Këshilli Prokurorial i Kosovës, i udhëhequr nga Ismet Kabashi, është konstatuar se muajin e kaluar ua ka shkelur të drejtat e garantuara me Kushtetutë dy prokurorëve kosovarë – Shyqyri Sylës dhe Laura Pulës.

Kabashi nuk e ka marrë këtë përgjegjësi duke u arsyetuar se vendimi ka qenë kolegjial. Në Kolegjin e Kushtetueses ka qenë pjesëmarrës edhe Enver Hasani, ani se dy tenderë të dhënë në kohën kur ishte rektor janë duke u hetuar.

Muaj më parë në Kushtetuese është punësuar vajza e Ismet Kabashit… /Koha ditore/

Djali i madh i presidentit Ibrahim Rugova, Mendim Rugova flet për herë të parë në një intervistë për zhvillimet politike në vend.

Në rrëfimin e tij, Mendimi flet për idealin që ka pasur shoqëria kosovare për Republikën e saj, ideal që ka humbur pas lufte.

Ai kërkon që përpjekja për ta bërë Kosovën ashtu siç e ka dashur presidenti dhe të flijuarit e tjerë të mos ndalet.

Rugova në këtë intervistë që botohet në numrin e nesërm të gazetës Tribuna jep mesazhet e tij për politikën e stome dhe ndan kujtime nga jeta si djali i madh i presidentit të parë të shtetit.

Ka mbi 20 vjet që Kosova është shkëputur nga regjimi komunist në ish-Jugosllavi. Megjithatë, ish-zyrtarë të asaj kohe, ende mbajnë poste vendimmarrëse në Kosovë.

Njohësit e zhvillimeve politike në Kosovë, analistët dhe përfaqësuesit e disa partive politike opozitare, vlerësojnë se lustracioni do ta ndihmonte Kosovën që të ndahet edhe ideologjikisht nga komunizmi.

Lideri i Vetëvendosjes, Albin Kurti thotë për agjencinë e lajmeve INA, se procesi i lustracionit dhe ballafaqimi me të kaluarën pushtuese totalitare është një proces i domosdoshëm për shoqëritë të cilat kanë kaluar nëpër periudha të tilla.

“Vetëm duke kaluar nëpër këtë proces dhe duke u ballafaquar me të, mund ta zgjidhim këtë problem. Por, kjo gjë duhet bërë gjithmonë duke pasur parasysh se lustracioni është proces që duhet bërë për pastrimin shpirtëror të mbarë shoqërisë, dhe jo një instrument shantazhi e presioni”, deklaroi Kurti.

Ndërkaq, ish-kryeparlamentari Jakup Krasniqi thotë për agjencinë e lajmeve INA se procesi i lustracionit për ne shqiptarët që kemi qenë të robëruar, nuk është aspak i lehtë.

“Lehtë është të bëhet lustracioni të popujt që është ndërruar vetëm sistemi. Për ne shqiptarët që kemi qenë të robëruar, nuk është aspak i lehtë. Nuk e di sa kemi skenime të sakta, se mundet fare lehtë që brenda nate patrioti të bëhet tradhtar dhe e kundërta. Por, vendosja e njerëzve në pozita kyçe duhet të bëhet me kujdes. Fatkeqësisht, ne shqiptarët në ketë rrafsh jemi bërë më shumë se syleshë”, shprehet Krasniqi.

Analisti Vilhard Shala shprehet për INA-n se është i pajtimit që menjëherë të hapen dosjet dhe personat që ka qenë të përfshirë në postet dhe shërbimet e asaj kohe, duhet të penalizohen.

Ndërkaq, profesori i së drejtës, Fatos Rushiti thotë se, “lustracioni në Kosovë njëherë përnjëherë nuk mund të fillojë pa përfunduar bisedimet politike deri sa të arrihet një marrëveshje përfundimtare me Serbinë”.

“Shteti i së drejtës në Kosovë ende nuk funksionon si duhet, sidomos në Gjyqësi, ende nuk kemi pavarësi të gjyqësorit nga politika, ndërsa vet politika në Kosovë është konfliktuoze me shumë parti, dhe me shumë afera korruptive pothuajse tek të gjitha partitë që janë aktive, si në nivelin qendror ashtu edhe në nivelin lokal. Në këtë kontekst, lustracioni pa një konsolidim të klasës politike me njerëz të rinj dhe të pandikuar politikisht në qeverisje nuk do të mund të kapet seriozisht dhe të ketë sukses të plotë’, thekson Rushiti.

Sipas tij, “një tjetër dimension që mund ta bëj lustracionin jo të pranueshëm për shoqërinë është se ende njerëz të ish-sistemit jugosllav janë në krye të partive politike kryesore në Kosove, kështu që kjo nismë nuk mund ta ketë kredon morale por edhe profesionale për tu realizuar në të vërtetë”.

Kosova është njëra ndër shtetet e rajonit që nuk ka ligj për lustrim (pastërtinë e figurës), derisa për çdo ditë në opinion flitet për një numër relativisht të madh të politikanëve, profesorëve, gazetarëve e teologëve, që i kanë shërbyer e vazhdojnë t’i shërbejnë shteteve të “të tjerëve”.

Ligjvënësit dhe ekspertët kërkojnë që Kuvendi i Kosovës sa më shpejtë ta miratojë ligjin për lustrim, që të dihet më pas se kush kanë qenë bashkëpunëtor i UDB-së, e kush ka qenë i maltretuar nga spiunimi i tyre.

Edhe pse pastrimi i figurave konsiderohet shumë i vështirë, sepse dosjet e UDB-së janë në Beograd, ekspertë të shërbimeve sekrete, partive opozitare, Komisionit parlamentar për mbikëqyrjen e AKI-së, kërkojnë që procedurat për hartimin dhe miratimin e këtij ligji të fillojnë sa më shpejtë.

Kryetari i LDK-së, Isa Mustafa, sot takoi Kryesinë e Lidhjes Demokratike të Kosovës dhe kryetarët e Degëve të LDK-së.

Sipas kumtesës së lëshuar nga LDK-ja, në këtë takim, Kryesia dhe kryetaret e degëve të LDK-së diskutuan për seancën Konstituive të Kuvendit të Republikës së Kosovës, si dhe organizimin e Mbledhjes së Këshillit të Përgjithshëm të Lidhjes Demokratike të Kosovës, që do të mbahet gjatë ditëve në vijim.

Kryesia e Lidhjes Demokratike të Kosovës dhe kryetarët e Degëve diskutuan për marrëveshjen LDK – AAK – NISMA, dhe dhanë përkrahje të plotë Kryetarit Mustafa për angazhimin dhe veprimet e fundit në raport me krijimin e institucioneve të reja, thuhet në njoftim.

Edhe pas katër muajve, rasti i kryetarit të Komunës së Prizrenit Ramadan Mujës ende nuk ka shkuar në Gjykatën e Apelit.

Zëdhënësi i Gjykatës së Apelit Arbër Jashari tha për KALLXO.com se rasti i kryetarit të Komunës së Prizrenit, nuk ka arritur në gjykatë.

“Deri sot (e hënë) rasti i kryetarit të Komunës së Prizrenit nuk ka ardhur tek ne”, tha Jashari.

Ndërsa mbrojtësi i kryetarit Muja, avokati Ruzhdi Berisha, tha se ka parashtruar ankesë me kohë dhe se me këtë ka kryer obligimin e tij ligjor.

“Ne e kemi dorëzuar ankesën brenda afatit ligjor, veprimet tjera mbeten në përgjegjësinë e gjykatës. Ne nuk kemi asnjë informatë se çka ka ndodhur më tutje”, tha Berisha të cilit nuk i kujtohet data e saktë e dorëzimit të ankesës porse e di se ka qenë në fund të qershorit.

Edhe dy mbrojtësit tjerë, Bashkim Nevzati e Pjetër Përgjokaj, të cilët në këtë çështje mbronin, Minir Krasniqin ish-drejtorin e Administratës Publike, aktualisht kryetar i degës së PDK-së në Prizren, po ashtu thonë se i kanë dorëzuar ankesat me kohë.

Mirëpo ata thonë se ligji nuk precizon afat kohor, brenda të cilit duhet të dorëzohen ankesat nga gjykata e shkallës së parë në atë të dytë.

“Sipas Kodit të Procedurës Penale, thuhet se lënda nga gjykata e shkallës së parë në atë të dytë duhet të dorëzohet në kohë të arsyeshme, por nuk precizohet afati i saktë. Përndryshe, ne e kemi dorëzuar ankesën më 28 maj 2014”, thotë avokati Nevzati.

Sipas tij mbrojtja ende nuk ka marrë as përgjigjen e prokurores, nëse ka pasur kundërshtime në ankesat e tyre.

“Sido që të jetë duke marrë parasysh se kanë qenë gjashtë ankesa dhe është dashtë të përkthehen, nuk ka kaluar edhe kohë e gjatë”, arsyeton gjykatën Nevzati.

Në anën tjetër në Gjykatën Themelore në Prizren thonë se lënda ende nuk u është dorëzuar nga EULEX-i.

Sipas EULEX-it ankesat janë paraqitur në Gjykatën Themelore në Prizren nga 20, 27 dhe 28 maji.

“Ankesat janë dërguar për përkthim dhe për shkak të gjatësisë së tyre, u desh kohë për t’u përkthyer. Më pas, sipas procedurës në fuqi, ato janë dërguar në prokurori për mendimin e prokurorisë dhe ne jemi duke pritur një përgjigje nëse prokuroria do të paraqesë një opinion apo jo”, tha Eldita Tarani nga Zyra për Informim e EULEX-it.

Sipas saj e tërë dosja e lëndës është e gatshme dhe posa të merret një përgjigje nga Prokuroria, dosja e lëndës do të dërgohet menjëherë në Gjykatën e Apelit.

“Ju lutem, vini re se kjo është procedurë normale e ndjekur në raste të mëdha dhe komplekse, që përfshin përkthimin e gjithsecilit dokument”, tha Tarani.

Sipas avokatëve, ankesa për Ramadan Mujën ka pasur 30 faqe, për Minir Krasniqin 10 faqe, për Kadri Ukimerin 8 faqe, aq sa kanë pasur përafërsisht edhe tri ankesat tjera.

Kryetari i Komunës së Prizrenit Ramadan Muja, së bashku me pesë zyrtarë tjerë komunalë, më 13 mars 2014, u gjetën fajtorë dhe u dënuan nga Gjykata Themelore e Prizrenit, për veprat penale të keqpërdorimit të detyrës dhe autoritetit zyrtar.

Kryetari Muja, për katër pikat e aktakuzës, u dënua me burgim prej dy vjetësh, me kusht që ai të mos kryejë vepra tjera penale gjatë 3 vjetëve. Ai po ashtu mori edhe dënimin plotësues, ndalimin e ushtrimit të funksioneve publike në kohëzgjatje prej 30 muajsh.

Minir Krasniqi ish-drejtor i Administratës Publike u dënua me 1 vjet e 6 muaj burgim me kusht që për dy vjet të mos bëjë vepër tjetër penale.

Edhe Krasniqi nuk ka të drejtë të ushtrojë funksione publike për 18 muaj.

Kadri Ukimeri ish-drejtor i Gjeodezisë dhe Sadik Paçarizi ish-drejtor i Urbanizmit u dënuan me 8 muaj burgim me kusht që për 2 vjet të mos bëjne vepër tjetër penale.

Avni Ademaj ish-drejtor i Gjeodezisë dhe Kadastrit u dënua me 5 muaj burgim me kusht që për 1 vit të mos shkaktojë vepra tjera penale.

Historik i shkurtër i rastit Muja

Procedura ndaj Mujës dhe të tjerëve, ishte nisur më 25 mars të vitit 2013, për të përfunduar në marsin e vitit 2014.

Muja dhe të tjerët akuzoheshin se kishin bërë keqpërdorime me prona komunale dhe të menaxhuara nga Agjencia Kosovare e Privatizimit.

Gjykimin e udhëhoqi kryetari i trupit gjykues nga radhët e EULEX-it, Vladimir Mikula.

Mozbatimi i veprimit të Gjykatës Supreme

Në vitin 2006, Gjykata Supreme kishte shpallur Komunën e Prizrenit si pronare legjitime të parcelave të tokës me numër 8617 dhe 8619 që kanë sipërfaqe prej 0.20.65 dhe 0.06.22 hektarësh. Të dyja kanë vlerë rreth 50 mijë euro.

Për tri vjet rresht, nga 1 korriku 2008 deri më 29 nëntor 2011, Muja së bashku me Kadri Ukimerin, në cilësinë e Drejtorit të Gjeodezisë, nuk kanë ekzekutuar këtë aktgjykim, thuhet në pikën e parë të aktakuzës.

Edhe pse avokati publik i Komunës së Prizrenit kishte njoftuar Kryetarin e Komunës, përmes një memorandumi që vendimi i Supremes duhej ekzekutuar, Muja kishte urdhëruar Kadri Ukimerin të bënte të kundërtën.

Sipas aktakuzës, Muja “ka urdhëruar Ukimerin që të mos bënte ndryshimet e duhura në shënimet kadastrale që do ta bënin Komunën e Prizrenit pronare të ligjshme të parcelave tokësore”.

Meqenëse toka nuk ishte kthyer në pronësi të komunës, nga veprimet e kryetarit të komunës dhe drejtorit të gjeodezisë kanë përfituar Minir Krasniqin (i pandehur tjetër në këtë rast), M.Q dhe J.A.

Dhënia e tokës “Gulistanit”

Pika e dytë e aktakuzës përfshin periudhën nga 24 nëntori 2010 dhe 11 shkurt 2011, gjatë së cilës kohë Muja së bashku më Minir Krasniqin, drejtor i Administratës dhe Avni Ademajn, ushtrues detyre i Drejtorit për Gjeodezi, kanë vepruar në bashkëkryerje që t’i sjellin dobi pasurore Qendrës Edukative Arsimore “Gulistan”.

Të tretë në mënyrë të paligjshme kanë marrë në posedim parcelën e tokës me numër 800/2 me sipërfaqe prej rreth 50 mijë metra katrorë në vendin e quajtur “Boka Boka” me vlerë prej 100 mijë e 600 eurosh.

Toka ishte e regjistruar në emër të Organizatës Punuese të Pylltarisë “Sharri” dhe administrohej nga AKP-ja, andaj komuna nuk mund ta posedonte.

Në mënyrë që të administronin me të, nën organizimin e Mujës, Krasniqit dhe Ademajt, toka kishte kaluar nga AKP-ja në pronësinë e komunës së Prizrenit brenda një dite.

Tokën e AKP-së Muja e mori në posedim më 24 nëntor 2010, kur kishte lëshuar vendimin 01/730. Të njëjtin ditë, Minir Krasniqi kishte kërkuar nga Avni Ademaj që të bënte ndryshimet e nevojshme në kadastër të cilat ishin bërë nga ky i fundit po atë ditë.

Kështu, tre muaj pasi kishte marrë paligjshëm tokën e AKP-së, më 11 shkurt 2011 Komuna ka nënshkruar kontratë më Qendrën Edukative Arsimore “Gulistan” me të cilën në mënyrë të paligjshme i jepej kësaj të fundit toka e AKP-së në shfrytëzim për 40 vjet pa kompensim.

Tokë edhe për fabrikën “Kamila”

Pika e tretë e aktakuzës tregon që Muja kishte vazhduar të merrte veprime të paligjshme kur bëhej fjalë për shfrytëzim pronash.

Në periudhën kohore nga 15 dhjetori 2010 deri më 14 prill 2011, Ramadan Muja dhe Sadik Paçarizi, drejtor i Drejtorisë për Urbanizëm, kanë tejkaluar kufijtë e autorizimive të tyre, kur i dhanë tokën publike fabrikës së çokollatës “Kamila”.

Me vendim të Mujës fabrikës i është ndarë toka prej 20 mijë metrash katrorë, në vlerë prej 40 mijë eurosh, në formën e shfrytëzimit pa pagesë, pa i ndjekur procedurat përkatëse ligjore.

Pika e fundit e aktakuzës, ka të bëjë me ndërprerjen e përfaqësimit të ekspertëve të gjeodezisë në lëndët e gjykatës.

Sipas aktakuzës së prokurorisë, kryetari Muja me nxjerrjen e një konkluzioni më 2 gusht 2012, të cilën për nënshkrim ia kishte ofruar drejtori i Administratës Minir Krasniqi, kishte ndaluar përfaqësimin e ekspertëve të gjeodezisë në gjykatë.

Ndërsa drejtori i Gjeodezisë dhe Kadastrit, Abdullah Tejeci, në bazë të këtij konkluzioni i kishte urdhëruar ekspertët që të mos përfaqësojnë në gjykatë, kështu që ishte bërë bllokimi i lëndëve gjyqësore për gjashtë muaj rresht./Kallxo.com/