Kryeministri i Kosovës, Hashim Thaçi dhe ai i Serbisë, Ivica Daçiq, nesër do të vazhdojnë takimin e radhës në Bruksel, ku do të diskutohet për përshpejtimin e procesit të implementimit të marrëveshjeve.

Këtë e bëri të ditur, kryeministri Thaçi në mbledhjen e djeshme të Qeverisë së Kosovës, ku tha se Kosova këtë të diel kaloi një test jashtëzakonisht të rëndësishëm për të ardhmen e saj evropiane, pasiqë u organizuan zgjedhjet në gjithë territorin e Republikës së Kosovës, për herë të parë edhe në veri.

“Ky është legjitimimi më i fuqishëm edhe qytetar që i ka dhënë marrëveshjes së Prillit, mes shtetit të Kosovës dhe Serbisë, me ndërmjetësimin dhe mbështetjen e fuqishme të BE-së dhe SHBA-ve. Me datën 5 të këtij muaji, do të ndodh takimi tjetër, në Bruksel, për të përshpejtuar procesin e implementimit të marrëveshjeve për funksionimin e Policisë së Kosovës, në gjithë territorin e Kosovës, instalimin e sistemit të drejtësisë, sipas legjislacionit kosovar dhe në atë pjesë të territorit të vendit. Pastaj edhe funksionimi i sistemit doganor dhe çështje tjera”, tha kryeministri.

Kryetari i  Komunës së Prizrenit,  Ramadan Muja, ka marrë pjesë në shënimin e ditës ndërkombëtare për personat me aftësi të kufizuara, i cili është organizuar në qendër të qytetit në “Shatërvan”, me moton “Thyej pengesat, hap dyer për një shoqëri gjithëpërfshirëse për të gjithë”. Muja premtoi se si kryetar i Komunës së Prizrenit, do të angazhohet të ndihmojë këtë kategori të shoqërisë .

Në Kosovë janë rreth 10 përiqnd të qytetarëve me aftësi të kufizuar. Në një konferencë për shtyp të organizuar në “Hendikos”, zyrtarët e kësaj Organizate kanë kërkuar nga qeveria qendrore dhe ajo lokale, që të mos e lejojnë asnjë ndërtim pa përmbushjen e kushteve për lëvizje të personave më aftësi të kufizuara, punësimin e këtyre personave sipas ligjit dhe kanë paraqitur problemet me të cilat ballafaqohet kjo pjesë e shoqërisë sonë./PrizrenPress.com/

Përfaqësues të Kuvendit të Kosovës, të shoqërisë civile e të OSBE-së, si dhe ekspertë nga Letonia dhe Mali i Zi këmbyen pikëpamje dhe përvoja për institucionalizimin dhe kodifikimin e bashkëpunimit ndërmjet shoqërisë civile dhe institucioneve të vendit. Në këtë takim, u prezantua Deklarata për Partneritet në mes të Kuvendit të Kosovës dhe shoqërisë civile.

Në këtë konferencë mbi Partneritetin ndërmjet Kuvendit të Kosovës dhe shoqërisë civile, kryesuesi i Misionit të OSBE-së në Kosovë, Jean-Claude Schlumberge, ka theksuar rëndësinë që ka për demokracinë e një vendi bashkëpunimi ndërmjet institucioneve qendrore, sidomos Parlamentit dhe shoqërisë civile.

Ai ka përmendur, jo vetëm ekspertizën solide që kanë një numër i OJQ-ve, por edhe rolin tepër të rëndësishëm që ka për demokracinë e një vendi transparenca, zbatimi i ligjit dhe llogaridhënia. Ambasadori ka lavdëruar punën që ka bërë grupi punues tripartid për hartimin e Deklaratës për Partneritet në mes të Kuvendit të Kosovës dhe shoqërisë civile, për të cilën është shprehur optimist se do ta miratojnë deputetët e Kuvendit të Kosovës.

Nënkryetari i Kuvendit të Kosovës, Glauk Konjufca, duke u shprehur i bindur se demokracia është e pamundshme dhe e paimagjinueshme pa sektorin aktiv të shoqërisë civile, ka konstatuar se nuk është e rastësishme që, në ato vende ku ka pushtete autoritare dhe diktatura totalitare, shoqëria civile është pothuajse inekzistente, apo në rastin më të mirë, një instrument më shumë në duart e partisë-shtet.

“Në vendet me demokraci të zhvilluar, shoqëria civile luan një rol të pazëvendësueshëm për mbikëqyrjen e punës së institucioneve, garantimin e transparencës, si dhe funksionimin ligjor të institucioneve publike”, ka thënë Konjufca.

Ai tutje ka shtuar se sfidat me të cilat ndeshet demokracia në Kosovë i korrespondojnë problemeve me të cilat përballet shoqëria civile, si: funksionimi ligjor i shtetit, pavarësia e gjyqësorit, korrupsioni në çdo nivel institucional, shërbimet publike, etj.

Nënkryetari i Kuvendit ka shprehur keqardhjen e tij për faktin që bashkëpunimi ndërmjet këtyre dy domeneve të shoqërisë nuk mbështetet mbi rregulla të qarta, por vetëm mbi vullnetin subjektiv arbitrar.

“Fatkeqësisht, kjo marrëdhënie funksionon në formë të mëshirës. Por demokracitë e zhvilluara nuk janë shoqëri të mëshirës, por shoqëri të së drejtës. E kjo na çon në përfundimin se bashkëpunimi mes shoqërisë civile dhe institucioneve politike duhet të kodifikohet”, ka thënë Konjufca.

Sekretari i Kuvendit, Ismet Krasniqi, ka folur për transparencën gjithnjë në rritje të legjislativit të vendit. Ai ka përmendur publikimin e shpejtë të votimit elektronik të deputetëve, regjistrimin e OJQ-ve në ueb-faqen e Kuvendit për pjesëmarrje në mbledhje të komisioneve parlamentare, përgjigjet e rregullta dhe me kohë në pyetjet e shoqërisë civile dhe të qytetarëve për punën e Kuvendit, si dhe punësimin në zyrën e tij të një zyrtareje për bashkëpunim me shoqërinë civile dhe me donatorë.

Anëtari i grupit punues për bashkëpunim ndërmjet Kuvendit dhe shoqërisë civile, deputeti Zenun Pajaziti, ka theksuar se përvojat e tij flasin se ligjet më të mira kanë qenë ato që për hartimin apo amendamentimin e tyre kanë dhënë kontribut ekspertë nga radhët e shoqërisë civile.

Në këtë konference fjalë rasti kanë mbajtur edhe përfaqësues të ndryshëm të OJQ-ve, si: Driton Selmanaj, Burim Ejupi, Arton Demhasa dhe Taulant Hoxha.

Për përvojat e mira nga Mali i Zi dhe Letonia të bashkëpunimit të parlamenteve të vendeve të tyre me shoqërinë civile kanë referuar Ana Novaskoviq dhe Karina Petersone.

Në përfundim të sesionit plenar të paradites është prezantuar Deklarata për partneritet në mes të Kuvendit të Kosovës dhe shoqërisë civile e cila është mirëpritur nga pjesëmarrësit.

Vetëvendosje shpreh shqetësimin për shkallën e lartë të korrupsionit në Kosovë. Transparency International, në raportin e fundit, vë në dukje përshkallëzim të mëtutjeshëm të valës së korrupsionit në Kosovë. Ky raport e vendos Kosovën në vendin e 111 në renditjen e shteteve me probleme të mëdha të korrupsionit. Ky vend i përket zonës së kuqe dhe e rreshton Kosovën krahas vendeve me probleme alarmante të korrupsionit.

Për Lëvizjen Vetëvendosje shtë shqetësues fakti se Republika e Kosovës në mënyrën e qeverisjes gjithnjë e më shumë po identifikohet me shtetet ku vendosja e drejtësisë është në kufijtë e së pamundurës, duke vështirësuar kështu zhvillimin dhe prosperitetin si dhe aspiratën për e shoqërisë për vlerat perëndimore e evropiane.

“Ne e mbajmë përgjegjëse për këtë përhapje katastrofike të praktikave korruptive, Qeverinë e Kosovës. Aferat e shumta të viteve të kaluara në të cilat janë përfshirë zyrtarët më të lartë të kësaj Qeverie jo vetëm që kanë njollosur imazhin e vendit por dhe po e rrënojnë të ardhmen e tij. Paaftësia e Qeverisë së Kosovës që të distancohet nga bartësit e këtyre aferave është tregues se kemi të bëjmë me një Qeveri të kapur nga krimi dhe korrupsioni. Kjo Qeveri nuk është në gjendje ta sfidojë korrupsionin, sepse udhëhiqet nga njerëz te korruptuar. Prandaj, konsiderojmë se kjo Qeveri duhet të bie, në mënyrë që Kosova të filloje të çlirohet nga krimi dhe korrupsioni dhe përgjegjësit t”i përballen me drejtësinë.

Lëvizja Vetëvendosje në muajin tetor të këtij viti ka proceduar në Kuvendin e Kosovës projektligjin ”Për vërtetimin dhe shqyrtimin e pasurisë së pajustifikueshme”.

Vetëvendosje ka në alternativën e vet qeverisëse synimin dhe kërkesën që kuadrit ligjor i duhet shtuar edhe “Ligji Anti-Mafia” dhe “Ligji për mbrojtjen e dëshmitarëve”. Të dy projektligjet planifikojmë t’i dërgojmë në Kuvendin e Kosovës.

Ne i ftojmë qytetarët që të na përkrahin, ndërsa përfaqësuesit në Kuvendin e Kosovës të cilët besojnë tek vënia e drejtësisë, të mbështesin me votë këto nisma në mënyrë që beteja kundër krimit dhe korrupsionit të bëhet e mundshme”, thekson në kumtesë, Vetëvendosje!/PrizrenPress.com/

Ministri i Jashtëm i Kosovës, Enver Hoxhaj, gjatë një interviste speciale për Agjencinë e Lajmeve të Sofjes, Novinite, ka thënë se Evropa nuk është e kompletuar, pa integrimin e plotë të Ballkanit. Hoxhaj po ashtu ka thënë se anëtarësimi i vendeve të Ballkanit në BE, është një rikthim në Evropë, një rikthim në modernitet.

Ai ka folur edhe për rëndësinë e një bashkëpunimi më të afërt ndërmjet vendeve të Ballkanit, veçanërisht në aspektin e lirisë së lëvizjes së qytetarëve, të mirave dhe ideve.

Ministri Hoxhaj ka folur edhe për vizitën në Bullgari dhe takimet me presidentin, kryeministrin dhe homologun bullgar, duke theksuar se qëllimi i vizitës ka qenë hapja e një kapitulli të ri të zhvillimit të mëtutjeshëm të marrëdhënieve bilaterale ekonomike ndërmjet Kosovës dhe Bullgarisë.

Ai ka thënë se gjatë takimeve po ashtu është biseduar për përkrahjen e Bullgarisë në përmbylljen e MSA-së për Kosovës, dhe liberalizimin e vizave për qytetarët e Kosovës, si dhe për zhvillimet në rajon.

Duke folur për angazhimet e institucioneve të Kosovës gjatë gjashtë viteve të pavarësisë, Hoxhaj veçoi fokusimin në ndërtimin dhe konsolidimin e shtetit si dhe në fuqizimin e pozitës ndërkombëtare të Kosovës përmes njohjeve ndërkombëtare dhe anëtarësimit në organizatat ndërkombëtare.

Ministri Hoxhaj ka folur edhe për zgjedhjet e fundit në Kosovë, procesin e normalizimit të marrëdhënieve ndërmjet Republikës së Kosovës dhe Republikës së Serbisë, si dhe ka komentuar zhvillimet në rajon e më gjerë.