Ballkani shquhet për konflikte e mosmarrëveshje mes shteteve, por po ashtu tani për tani shquhet edhe për liderë të rinj.

Në fakt liderët e rinj kanë nisur të dominojnë edhe në Evropë. Italia ka një kryeministër të ri po ashtu.

Serbia ka një kryeministër, Aleksandër Vuçiq që është 44 vjeçar. Edi Rama, kryeministër i Shqipërisë është 49 vjeçar. Zoran Milanoviq i Kroacisë është 48 vjeç. Nikola Gruevski i Maqedonisë është 43 vjeçar. E Milo Gjukanoviq është aktualisht kryeministri më i vjetër në Ballkan, malazezi ka 52 vjet, transmeton indeksonline.

Italia ka zgjedhur për kryeministër një 39 vjeçar, Matteo Renzi. Edhe Anglia ka një kryeministër të ri. David Cameron është 47 vjeçar.

Por cila është mosha e liderëve kosovarë që po kandidojnë për kryetar të Qeverisë. Kreu i PDK-së, Hashim Thaçi tash ka mbushur 46 vjet, Isa Mustafa është 63 vjeç, Ramush Haradinaj 45, Behgjet Pacolli 62, derisa Albin Kurti është më i riu, vetëm 39 vjeç.

Derisa të kryhen zgjedhjet e 8 qershorit, Fatmir Limaj nuk ka obligime që si i akuzuar për korrupsion të shkojë në gjykatë.

Por dy ditë pas tyre, më 10 qershor, është ftuar që në cilësi të të pandehurit të shkojë në gjykatë për të dhënë llogari për akuzat lidhur me punën si ministër i Transportit dhe Telekomunikacionit. Limaj akuzohet për vepra korrupsioni.

Limaj, që më së shumti këtë kohë po premton rrëzimin e Hashim Thaçit, nuk është dëgjuar se ka premtuar luftë kundër korrupsionit gjatë fushatës për zgjedhjet e 8 qershorit. Ai po garon si lider i një subjekti politik të quajtur “Nisma për Kosovën”.

Gazeta ka mësuar se ftesat për gjykim u janë dërguar: Limajt, Nexhat Krasniqit, shef i prokurimit në MTPT, Endrit Shalës, ish-shef i kabinetit të Limajt, si dhe Florim Zukës, pronar i kompanisë “Tali” nga Gjilani./Koha Ditore/

Prokuroria ka kërkuar edhe tre muaj paraburgim për Ukë Rugovën dhe “grupin e tij”. Nëse gjykata aprovon këtë kërkesë, ish-deputeti do të mbetet prapa grilave të paktën deri më 5 gusht 2014.

“Koha Ditore” ka siguruar kërkesën e prokurorit Allen Cunsick me të cilën kërkon vazhdimin e paraburgimit për Rugovën dhe të tjerët.

Në këtë kërkesë zbulohet për herë të parë se miku i Rugovës, Izet Beqiri është i dënuar për krim të organizuar dhe trafikim droge në Itali dhe se autoritetet italiane po shqyrtojnë mundësinë që të nisin negociatat me Kosovën për ekstradimin e tij apo për vuajtjen e dënimit në Kosovë për veprat e kryera atje.

Vendimi rreth kërkesës për vazhdim të masave të sigurisë pritet të merret gjatë javës së ardhshme

Aktiviteti zyrtar i Komunës së Prizrenit për shënimin e Ditës Ndërkombëtare të Fëmijëve të premten është përzier me agjendën e fushatës parazgjedhore të Partisë Demokratike të Kosovës, e cila edhe udhëheq qeverinë komunale, shkruan sot Koha Ditore.

Në kundërshtim me parimet themelore të përcaktuara në Ligjin për Zgjedhjet e Përgjithshme, burimet e institucioneve lokale janë vënë në shërbim të kandidatëve për deputetë të PDK-së.
Madje ftesa për këtë ceremoni është dërguar si nga komuna e Prizrenit ashtu edhe nga Dega e PDK-së.

Në ftesën e dërguar nga Zyra e Protokollit të Komunës së Prizrenit thuhet se manifestimi kushtuar 1 Qershorit – Ditës Ndërkombëtare të Fëmijëve, mbahet nën patronazhin e kryetarit të Komunës së Prizrenit, Ramadan Muja, që organizohet nga Njësia për të Drejtat e Njeriut

Të gjithë pretendentët për Parlamentin e Kosovës po i fërkojnë duart për Prizrenin. Lider të të gjitha subjekteve politike bashkë me kandidatët tjerë për deputet po pinë edhe ujin e “shatërvanit”, duke kujtuar legjendën “nëse pi ujë, do të martohesh këtu” .

Këta e kanë vetëm për katër vitet e ardhshme. Në qendër të qytetit bëhen foto, bile edhe “selfie” me qytetarë, ndërsa më pas i postojnë si “krenari” në profilet e tyre në facebook. Duket “betejë” e ashpër për marrjen e votave, në qendrën e dytë për nga madhësia pas Prishtinës.

Të drejtë vote kanë rreth 156. 500 persona. Kjo i ka joshur edhe më shumë kandidatët të përqendrohen në Prizren, përfshirë lagjet dhe fshatrat.

Liderë nga PDK, LDK, Vetëvendosje!, AAK, Nisma e të parti tjera janë lidhur për Prizrenin. Kandidatët duken shpesh e kudo në qytetin jugor, sa tashmë kanë nisur të bëhen të zakontë për qytetarët, derisa t’ua marrin votat. PDK synon ta ruaj bastionin, të cilin e llogarit si “Jeruslem”, LDK ta riktheje besimin e humbur, AAK dhe Nisma shprehen se punët u shkojnë mirë, ndërsa në Vetëvendosje! thonë se janë më mirë se herët tjera.

Ka qytetarë e hallexhinj, që janë habitur, derisa te dera kanë parë “goxha burrat” e vendit, që kanë ardhur jo për t’ua dëgjuar hallet, por për t’ia kërkuar ‘kokrrat’. Pretenduesit për Parlament, tash janë bërë të afërt, të përshëndesin, ndalen, të flasin, t’i rrahin edhe shpatullat. Në fund fare nuk harrojnë qëllimin, ta tregojnë numrin që mbajnë në listën zgjedhore. Dikë e përshëndesin me ndonjë kredi telefonike 5 euro, e dikujt për selam i çojnë ndonjë pako ‘Marlboro”.

Nga kryeministri në detyrë, Hashim Thaçi, që këtë javë mori kërkesën e mësuesve për “t’i çuar edhe në det”, e funksionarë më të ultë në pozita, që tash janë “nevojtar” pothuajse çdo ditë janë në Prizren. Dikush edhe më shumë, sikur ministri Enver Hoxhaj. Edhe Eqrem Kryeziu i LDK-së në formën e tij po zhvillon fushatën, siç njihet pa lënë anash batutat.

Prizrenin po e do edhe Hajredin Kuçi, Edita Tahiri e Besim Beqaj. Këtu edhe AAK e bëri nominimin e kryetarit Ramush Haradinaj për kryeministër. “Nisma” me Fatmir Limajn e partnerin e tij, Zafir Berishën, janë në “qejf”. Ata më pak po pinë kafe në hotel “Theranda”. Në kërkim të votës duket se i kanë hy në “bark” qytetit e Vrrinit.

Prizrenin për nisje të mbarë e ka zgjedhur edhe lideri i Vetëvendosjes! Ky subjekt pikërisht nga oborri i Lidhjes Shqiptare e ka hapur fushatën, ndërsa lideri i saj Albin Kurti, që kësaj radhe duket se është përqendruar më shumë në Prizren, duke ditur për traditën e prizrenasve dhe pitajkat e famshme, tash në prag të fillimit të muajit të shenjtë mysliman, tha se “do ta bëj Bajram për qytetarë, e Ramazan për pushtetar”/Zeri/

Nisma për Kosovë në Malishevë ka vazhduar fushatën elektorale në fshatin Drenoc.

Në këtë tubim kanë marrë pjesë një numër i madh i simpatizantëve të këtij fshati.

Kryetari i Nismës, Fatmir Limaj tha se Nisma do të dalë fituese me 8 qershor .

“Ne jemi këtu ku jemi, fal juve të dashur qytetar, ju e nisët e ne po e vazhdojmë në gjithë Kosovën”, ka thënë Limaj./PrizrenPress.com/

Kryetari i Partisë Demokratike të Kosovës, Hashim Thaçi duket se po e kopjon kryeministrin e Shqipërisë, Edi Ramën.

Thaçi, kohëve të fundit në fushatën e tij, shihet se mban një byzylyk në dorën e djatthë, ashtu siç e mbante edhe Edi Rama tek sa luftonte për ta marrë postin e kryeministrit shqiptar.

Se a është shenjë për të sjell fat, apo diçka tjetër, mbetet të kuptohet më 8 qershor.Këtu ekziston një dallim ndërmjet Ramës dhe Thaçit. Bylyzyku i Ramës e solli atë nga opozita në krye të ekzekutivit shqiptar, deri sa Thaçi është në krye të ekzekutivit kosovar, duke e kërkuar edhe mandatin e tretë./Indeksonline/