Ekspertët e pushtetit lokal e kanë vlerësuar të domosdoshme arritjen e koalicioneve për funksionimin e asambleve komunale gjatë mandatit të ardhshëm katërvjeçar.

Eksperti i pushtetit lokal, Besnik Tahiri, ka thënë të martën për “Epokën e re” se në shumicën e komunave të Republikës së Kosovës është e domosdoshme bashkëqeverisja. “Në vlerësimin e parë në shumicën e komunave do të duhej të kishte bashkëqeverisje në mënyrë që kryetari ta ketë miratimin e asamblesë, apo së paku të shumicës së thjeshtë, ndërsa për ata kryetarë të cilët duan ta ndryshojnë statutin, respektivisht të shtojnë apo t’i zvogëlojnë numrin e departamenteve, do të duhej 2/3 e asamblesë”, ka thënë Tahiri. Në këtë kontekst, ai ka theksuar se deri më tani është treguar se komunat ku ka pasur koalicione kanë funksionuar më mirë. “Qeverisjet në koalicione të përbashkëta në pushtetin lokal zakonisht kanë funksionuar më mirë për shkak se ka pasur një kontroll dhe një balancë në mes të partive. Aty ku ka qenë një parti shumë e fuqishme, realisht partia dhe kryetari i degës e kanë përcaktuar goxha shumë politikën e kryetarit”, ka thënë Tahiri.

Ai ka vlerësuar se mospërfillja e asamblesë komunale nga ana e kryetarit është qeverisje gjysmake. Po ashtu, Tahiri ka thënë se pambështetjen e shumicës së asamblistëve asnjë kryetar komune nuk do të mund ta çojë përpara agjendën zhvillimore. “Nëse një kryetar mendon se mund ta shtyjë agjendën zhvillimore pa miratimin e asamblesë, atëherë ai ose ajo do ta ketë të pamundshme. Kështu që, roli i asamblesë komunale është i pashmangshëm. Prandaj, kryetarët duhet t’i ikin dorës dominuese në mënyrë që të jenë përfaqësues. Për të qenë përfaqësues duhet më pas edhe asamblenë me vete. Mospërfillja e asamblesë është gabim”, ka thënë Tahiri, duke e përmendur me këtë rast problemin e komunës së Prizrenit. “Kemi rastin e kryetarit të Prizrenit, i cili është duke u ballafaquar me gjykatë për shkak se nuk e ka përfillur asamblenë. Pa përfillje të asamblesë qeverisja është gjysmake. Roli i asamblesë është tepër i rëndësishëm në demokraci. Në këtë rast një kryetar nëse nuk bën koalicion nuk mund ta marrë fuqinë e asamblesë”, ka deklaruar Tahiri.

Edhe njohësi i këtyre proceseve nga Instituti Demokratik i Kosovës (KDI), Driton Selmanaj, ka thënë se koalicionet janë të domosdoshme për qeverisjen në nivelin lokal. “Pushteti në demokraci nuk mund të funksionojë ndryshe, përpos parimit të shumicës. Kështu që, edhe në nivel lokal, por edhe në nivel qendror duhet shumica për të marrë vendime, së paku shumica e thjeshtë do të duhej të jetë e domosdoshme. Prandaj, në nivel lokal në të gjitha ato komuna ku nuk kanë arritur të marrin numër të mjaftueshëm të asamblistëve, koalicionet janë të domosdoshme për të marrë vendime”, ka thënë Selmanaj për “Epokën e re”.

Ai ka vlerësuar se për funksionimin e komunave duhet të ketë koalicione zyrtare ose jozyrtare. “Nëse koalicionet zyrtare nuk arrihen atëherë duhet një koalicion i brendshëm me marrëveshje. Në të kundërtën, nuk mund të merren vendime qoftë për miratimin e buxhetit apo edhe vendime për çështje të tjera. Në këtë rast koalicionet zyrtare ose jozyrtare janë të domosdoshme në mënyrë që të ketë funksionalitet të plotë të asamblesë komunale”, ka deklaruar Selmanaj. Në të kundërtën, sipas tij, ka rrezik që pas një periudhe të shkohet në zgjedhje të parakohshme për asamble komunale. “Nëse nuk arrihet të miratohen dokumente të rëndësishme siç është buxheti mund të shkohet tek shpërndarja e asamblesë dhe në zgjedhje të parakohshme për asamble. Prandaj, mendoj se koalicionet janë të domosdoshme, qofshin koalicione zyrtare ose jozyrtare”, ka theksuar Selmanaj.

Ai i ka quajtur të hershme deklaratat e kryetarit të sapozgjedhur të Prishtinës, Shpend Ahmeti, i cili ka thënë se nuk do të bëjë koalicion me asnjë parti. “Deklaratat e tij janë jashtëzakonisht të hershme, sepse kur fillon të ballafaqohet me problemet reale që i ka komuna dhe që mund t’i ketë në procesin e vendimmarrjes, atëherë do ta shohë se realiteti është ndryshe. Prandaj, kemi deklarata të tilla, të cilat i ngjajnë më shumë euforisë së rezultateve sesa udhëheqjes reale me të cilën do të ballafaqohen në të ardhmen brenda komunës”, ka deklaruar Selmanaj.

Lëvizja Vetëvendosje ka theksuar se që prej vitit 1999, Kosovën dhe funksionalitetin e saj e ka mbajtur peng projekti i Serbisë për kontrollimin e serbëve dhe të territoreve ku ata jetojnë. Sipas saj, Serbia gjithnjë e ka shfrytëzuar popullatën serbe brenda Kosovës si instrument për ta realizuar programin e saj shtetëror hegjemonist në funksion të pushtimit të Kosovës, dëbimit, represionit, kolonizimit dhe gjenocidit.

Nënkryetari i Kuvendit të Kosovës, Glauk Konjufca, tha se ashtu siç proklamohej rregullisht, strategjia e qeverive tona dhe faktorëve ndërkombëtarë ndaj këtij problemi pretendonte të kishte për qëllim shkëputjen e ndikimit të fuqishëm të Beogradit te serbët e Kosovës përmes mbështetjes së partive serbe në Kosovë të cilat e pranonin rendin institucional dhe Kushtetutën e shtetit tonë, dhe kështu dalëngadalë t’i lidhnin serbët e Kosovës gjithnjë e më shumë me projektin e shtetndërtimit multietnik të Kosovës.

“Pikërisht për shkak të kësaj strategjie u fuqizuan vazhdimisht partitë të cilat i pranonin ligjet dhe institucionet e Republikës së Kosovës, siç është Partia Liberale Serbe, ndonëse dihet fare mirë se ata refuzuan ta nënshkruajnë deklaratën e pavarësisë si dhe nuk qenë të pranishëm në shpalljen e saj. Kjo gjë megjithatë tregon se lidhja e tyre politike me projektin e Serbisë mbetet e pranishme”, tha Konjufca, duke shtuar se Lista Serbe e krijuar nga Ivica Daçiqi e mori pushtetin në 9 Komuna të Kosovës, duke u bërë kështu e barabartë me LDK-në e cila do të qeverisë me po aq komuna dhe afër PDK-së e cila qeveris me 10 Komuna. “Kryetarët e zgjedhur të këtyre komunave të gjithë janë bërë bashkë dhe njëzëri kanë deklaruar se qëllimi i tyre është ta luftojnë dhe të mos e pranojnë shtetin dhe pavarësinë e Kosovës. Ata po ashtu kanë bërë të ditur se do të veprojnë brenda Kosovës ashtu siç i udhëzon politika e Beogradit”, tha ai.

Konjufca ndër të tjera tha se, pas mbajtjes së raundit të parë të zgjedhjeve lokale më 3 nëntor, strukturat e Serbisë i shkatërruan zgjedhjet në Mitrovicën e veriut ku më vota po udhëhiqte një shqiptar. “Daçiqi doli e tha se nëse në veri zgjedhjet një shqiptar, atëherë do të ketë konflikte të armatosura e të dhunshme. Ai faktikisht na kërcënoi me luftë nëse nuk bëhet siç do Serbia. Qeveria nuk reagoi fare. Tash u mbajtën zgjedhjet tjera dhe atje fitoi njeriu i Daçiqit. Nesër Thaçi vazhdon të takohet me Daçiqin drejt kompromiseve të radhës.

Deputetja Albulena Haxhiu tha se pas formalizimit të marrëveshjes së Brukselit, dhe ratifikimit të kësaj marrëveshje, procesit të legalizimit të strukturave ilegale dhe legalitetit të krijesës së quajtur Asociacioni i Komunave Serbe, i ka paraprirë amnistimi i gjithë bartësve të institucioneve paralele të cilët edhe në ditët e sotme janë duke u financuar nga Serbia, pa u penguar nga Qeveria e Hashim Thaçit.

“Nëse e analizojmë Ligjin për Amnistinë, do të shohim se janë plot 31 lloje të krimeve që sot kanë amnistuar deputetët e Kuvendit, përveç Vetëvendosjes. Në fokus janë amnistia e veprave penale që bien në kategorinë e veprave penale kundër shtetit. Ndonëse kategoria e dytë e veprave penale që përfshijnë amnistinë nga veprat penale që mund të implikohen me veprat penale kundër shtetit, nuk ka asnjë dyshim se të njëjtat ndërlidhen edhe me veprat penale që kanë ngjyrim të krimit të organizuar”, tha Haxhiu.

Ajo shtoi se nga kjo amnisti përfitojnë kriminelët dhe kontrabandistët si të veriut ashtu edhe ata të jugut, që kryesisht janë foleja e krimit të udhëhequr nga qarqet qeveritare.

“Sipas kësaj, amnistia i shërben legalitetit të strukturave paralele, duke e përgatitur këtë strukturë që si pasojë e zhvillimit të procesit zgjedhor, të njëjtën ta formalizojë dhe ta legjitimojë në këtë proces. Ky proces ka përligjur individët për të cilët ekziston dyshimi i bazuar se kanë kryer vepra penale jo vetëm kundër shtetit dhe institucioneve të Kosovës, por të njëjtit kanë kryer edhe veprat penale kundër popullsisë së veriut të Kosovës, si gjatë luftës po ashtu edhe pas luftës. Në raundin e dytë të zgjedhjeve për kryetar të komunave, si p.sh. në Mitrovicë të Veriut kanë qenë Krstmir Pantiq dhe Oliver Ivanoviq, që të dy të involvuar drejtpërsëdrejti në struktura paralele, të involvuar në trazirat e pas luftës me qëllim të dëbimit të popullsisë shqiptare në veri të Mitrovicës, por edhe para luftës si pjesëtar të formacioneve paramilitare serbe. “Zgjedhjet e 3 dhe 17 nëntorit po ashtu edhe të 1 dhjetorit, u kontrolluan nga kriminelë serb, pra kriminelët serb ishin pjesë e procesit zgjedhor. Është folur shumë për shuarjen e strukturave paralele, por në asnjë moment ne nuk kemi qenë dëshmitar të shuarjes të ndonjë institucioni prej nga koha e ratifikimit të marrëveshjes Thaçi-Daçiq, miratimit të Ligjit për Amnistinë dhe së fundmi përfundimit të procesit zgjedhor”, theksoi deputetja Haxhiu.

Sipas VV-së, politikat e Qeverisë aktuale po e çojnë Kosovës drejt ndarjes së vazhdueshme. “Komunat e fituara nga Daçiqi do të lidhen bashkë në Asociacionin e Komunave Serbe. Ky asociacion do të marrë premisa të një qeveria serbe brenda Kosovës e cila përkujdeset dhe merr vendime për territoret e banuara me serbë. Dhe nuk kemi kurrfarë dyshimi që ata do të punojnë për Serbinë dhe jo për Republikën e Kosovës.

Për këtë janë meritorë të gjithë ata deputetë të cilët ditën e 27 qershorit dhe 11 korrikut i thanë po defunksionalizimit të shtetit të Kosovës dhe faljes zemërgjerë të kriminelëve dhe strukturave institucionale paralele të Serbisë. Ne kemi vetëm një detyrë në këtë situatë: Ta ndërrojmë sa më parë këtë parë këtë qeverisje në mënyrë që të shpëtojmë të tashmen dhe të ardhmen”./PrizrenPress.com/

Kuvendi Komunal në Prizren  në katër vitet e ardhshme do të  përbëhet  nga 14 subjekte politike. PDK-ja  do t’i  ketë 10 ulëse, apo 2 më pak se katër vite më parë.

Ajo pasohet nga LDK-ja  që do t’i ketë 9 vende,  apo 2 më pak se në mandidtin e  kaluar.

 Bashkimi Demokratik i Zafir Berishës, ndërkaq do t’i ketë 4 ulëse, ndërsa Lëvizja Vetëvendosje! 3 ulëse.  Po kaq vende do t’i ketë edhe koalicioni  AAK- LDD. Ndërsa KDTP-ja   ka humbër  një këshilltar  dhe do të përfaqësohet me 2 përfaqësues, aq sa do t’i ketë edhe “Vakat” dhe NDS.

Nga një përfaqësues  në KK e prizrenit  do t’i kenë edhe PK, KTAP, AKR CDU,NQP dhe PD./PrizrenPress.com/