Në Bruksel kanë filluar takimet e radhës të grupeve punuese për funksionalizimin e Asociacionit të Komunave dhe zbatimin e marrëveshjes për doganat.

Delegacioni i Republikës së Kosovës udhëhiqet nga zëvendëskryeministrja Edita Tahiri dhe në të marrin pjesë:

Besnik Osmani, Sekretar i Ministrinë e Administrimit të Pushtetit Lokal, Visar Xani, këshilltar politik i Zëvendëskryeministres, Edita Tahiri, Ruzhdi Halili, Drejtor i Zyrës për Planifikim Strategjik në Zyrën e Kryeministrit, Agron Maxhuni, Drejtor i Departamentit Ligjor dhe Monitorimit të Komunave në MAPL, Labinot Hoxha nga Ambasada e Kosovës në Bruksel.

Për zbatimin e marrëveshjes për Doganat: Lulzim Rafuna, Drejtor i Doganve, Gazmir Raci, këshilltar politik i Zëvendës Kryeministres, Edita Tahiri, Bekim Mehmetaj nga Doganat e Kosovës, Fisnik Rexhepi, këshilltar i ministrit të Punëve të Brendshme, si dhe Menderes Ibra, këshilltar politik i ministrit të Financave./PrizrenPress.com/

Kuvendi i Kosovës shumë shpejtë do të pasurohet me fytyra të reja, pasi katër nga deputetët aktualë, tre nga Lidhja Demokratike e Kosovës dhe një nga Partia Demokratike e Kosovës pritet ta dorëzojnë mandatin për të marrë drejtimin e komunave përkatëse ku kanë fituar nga procesi i zgjedhjeve të 3 nëntorit.

Nga 9 deputetë sa kanë qenë në garë nëpër komuna, vetëm katër prej tyre kanë fituar mandatin. Nga LDK-ja, Lutfi Haziri në Gjilan, Imri Ahmeti në Lipjan dhe Sali Asllanaj në Suharekë.

Ndërsa deputeti i PDK-së që do ta lëshojë këtë ulëse është Idriz Vehapi pasi pas një muaji do të marrë drejtim e Komunës së Rahovecit, shkruan “Tribuna”.

Këta të fundit sipas ligjeve në fuqi do të zëvendësohen po ashtu me deputetë meshkuj, konkretisht me ata që janë renditur më poshtë me vota dhe që i bie të jenë në listë të pritjes.

Tre deputetë të rinj të LDK-së do të jenë Agim Ademaj, i cili në zgjedhjet parlamentare të vitit 2010 ka fituar 7 mijë e 53 vota, më pas i dyti do të jetë Hatim Baxhaku i cili ka marr 6 mijë e 887 vota dhe Xhavit Uka me 6 mijë e 472 vota. Ndërsa nga PDK-ja, ai që do ta zëvendësojë Idriz Vehapin do të jetë Haxhi Shala, i cili në zgjedhjet e vitit 2010 ka marr 8 mijë e 474 vota.

Njohësit e rrethanave politike në vend rezultatin e raundit të dytë të zgjedhjeve e shohin si votë pakënaqësie ndaj qeverisjes lokale në çdo komunë. Behxhet Shala dhe Leon Malazogu kanë deklaruar për “Epokën e re” se humbëset më të mëdha në këto zgjedhje janë AAK-ja dhe PDK-ja, kurse fitoren e LDK-së në disa komuna e shohin si rezultat të mospunës së pushtetit aktual.

Rezultatet e balotazhit ishin befasuese. Kështu kanë vlerësuar analistët politikë. Ata kanë thënë se vota e qytetarëve më 1 dhjetor ishte votë pakënaqësie ndaj qeverisjes lokale nëpër komuna.

Behxhet Shala dhe Leon Malazogu kanë deklaruar për “Epokën e re” se humbëset më të mëdha të kësaj gare janë AAK-ja dhe PDK-ja, kurse fitoren e LDK-së në disa komuna e shohin si rezultat të mospunës nga pushteti aktual. Pas këtij procesi zgjedhor problem, sipas tyre, do të jetë integrimi i kandidatëve të listës “Srpska”, e cila ka fituar 9 komuna, kurse është përkrahur nga Beogradi. “Në këto zgjedhje ka pasur rezultate befasuese. Befasia më e madhe ka qenë Mitrovica e jugut, ku ka fituar Agim Bahtiri, i cili ka qenë ‘aucajder’. Befasi ka pasur edhe në Ferizaj dhe në komunat ku ka garuar AAK-ja. Më së shumti janë ndëshkuar AAK-ja dhe PDK-ja, kurse fituese janë LDK-ja, AKR-ja, Shpend Ahmeti dhe Lista ‘Srpska’”, ka thënë analisti Behxhet Shala.

Për humbjen e PDK-së dhe të AAK-së në disa komuna, sipas Shalës, kanë dikuar disa procese. “Krahun e luftës e ka dobësuar shumë edhe ardhja e James Rubinit, i cili ka thënë se krahu i luftës duhet të shkojë në shtëpi. Besoj se ka qenë një sugjerim i qartë se për kënd duhet të votohet apo për kënd nuk duhet të votohet. PDK-në e ka dobësuar shumë largimi i Fatmir Limajt dhe Jakup Krasniqit, si dhe përçarja në shumë degë të PDK-së”, është shprehur ai, duke shtuar se PDK-së tani i është ofruar mundësia të distancohet nga njerëzit të cilët kanë probleme të mëdha me ligjin dhe që e dëmtojnë partinë. Sipas tij, nëse kjo parti i ndërmerr këto veprime dhe u kthehet vlerave që kanë vulosur themelimin, aktivitetin dhe fitoret e saj mund të forcohet.

Në të kundërtën, ai ka thënë se kjo parti mund t’i humbasë edhe zgjedhjet nacionale. Kurse duke folur për AAK-në, Shala ka thënë se kjo parti ka dalë humbëse në këto zgjedhje. “AAK-ja është humbëse absolute në këto zgjedhje. E ruajti pushtetin vetëm në tri qyteza, ndërsa i humbi Gjakovën, Pejën, Therandën dhe Rahovecin. Përkrahja e opozitës, pa kushte si parti opozitare, e ka dëmtuar shumë këtë subjekt politik”, ka thënë Shala. Sa i përket LDK-së, ai ka deklaruar se kjo parti ka fituar më së shumti në këto zgjedhje jo se është shquar për ndonjë punë të hairit, por për shkak të mospunës së PDK-së. Ai ka treguar se Isa Mustafa e ka humbur Prishtinën për shkak të afërsisë së përgjimeve ku është përfolur djali i tij për blerje të votave.

Shala e sheh si problem Listën “Srpska”, e cila e ka përkrahjen edhe nga Serbia. “Rrezik paraqet lista serbe, e cila nuk e njeh shtetin Kosovës dhe e cila do të jetë e ngarkuar në themelimin e bashkësisë së komunave serbe si një trup etnik dhe politik serb brenda Kosovës. Ajo në të ardhmen do t’i nxjerrë shumë telashe Kosovës”, ka thënë Shala.

Telashe me përfaqësuesit e kësaj liste parasheh edhe analisti tjetër, Leon Malazogu. Ai ka treguar për “Epokën e re” se vetëm me presion të Brukselit dhe Beogradit këtyre kandidatëve mund t’u imponohet bashkëpunimi me institucionet e Republikës së Kosovës. “Me vetë faktin që kanë marrë pjesë në zgjedhje, ata do ta pranojnë ligjshmërinë e Kosovës dhe faktin se Kosova është vendi ku ata operojnë. Mund të kemi një periudhë paksa të vështirë të bashkëpunimit, por nëpërmjet Brukselit dhe Beogradit atyre do t’u imponohet një bashkëpunim i afërt me Prishtinën. Mendoj se me kohë kjo do të vijë në vend”, ka deklaruar Malazogu. Sa i përket rezultatit të 1 dhjetorit, ai ka thënë se ky duhet të lexohet si votë e pakënaqësisë ndaj qeverisjes në çdo komunë. Ai ka bërë me dije se kjo pakënaqësi vlen për të gjitha partitë që kanë qeverisur nëpër komuna, duke shtuar se është normale që pakënaqësitë më të mëdha të shprehen ndaj partisë që ka pushtetin. “Mendoj se është një humbje e pjesshme e PDK-së, që është diçka normale për një parti që ka Qeverisë nga viti 2007, pra për gjashtë vjet. Për një parti që e ka hise më të madhe të pushtetit. Është shumë normale që kur qytetarët kanë pakënaqësi ndaj pushtetit atëherë më së shumti reflektohet tek partia në pushtet. Kjo nuk është reflektuar vetëm te PDK-ja. Më së shumti kjo është reflektuar tek AAK-ja”, ka thënë Malazogu.

Në këtë kontekst, ai ka thënë se edhe LDK-ja i ka humbur të gjitha komunat ku ka qeverisur. “Sa i përket LDK-së që këtë herë ka marrë më së shumti komuna, nuk mendoj se kjo ka të bëjë me një elektorat pro LDK-së. Mendoj se kjo më shumë ka të bëjë me faktin se LDK-ja ishte opozitë në shumë komuna. LDK-ja në tri komuna ku ishte në balotazh, e që e mbronte pushtetin si në Prishtinë, Kamenicë dhe Obiliq, e humbi pushtetin”, ka thënë Malazogu, duke shtuar se qytetari u ka bërë me dije të gjitha subjekteve politike se duhet qeverisur më mirë në të mirë të tij. “Në mungesë të alternativave të partitë kryesore, qytetari dëshiron të kërkojë alternativa tjetërkund. Mendoj se sfida kryesore do të jetë që partitë kryesore të arrijnë t’i margjinalizojnë ato grupet të interesit dhe t’i promovojnë kandidatët që janë më reprezentativ, më të rinj dhe më të panjollosur”, ka thënë Malazogu.

Kosova nuk do të hyjë shpejt në zgjedhje nacionale. Mungesa e një reforme zgjedhore, angazhimet e shumta që ka qeveria aktuale në dialogun me Serbinë si dhe rezultati jo i dëshirueshëm i partive politike, kanë bërë që entuziazmi për zgjedhjet e jashtëzakonshme të bjerë.

Kësisoj, kryeministri aktual i Kosovës Hashim Thaçi, do ta vazhdojë mandatin e plotë. Bllokimi i punës së Kuvendit të Kosovës për punën e shitjes së PTK-së dhe miratimin e buxhetit pati krijuar përshtypjen se vendi do të shkonte shpejt në zgjedhje të parakohshme nacionale, por entuziazmi ka rënë edhe te partitë pas rezultatit të marrë në zgjedhjet lokale.

Për angazhimet që duhen kryer para se të shkohet në zgjedhje nacionale, liderëve të partive politike u është tërhequr vërejtja në një takim që kanë pasur para disa ditësh me përfaqësues të ambasadave të huaja në vend,shkruan Tribuna

Sipas të njëjtave burime, atyre aty u është kujtuar se nuk ka gjasa që Kosova të shkojë në zgjedhje nacionale pa e kryer reformën zgjedhore dhe ndërtimet kushtetuese të cilat do t’i definonin ulëset e garantuara për komunitetet pakicë në Kosovë