sipas tij, duhet plotësuar edhe disa çështje të vogla, të cilat i ka rekomanduar Komisioni Evropian në këtë raport.

“Raporti i Komisionit Evropian është shumë pozitiv. Megjithatë kanë mbetur edhe disa çështje të vogla, të cilat mund të kryhen pa ndonjë problem të madh. Gati jemi në përfundim të përmbushjes së kritereve dhe kushteve që dalin nga udhërrëfyesi për liberalizim të vizave. Prandaj, ky raport është real dhe është pozitiv për shtetin e Kosovës”, ka thënë Rexhepi, duke shtuar se edhe kriteret e mbetura do të përmbushën në mënyrë që qytetarët e vendit të udhëtojnë pa viza sa më shpejt që është e mundur.

“Nëse ekziston vullneti i institucioneve evropiane ne shumë shpejt do t’i përmbushim edhe kriteret e mbetura”, ka deklaruar Rexhepi.

Ndërkaq, komisionerja evropiane për Çështje të Brendshme, Cecilia Malmstrom, ka thënë se autoritetet e Kosovës kanë punuar shumë dhe kanë arritur progres në fushat, si pranimi dhe siguria e pasaportave, por sipas saj, duhet të vazhdojnë të punojnë në rezultatet e treguara dhe të angazhohen në mangësitë e identifikuara në këtë raport.

Raporti i Komisionit Evropian rekomandon që Kosova duhet të rrisë riintegrimin e qëndrueshëm të personave kthyer; të përmirësojë saktësinë e sistemit të saj për statusin civil; të shtyjë para sistemin informativ për viza; të zhvillojë pavarësinë e gjyqësorit dhe të krijojë një regjistër të besueshëm për vendimet e gjykatave të marra për rastet e krimit të organizuar dhe korrupsionit.

Kryetari i LDK-së Isa Mustafa thotë se janë të vendosur që në vend të mos ketë qeveri “Thaçi 3”. Për këtë tha se kanë votën e sovranit.

Ndërkohë, nëpërmjet një postimi në Faacebook, Mustafa tha se “Gjykata gjykon për kushtetutshmërinë, por ajo nuk e zgjedh as Kryetarin e Kuvendit e as Qeverinë”.

Ja shkrimi i plotë i Mustafës në Facebook:

Me 17 korrik ndodhi veprimi më demokratik, në rrethana krejtësisht jodemokratike, që mund të ndodh në një vend. Me vullnetin e tyre, 83 deputetë u shprehën se nuk e dëshirojnë vazhdimin e qeverisjes, e cila e ka ngulfat shtetin. Ky është vendim i atyre që morën votën e sovranit. Ne nuk e përdorëm as rrugën dhe as dhunën për ta treguar fuqinë dhe vendosmërinë tonë. E përdorëm votën, si mjetin më demokratik të këtij vendi.

LDK, AAK dhe Nisma sot jemi edhe më shumë të vendosur që të vazhdojmë këtë rrugë demokratike për t’i dhënë këtij vendi shansin e ndryshimeve. Unë jam i prirur të besoj se institucionet e pavarura do të marrin vendim të pavarur kushtetues. PDK dhe z. Thaçi duhet ta kenë të qartë se gjykata gjykon për kushtetutshmërinë, por ajo nuk e zgjedh as Kryetarin e Kuvendit e as Qeverinë. Këtë e bëjnë deputetët. Ne e kemi grupin më të madh parlamentar, e kemi besimin e shumicës, edhe asaj shqiptare edhe të komuniteteve, që është kriter themelor kushtetues.

Deputetët e legjislaturës së pestë të Kosovës, do të marrin paga si të zgjedhur të popullit për afro dy muaj – pa bërë asnjë punë.

Vendimi i Gjykatës Kushtetuese për të pezulluar postin e Isa Mustafës si kryetar i Kuvendit të Kosovës, e bënë të pamundur edhe punën e deputetëve të rinj. Ndërkaq, sekretari i Kuvendit të Kosovës, Ismet Krasniqi, ka thënë për lajmi.net se deputetët paguhen që nga momenti i dhënies së betimit të tyre si të zgjedhur të popullit.

Albert Krasniqi, hulumtues në Institutin “KIPRED”, ka thënë se në aspektin e shifrave financiare, taksapaguesve kosovarë pagat e deputetëve mund t’ju kushtojnë rreth 180 mijë euro në muaj, përkundër asaj që puna e Kuvendit do të jetë e pezulluar të paktën deri më 18 shtator.

“Ligjërisht është e vështirë që të ndërpriten pagat, pasi që mandati i deputetit fillon që në momentin e certifikimit të rezultateve nga KQZ dhe jo në seancën konstituive në Kuvend të cilën e ka pezulluar Gjykata Kushtetuese”, tha Krasniqi.

Sipas tij, Kosova rrezikon që të mbetet pa institucione të reja deri në nëntor.

Taskë Forca e Bashkimit Europian e cila po i heton pohimet për trafikim me organe në Kosovë, ka njoftuar se Prokurori Williamson do t’i bëjë publike gjetjet e tij gjatë një konference të martën e ardhshme në Bruksel.

Në një njoftim për media, zëdhënësi i Taskë Forcës bën të ditur se Prokurori kryesor i Taskë Forcës Speciale të Bashkimit Europian (SITF), Ambasadori Clint Williamson do të bëjë një deklaratë rreth të gjeturave të SITF, të martën, më 29 korrik në ora 10 e gjysmë në dhomën e mediave të Këshillit Europian ( Ndërtesa Justus Lipsius, 175 Rue de la Loi, Bruksel).
Po ashtu bëhet e ditur se Williamson për herë të parë do të pranojë edhe të përgjigjet në pyetjet e gazetarëve.