Kryetari i Partisë Demokratike të Kosovës, Hashim Thaçi, sot në mëngjes takoi të gjithë kryetarët e degëve për të biseduar mbi ecurinë e fushatës.

Lideri i PDK-së shprehu mirënjohje për angazhimin dhe punën e mirë që po bëjnë kryetarët e degëve në terren dhe për mobilizimin masiv nëpër lokalitetet e tyre, njofton kumtesa partiake.

Thaçi kërkoi nga ata të marrin të gjitha masat e nevojshme për të organizuar një proces zgjedhor sa më të qetë, rigoroz dhe transparent më 8 qershor.

Në fshatin Carrallukë të Komunës së Malishevës, me iniciativë të veteranëve të luftës së Ushtrisë Çlirimtare të Kosovës nga fshatrat Carrallukë, Tërpezë e Ulët dhe Shkarashnik, është ndarë një pjesë e veçantë e varrezave, për veteranët e luftës, si dhe sot, është ngritur një memorial, për këto varreza.

Në ceremoninë e zbulimit të memorialit, përveç veteranëve të luftës, morën pjesë edhe Kryetari i Komunës së Malishevës,Ragip Begaj, me bashkëpunëtor dhe pjesëmarrës të shumtë, për nderuar veprën e veteranëve të luftës së UÇK-së.

“Kjo është një ditë e shenjtë, për njerëzit që kanë pasur vizion dhe ju kanë prirë proceseve për në luftën për lirinë e vendit. Kjo vepër e juaja, le të jetë një mësim edhe për vendet tjera, pasi veteranët e luftës, meritojnë respekt, meritojnë përkujdesje të veçantë dhe duhet të çmohet vepra e tyre. Ky memorial, do të jetë një mësim, një histori për gjeneratat e reja”, tha mes tjerash kryetari Begaj, në fjalën e rastit.

“UÇK bëri luftë të shenjtë për lirin e popullit shqiptar të Kosovës dhe ky memorial është respekt për veprën e veteranëve të luftës”, tha Habib Zogaj, në emër të shoqatave të dala nga lufta e UÇK-së në Malishevë.

Ndërsa prof.Dr. Ramiz Hoti, në emër të veteranëve të luftës së fshatrave Carrallukë, Shkarashnik dhe Tërpezë e Ulët, foli për idenë e ndarjes së një pjese të varrezave për veteranët e luftës së UÇK-së dhe për ngritjen e memorialit për varrezat e veteranëve të luftës së UÇK-së.

Zbulimin e memorialit e bënë, Kryetari i Malishevës, Ragip Begaj, pastaj kryetari i Shoqatës së Veteranëve ë Luftës së UÇK-së, dega në Malishevë, Enver J. Hoti dhe veterani i luftës së UÇK-së, Hazir Thaçi./PrizrenPress.com/

Partia Konservatore e Kosovës ka mbajtur një takim me strukturat e saja duke u përqendruar në fushatën elektorale dhe aktivitetet e ardhshme të planifikuara deri në ditën e zgjedhjeve.

Në këtë mbledhje janë analizuar aktivitetet elektorale të deritanishme në 3 ditët e para të fushatës si dhe kryesia e partisë ka kërkuar mobilizimin e aktivistëve, anëtarëve dhe simpatizantëve të saj si dhe ka dhënë instruksione se si të veprohet deri në përfundimin e fushatës elektorale.

“Partia Konservatore e Kosovës konsideron se fushata elektorale për zgjedhjet parlamentare është duke rrjedhur në bazë të aktiviteteve të planifikuara në një atmosferë të qetë, në frymën demokratike dhe pa probleme serioze”, thuhet në komunikatën për shtyp të PK-së.
“Me formimin e shtabit zgjedhor është hartuar edhe strategjia e veprimit si dhe plani veprues gjatë fushatës elektorale. Ky shtab ka formuar edhe komisionet profesionale të cilët merren me aktivitetet e shumta organizative”

“ Në kuadër të kësaj, Partia Konservatore e Kosovës është duke mbajtur takime të vazhdueshme me strukturat partiake dhe elektoratin e saj”

“Shtabi zgjedhor i Partisë Konservatore të Kosovës në kuadër të partnerëve të koalicionit dhe shtabeve të tyre zgjedhore në mënyrë të koordinuar vepron në arritjen e fitores së përbashkët dhe qeverisjen e ardhshme të vendit”.

“Partia Konservatore e Kosovës duke u bazuar në programin partiak, bashkëpunimin me partnerët e koalicionit, misionin e ri dhe fondin për punësim angazhohet edhe për përmirësimin e politikës agroindustriale dhe zhvillimin rural si interes strategjik kombëtar dhe mundësinë për krijimin e vendeve të reja të punës, zhvillimin simetrik ekonomik dhe uljen e deficitit tregtar, inkurajon zhvillimin e ndërmarrjeve të vogla, të mesme dhe të mëdha, lehtësitë doganore, stimulon politikat eksportuese sidomos në fushat ku vendi ynë ka potencial si në industrinë bujqësore, ushqimore, metalurgjike, përpunimin e drurit dhe zhvillimin e turizmit në përgjithësi”/PrizrenPress.com/

Nisma për Kosovë ka marrë mbështetje të fuqishëm në në lagjen “11 Marsi” në Prizren. Qindra qytetar kanë marrë pjesë në tubimin që Nisma bashkë me Bashkimin Demokratik kanë mbajtur në këtë lagje.

Në këtë tubim kanë marrë pjesë të gjithë kandidatët për deputet që garojnë për zgjedhjet e 8 qershorit në kuadër të Nismës për Kosovën.

Kandidati për deputet Sinan Aliaj tha se Nisma për Kosovë do të jetë zëri i qytetarëve në Kuvendin e Kosovës.

“Ne këtu nuk kemi cka të flasim shumë, sepse prezenca e juaj tregon se Nisma për Kosovë është shpresa e vetme për Prizrenin dhe Kosovën”, tha Aliaj. Ai i ka ftuar qytetarët e kësaj lagjeje që me 8 qershor të dalin në zgjedhje dhe të votojnë Nismën për Kosovë.
Edhe kandidati Sejdullah Hoxha tha se Prizreni ka më së shumti arsye pse të votojë Nismën për Kosovë.

“Nisma në Prizren në zgjedhjet e 8 qershorit do të dalë fituese, ashtu sic do të dalë në nivel të Kosovës”.

Ndërkaq, Zafir Berisha tha se në këto zgjedhje Prizreni po tregon se sa është i gatshëm për ndryshimin e madh që do t’i vijë më 8 qershor.

” Prizreni me 8 qershor do ta jap testin për një qeverisje të mirë, e cila ka kohë që i mungon këtij qyteti dhe jo vetëm Prizrenit, por edhe tërë Kosovës”

” Me ardhjen në pushtet të Hashim Thacit Kosovës iu instalua një qeveri e korrupsionit, qeveri e bandave, qeveri e keqpërdorimit të pronës publike ku cdo ditë e më shumë po e ngulfasin ekonominë e këtij vendi për interesa të tyre personale”./PrizrenPress.com/

Drejtori i Fondacionit “Rockfeller Brothers” për Ballkanin Perëndimor, Haki Abazi në një bisedë për Gazetën Blic ka thënë se PDK-ja do t’i humbë këto zgjedhje. Sipas tij, Qeveria e ardhshme e Kosovës do të jetë pa PDK-në, e cila sipas tij do të shkoj në opozitë.

Sipas Abazit, rritje në këto zgjedhje do të kenë LDK-ja dhe Vetëvendosje, derisa thotë se befasia e zgjedhjeve do të jetë Nisma për Kosovën. Ai thotë Aleanca Kosova e Re nuk do ta kaloj pragun.
Sipas tij, partia e Pacolli më tepër është parti private dhe e interesave. Ai thotë se deri më tani AAK-ja është ajo që e ka fushatën më të mirë dhe më konkrete nga të gjitha partitë tjera.
Zgjedhjet referendum për Kosovën

“Zgjedhjet në Kosovë janë referendum për drejtësi apo thellim i imazhit të keq, ky është një udhëkryq i madh”, ka thënë Abazi.
Ai ka thënë se janë disa faktorë të patejkalueshëm në paraanalizën e fushatës.
Abazi i ka quajtur këto zgjedhje si të zorit dhe jo të radhës. “Është hera e dytë që PDK nuk po arrin të përfundojë mandatin”, tha ai.

“Zgjedhjet po mbahen pas kalimit të Ligjit për amnisti, pa ligjin për FSK, pas vendimit për Gjykatë Speciale, vetëm për Kosovën, pa liberalizim të vizave, me një draft MSA gjysmake të pa ratifikuar nga anëtarët e BE-së, pa njohje të reja, dhe pas marrëveshjeve të pazbatuara të arritur ndërmjet Thaçit dhe Beogradit, duke degraduar nga një shtet që ka shpallur pavarësinë në nivelin e negociatave që dikur kishte tentuar që t’i zhvillonte organizata Shen Egidio”, ka theksuar ndër të tjera Abazi.

Negociatat me Serbinë me atë Kushtetutë, na kthyen prapa

Drejtori i Fondacionit “Rockfeller Brothers” thotë se formulimi Beograd- Prishtinë dhe fillimi i negociatave të Serbisë me EU me Kushtetutë ku përfshihet Kosova si pjesë integrale është dështim dhe kthim mbrapa në histori, sidomos pas opinionit të Gjykatës Ndërkombëtare të Drejtësisë.
Ai shton se nga ky proces krejtësisht jokushtetues dhe joshtetformues, Kosova përballet jo vetëm me institucione të kapura dhe jofunksionale por edhe me një ekonomi të degraduar dhe me më pak kontroll ndaj resurseve të veta.

Në anën tjetër, sipas tij, zgjedhjet e javës së kaluar për Parlamentin Evropian dhe fitorja e euroskeptikëve ka rritur edhe më shumë pengesat për integrim dhe po vështirëson edhe më shumë arritjen e konsensusit evropian për integrime dhe angazhim të përbashkët.
“Dmth degradimi i shtetit ka bërë që të humbet shansi dhe koha e volitshme për progres të agjendës zhvillimore evropiane. Në këto zgjedhje po hyjmë me humbësin e qartë për gabimet dhe dështimet e bëra edhe ne planin e brendshëm dhe atë të jashtëm”, tha Abazi.

PDK po bënë fushatë të gërditshme

PDK siç thotë ai është bartëse e përgjegjësisë, sepse ka qeverisur bashkë me AKR-në dhe kanë shkatërruar premisat e konsensusit nacional për interesa strategjike.
“Kjo së bashku me dështimet e të dy mandateve të papërfunduara, premtimet e pambajtura e bëjnë planin e PDK-së zhurmë neveritëse dhe luksin e propaganda në televizione dhe kamioneta me ekrane digjitale, një fushatë që të bënë të gërditësh kur ke valë të varfërisë ekstreme, ikje dhe tentim për të migruar në Evropë dhe një sistem destimulues për investime. Natyrisht që sa më shumë që PDK bënë propagandë nga niveli i luksit, popullata e varfër do i mbyll sytë dhe veshët për të mos parë dhe dëgjuar refrenet e shtatë viteve të fundit”, ka thënë Abazi.
Nisma do të jetë sensacioni i zgjedhjeve

Ai ka vlerësuar që sensacion do të jetë NISMA. “NISMA do të jetë sensacion. Jo për përqindjen e lartë, por për mobilizimin e madh që kryesisht janë votues të PDK-së”, ka thënë ai.
Abazi ka paralajmëruar se Lista Serbe e dirigjuar nga Beogradi do të jetë sfidë e madhe edhe pse e heshtur tani, ajo prezanton një trup elektoral të radhitur dhe që përfundimisht shfrytëzon rastin për krijimin e një Republika Srpska të decentralizuar.

LDK VV në garë të ngushtë si në Prishtinë!
Haki Abazi ka thënë se LDK dhe VV janë në rritje të baraspeshuar dhe në anën tjetër në disproporcion sa i përket formës. Sipas tij, votuesit e LDK-së po zgjohen duke i dalë në përkrahje organizimit të LDK, por jo edhe si lidership. Ndërsa votuesit e VV-së, siç thotë ai kryesisht janë të përqendruar te lidershipi i Albin Kurtit, për shkak të besimit të madh dhe konsistencës në qëndrime dhe parime. Mendoj që do të jete një gare e ngushtë ndërmjet LDK-së dhe VV-së, njëjte sikur në rastin e Prishtinës,shkruan Gazeta Blic.

AAK po e bënë fushatë konkrete
Drejtori i Fondacionit “Rockfeller Brothers”, Haki Abazi thotë se AAK edhe pse e hendikepuar nga pozicionimi i liderit për t’u angazhuar si kryeministër pas kthimit nga Haga, si duket ka marrë mësimin nga zgjedhjet lokale dhe po bënë fushatë të fokusuar me qëndrime të qarta dhe premtime konkrete. “Sigurisht që në një moment do të kërkohet e gjithë formula e rritjeve dhe burimi i fondeve për rritjet e premtuara. Porm AAK mund të jetë befasi si në kohen kur ka qenë element i domosdoshëm për krijimin e qeverisë”, tha ai.

Zyrtarët e lartë të subjekteve politike kanë deklaruar se e vetmja parti me të cilën nuk pranojnë të hyjnë në koalicion pas 8 qershorit është PDK-ja.

Në anën tjetër PDK-ja dhe AKR-ja ende nuk kanë vija të kuqe për asnjë subjekt politik për marrëveshje koalicioni për formimin e institucioneve pas 8 qershorit. /Zëri/

Ministri në detyrë i Diasporës dhe bartësi i listës së AKR-së për zgjedhjet e 8 qershorit, Ibrahim Makolli, ka thënë se subjekti që i takon në këto zgjedhjet do ta kthejë fuqinë politike që e kishte në vitin 2007. Gjatë një interviste për gazetën Tribuna, Makolli është shprehur i bindur se AKR nuk ka qenë kurrë me e bashkuar, ndërsa fuqia e saj, sipas tij, do të shihet më 9 qershor.

“AKR do të jetë në Kuvendin e Kosovës, madje do të jetë fuqishëm. Synimi ynë është që ta rikthejmë fuqinë politike që e kemi pasur që e kishim në vitin 2007, me tendenca që kjo fuqi të rritet. Ne i respektojmë sondazhet që zhvillohen pasi është veprim që bëhet në gjitha shtetet e zhvilluara në kohën e zgjedhjeve, por praktikat kanë treguar që këto sondazhe shumë pakë herë janë treguar të sakta në praktikë dhe kjo dëshmohet në zgjedhjet e fundit lokale”, ka thënë Makolli.

Ai në këtë intervistë ka akuzuar partitë për vjedhje të ideve, ndërsa njëra nga to, sipas tij, ka qenë themelimi i Fondit Zhvillimor. “Ju mund ta shikoni programin zgjedhor të vitit 2007 dhe do ta gjeni në të pikërisht formën se si në atë kohë ne e kishim planifikuar themelimin e një Fondi Zhvillimor për Kosovën dhe fondi për gjeneratat e reja i cili do të ishte garant pastaj për një zhvillim”, ka thënë më tej Makolli. Ministri në detyrë e pranon se pavarësisht që kryeson me listën e AKR-së, nuk pret të jetë njeriu më i votuar. “Unë nuk e kam menduar asnjëherë, dhe nuk është shumë më rëndësi se cili nga kandidatët do të jetë më i votuari në listë. Unë besoj që Z. Pacolli do të jetë më i votuari brenda listës së AKR-së, por sidoqoftë angazhimin ynë si subjekt është që të kemi përqindje që garanton vend për zbatimin e programit tonë në tërësi”, ka deklaruar ai.

Tribuna: Si po shkon fushata për AKR-në në këto tri ditët e para të fillimit të saj?
Makolli: Në bazë të asaj që tashmë po shohim gjatë këtyre tre ditëve të fushatës, mund të them që është duke u zhvilluar sipas planifikimeve tona dhe natyrisht duke pas parasysh angazhimet jo vetëm tonat por të gjitha subjekteve politike, që në mënyrën sa më të suksesshme ta ofrojmë ofertën tonë programore para qytetarëve të Kosovës. Nuk është shënuar asnjë problem i kurrfarë natyre që të bën të besosh që kjo fushatë zgjedhore në përgjithësi do të zhvillohet në pajtim me standardet ndërkombëtare, por po ashtu edhe nevojën që kemi ne si vend.

Tribuna: Nga vizita që po i bëni nëpër komuna, po gjeni përkrahje nga elektorati?
Makolli: Nga ajo që vërej është që ka një interesim të qytetarëve jo vetëm të anëtarëve dhe simpatizantëve të AKR-së, por të qytetarëve të moshave e shtresave të ndryshme që dëgjojnë programin e AKR-së dhe në këtë kuadër e them se çdo ditë numri i atyre të cilët po bëhen pjesë e këtij vizioni është më i madh.

Tribuna: Z. Makolli çka jeni duke i ofruar ju elektoratit për katër vitet e ardhshme?
Makolli: Ne jemi fokusuar në disa shtylla të cilat konsiderojmë se duhet të kemi prioritet ose të jenë në top-prioritet të qeverisjes katërvjeçare. Në radhë të parë zhvillimi ekonomik i vendit që nënkupton ngritjen e mirëqenies së qytetarëve dhe hapjen e vendeve të punës. Së dyti shteti ligjor aty ku ne si vend kemi nevojë për ta vendosur shtetin e së drejtës ku secili qytetar është i barabartë para ligjit, një luftë të pakompromis ndaj korrupsioni dhe dukurive negative, një sistem shëndetësor të qasshëm për të gjithë, arsim cilësor në pajtim me nevojat e vendit, dhe në fushat e tjera që kanë të bëjnë drejtpërdrejt me përmirësimin e mirëqenies së qytetarëve.

Tribuna: Në këtë fillim fushatë kemi parë deklarata nga zyrtarë të subjektit tuaj që akuzojnë partitë tjera për kopjim të programit ekonomik. Kush çka ju ka kopjuar?
Makolli: Po e them me përgjegjësi të plotë, duke u nisur nga programi për sektorin e bujqësisë të cilin tashmë e kanë përqafuar pothuajse të gjitha partitë politike e të cilat para shtat vjetëve konkretisht në zgjedhjet e vitit 2007, kur ne kemi theksuar se zhvillimi i sektorit të agrikulturës do të jetë një mbështetje e madhe për zhvillimin ekonomik të vendit dhe në atë kohë patën deklaruar dhe ofruar projekte përmes të cilave garantohej punësimi i rreth 70 mijë njerëzve në këtë sektor. Atëherë u patëm akuzuar nga partitë politike se AKR dhe Pacolli po duan ta shndërrojnë ose t’i bëjnë gjithë të rinjtë e Kosovës bujq. Por tash pas shtatë vjetëve shumica e partive politike zhvillimin e sektorit e agrikulturës e kanë gati prioritet dhe po ashtu të njëjta premtojnë tashmë vende punë të cilat do të sigurohesh me zhvillimin e këtij sektori. Pavarësisht se subjektet tjera kanë mund të marrin të dhëna nga programi ynë, nuk e besoj se do të mund ta zbatojnë një gjë të tillë në praktikë duke pasur parasysh kompleksitetin që ka dhe përvojën që e kërkon. Ne po ashtu në atë kohë pra në vitin 2007, e patëm theksuar nevojën e krijimit të një Fondi Zhvillimor, sikurse edhe fondin për gjeneratat e reja i cili po ashtu u pat përqeshur nga partitë tjera që iu dukej si diçka e parealizueshme, ndërsa shumica sot e premtojnë një gjë të tillë.

Tribuna: Z. Makolli po thoni që Fondi Zhvillimor ka qenë ide e juaja?
Makolli: Ju mund ta shikoni programin zgjedhor të vitit 2007 dhe do ta gjeni në të pikërisht formën se si në atë kohë ne e kishim planifikuar themelimin e një Fondi Zhvillimor për Kosovën dhe fondi për gjeneratat e reja i cili do të ishte garant pastaj për një zhvillim.

Tribuna: Do të flasim tash edhe për gjendjen në partinë tuaj, shumë sondazhe të publikuara nuk ju nxjerrin mirë me rezultat. Disa ju shohin si pjesë të Parlamentit të ardhshëm, ndërsa ju shohin jashtë. Do të jetë AKR pjesë e legjislaturës së pestë?
Makolli: AKR do të jetë në Kuvendin e Kosovës, madje do të jetë fuqishëm. Synimi ynë është që të rikthejmë fuqinë politike që e kemi pasur që e kishim në vitin 2007, me tendenca që kjo fuqi të rritet. Ne i respektojmë sondazhet që zhvillohen, pasi është veprim që bëhet në të gjitha shtetet e zhvilluara në kohën e zgjedhjeve, por praktikat kanë treguar që këto sondazhe shumë pakë herë janë të treguar të sakta në praktik dhe kjo dëshmohet në zgjedhjet e fundit lokale.

Tribuna: Do të thotë pretendoni t’i fitoni 15 mandate?
Makolli: Unë jam i bindur shumë që AKR është rikthyer në fuqinë politike të vitit 2007 dhe besojmë që ditëve të ardhshme kjo fuqi politike do të shënojë rritje. Megjithatë, ne presim datën 8 qershor për ta parë se cila është forca dhe se si e kanë vlerësuar qytetarët e Kosovës secilin subjektet veç e veç.

Tribuna: Kemi parë në të kaluarën z. Makolli se figurat që kanë aderuar në AKR, largoheshin pas disa kohësh nga subjekti i juaj. Edhe këtë radhë ju keni sjellë disa personalitete në parti, keni frikë se mund të përsëriten skenarë të njëjtë?
Makolli: Anëtarësimi në një subjekt politik dhe largimi prej saj është e drejtë demokratike e secilit. Ne si subjekt politik kemi pësuar drejtpërdrejt nga këto veprime. Por kjo nuk ka ndodhur vetëm me ne pasi nëse e shikoni betimin e deputetëve dhe në fund kanë lëvizur. Është e vërtetë që në AKR ka pasur ardhje muajve të fundit, një pjesë mjaft e madhe e tyre janë edhe në lista zgjedhore. Dua të besoj se e secili prej tyre do të vazhdojë jo vetëm ta mbajë fanellën e AKR-së në Kuvend, por tashmë janë pjesë përbërëse e AKR-së dhe do të vazhdojnë të jenë në të ardhmen. Për këtë jam i bindur sepse i njoh këto personalitete.

Tribuna: Ju jen bartësi i listës për zgjedhjet e 8 qershorit. Pretendoni të dilni njeriu më i votuar në parti?
Makolli: Në këto zgjedhje pak vlen bartësi i listës sepse secili deputet e kandidat duhet të votohet për të fituar mandat në Kuvend. Unë nuk e kam menduar asnjëherë, dhe nuk është shumë më rëndësi secili nga kandidatët do të jetë më i votuari në listë. Unë besoj që z. Pacolli do të jetë më i votuari brenda listës së AKR-së, por sidoqoftë angazhimin ynë si subjekt është që të kemi përqindje që garanton vend për zbatimin e programit tonë në tërësi.