Bashkimi Europian ka dalë edhe zyrtarisht me një qëndrim i cili kundërshton deklarimet se rasti i Gadishullit ukrainas të Krimes, është rast i njëjtë me Kosovën.

Zëdhënësi i BE’së Alejandro Munoz, u ka thënë gazetarëve në Bruksel se situata në Krime nuk mund të krahasohet me atë të Kosovës.

Kjo deklaratë e tij, vije në kohën kur zyrtar të lartë të Moskës së bashku me Presidentin e Rusisë, Vladimir Putin, e kanë krahasuar situatën në Krime me atë të Kosovës.

Mirëpo, Munoz tha se nuk mund të jetë i njëjtë ndërhyrja e NATO’së në Kosovë me atë të ushtrisë ruse.

“Nuk ka asgjë të përbashkët në mes të Krimesë dhe Kosovës”.

Ditë më parë, presidenti rus, Vladimir Putin, kishte thënë se populli rusë në Krime ka të drejtë të vendosë për të ardhmen e tyre, ashtu siç kishte bërë populli i Kosovës.

Kuvendi i Komunës së Malishevës, ka mbajtur të premten seancë solemne, në kuadër të shënimit të manifestimit “Epopeja e UÇK”-së.
Përveç anëtarëve të KK-së në këtë seancë,kanë marrë pjesë edhe kryetari i Malishevës, Ragip Begaj, deputetët e Kuvendit të Kosovës nga Malisheva,Salih Morina dhe Haxhi Shala, si dhe një delegacion nga Bashkësia Islame e Ksovës.

Në këtë seancë, u vlerësua lartë sakrifica e Komandantit Legjendar Adem Jashari dhe familjes Jashari, të cilët u sakrifikuan në marsin e vitit 1998, më 5,6 dhe 7 mars, sakrificë e cila lëshoi kushtrimin e Jasharëve, për t’u bashkuar në luftë për lirinë e popullit shqiptar. Për nderë të kësaj sakrifice, shënohet edhe manifestimi i Epopeja e lavdishme e Ushtrisë Çlirimtare të Kosovës.

“Për herë të parë në historinë tonë, pas Skënderbeut, populli shqiptar, ku do që ishte, ju përgjigj kushtrimit të Adem Jasharit në luftën për liri. Epopeja, ishte vala përfundimtare për çlirimin e vendit, andaj edhe të gjithë shqiptarët ju bashkuan thirrjes së Adem Jasharit”, tha kryesuesi i KK të Malishevës, Enver Hoti.

Ndërsa Reshat Mexhidi, nga kryesia e Bashkësisë Islame të Kosovës, tha se “marsi është muaj i shumë datave të rëndësishme për popullin shqiptar, duke filluar nga Epopeja e UÇK-së, për të vazhduar me Ditën e mësuesit, Ditën e nënave dhe për të përfunduar me marsin e përgjakshëm të demonstratave të vitit 1981”.

Edhe kryetari Ragip Begaj, ka vlerësuar lartë figurën e Komandantit Legjendar, Adem Jashari .

“Edhe sivjet, në 16 vjetorin e Epopesë së Lavdishme të UÇK-së, po përkujtojmë rënien heroike të komandantit legjendar Adem Jashari, të familjes Jashari dhe të mijëra dëshmorëve të cilët iu kundërvunë armikut të përbetuar serb, për të mbetur përjetësisht në panteonin e pavdekësisë”

“Okupimi serb në Kosovë, kishte arritur kulmin dhe populli shqiptar, filloi që të ndryshoj rezistencën e tij, pasi organizimi ushtarak kishte mbetur mënyra e vetme që ne ta fitojmë lirinë. Si rezultat i të gjitha ngjarjeve të deri atëhershme, u formua Ushtria Çlirimtare e Kosovës, me në krye komandantin Adem Jashari”,tha Begaj.

“Formimi i UÇK-së, sigurisht që e frikësonte shtetin serb, pasi e dinte se nga kjo formë e rezistencës shqiptare, do ta humbte kontrollin e saj mbi Kosovën. Për ta shuar këtë rezistencë, mes shumë formave që kishte përdorur regjimi serb, mendonte se kapja e kreut të UÇK-së, do ti shuante përpjekjet tona për liri dhe pavarësi”,tha Begaj. /PrizrenPress.com/

Kryetari i Komunës së Rahovecit, Idriz Vehapi, ka uruar të gjithë mësimdhënësit me rastin e 7 Marsit – Ditës së Mësuesit.

“7 marsi është dita e Mësuesit dhe shfrytëzoj rastin që të gjithë atyre që në çfarëdo mënyre janë të lidhur me procesin edukativo – arsimor të ua uroj këtë ditë.”

“Se uroj që në të ardhmen mësimëdhënësit të mbesin krenaria jonë”. Urime 7 marsi”. thuhet në urimin e Kryetarit Vehapi.

Pasi ka kaluar më shumë se dyfishi i kohës sa parashihej të jetë dënimi maksimal për arsimtarët e Malishevës të akuzuar për blerje diplomash në ish-Shkollën e Lartë petagoxhike “Bajram Curri” në Gjakovë, gjykata ka vendosur të hedhë poshtë akuzën dhe të pushojë ndjekjen penale ndaj tyre. Ky vendim është marrë nga Gjykata Themelore në Gjakovë.

Bashkë me 84 arsimtarët e Malishevës që zyrtarisht akuzoheshin për dhënie ryshfeti dhe falsifikim të dokumenteve zyrtar,procedura penale është pushuar edhe ndaj ish-zyrtarëve të SHLP-së, “Bajram Curri”,Neki Myha dhe Nijazi Xheravina, të cilët akuzoheshin për shpërdorim të detyrës zyrtare .

Drejtori i Arsimit në Malishevë,Blerim Thaçi, ndërkaq ka thënë për Koha Ditore, se ende nuk ka një lajm zyrtar rreth kësaj çështje.

Partitë e komuniteteve të përfaqësuara në Kuvendin e Komunës së Prizrenit janë duke zhvilluar betejë të ashpër për të siguruar postin e nënkryetarit për komunitete. Përfaqësuesit e KDTP-së, VAKAT-it dhe NDS-it theksojnë se kjo pozitë u takon partive të tyre në bazë të marrëveshjeve të koalicionit parazgjedhore me PDK-në.

Kryetarja e NDS-it, Emilija Redzepi ka theksuar se ky subjekt boshnjak në bashkëpunim me KTAP-në turke synon të marrë postin e nënkryetarit për komunitete meqë për këtë ekziston një marrëveshje me kryeministrin dhe degën e PDK-së në Prizren.

“NDS e KTAP më ka nominuar mua për këtë post. Si pjesëtarë të komunitetit boshnjak e kemi këtë drejtë ngase përbëjmë më shumë se 10 për qind të popullatës në komunën e Prizrenit. Kemi një qëndrim të fortë kundër KDTP-së ngase për vite të tëra, kjo parti e ka pas këtë funksion”, ka thënë Redzepi. Sipas saj, epilogu i kësaj gare do të shihet gjatë votimit në mbledhjen e radhës të KK-së.

Ndërkohë kryetari i degës së KDTP-së në Prizren, Levent Bush ka bërë të ditur se kjo parti turke insiston në postin e nënkryetarit, pasi që është subjekti më i votuar nga radhët e komuniteteve në këtë komunë dhe për këtë ka marrëveshje të nënshkruar me PDK-në.

“KDTP ia ka dërguar kryetarit të komunës së Prizrenit emrin e Ergin Kalës si propozim për nënkryetar të komuniteteve”, ka thënë Bush, duke shprehur bindjen se KK-ja do të votoj për të.

Ndërsa Rasim Demiri nga koalicioni “Vakat” ka theksuar se ky subjekt ka arritur marrëveshje që bashkë me këshilltarin e vetëm të PD-së, Azzam Dida të formoj grupin e këshilltarëve dhe se tashmë e ka emrin e kandidatit për nënkryetar.

“Ne e kemi emrin e kandidatit tonë, por nuk po e bëjmë publik, pasi që koalicioni “Vakat” ka mbetur i hapur për zgjidhje objektive dhe reale të problemit të zgjedhjes së nënkryetarit të komuniteteve. Për këtë kërkojmë marrëveshjen e përbashkët të subjekteve relevante politike, në interes të komunitetit boshnjak në Kosovë”, ka thënë Demiri./Koha Ditore/