Sali Asllanaj, kandidat i Lidhjes Demokratike të Kosovës (LDK) për kryetar të komunës së Therandës, është shprehur i bindur se do të fitojë në balotazh përballë kundërkandidatit të AAK-së, Bali Muharremaj.

Asllanaj ka thënë se qytetarët e Therandës do ta votojnë atë më 1 dhjetor. “Do të fitoj bindshëm në raport me kundërkandidatin tim. Fitorja do të jetë 70 me 30 për qind. Kjo do të dëshmohet më 1 dhjetor sepse LDK-ja është e para”, ka deklaruar Asllanaj në një intervistë për “Epokën e re”.

Ai ka bërë me dije se nuk do të bëjë koalicion me asnjë parti politike për raundin e dytë të zgjedhjeve. “Dega e LDK-së në Therandë ka marrë vendim që mos të bëjë koalicion me asnjë parti politike. Ky vendim është përkrahur edhe nga niveli qendror i LDK-së. Për neve koalicion janë qytetarët e Therandës”, është shprehur Asllanaj.

Pavarësisht përjashtimit të koalicioneve partiake, Asllanaj është shprehur i sigurt se në balotazh do të mbështetet nga një pjesë e elektoratit të PDK-së, AAK-së, Lëvizjes Vetëvendosje! dhe Partisë së Drejtësisë. “Jo vetëm që pres përkrahjen e një pjese të elektoratit të PDK-së, por edhe të një pjese të elektoratit të AAK-së. Ata do të votojnë për mua sepse në raundin e parë kanë qenë në lajthitje me propagandë dhe premtime joshëse”, ka thënë Asllanaj, duke kërkuar nga qytetarët e Therandës të dalin sa më masivisht në raundin e dytë të zgjedhjeve

Subjektet politike i kanë intensifikuar përgatitjet e tyre për t’u ballafaquar me njëra-tjetrën në raundin e dytë të zgjedhjeve që do të mbahet më 1 dhjetor. Përfaqësuesit e PDK-së, të LDK-së, të AAK-së, të Vetëvendosje!-s dhe të AKR-së e kanë vlerësuar të mjaftueshme kohëzgjatjen pesëditore të fushatës së balotazhit.

Nënkryetari i Partisë Demokratike Kosovës (PDK), Memli Krasniqi, ka thënë të martën për “Epokën e re” se struktura e kësaj parti është duke punuar për mobilizimin e votës më 1 dhjetor.

“PDK-ja pa dyshim se e ka vazhduar punën e vet përgatitore për raundin e dytë të zgjedhjeve që mbahet më 1 dhjetor. Strukturat tona gjithandej Kosovës janë të mobilizuara dhe janë duke punuar ta mobilizojnë secilën votë brenda potencialit në partneritet me qytetarët dhe me partitë e caktuara që kanë mbetur jashtë garës”, ka thënë Krasniqi, duke shtuar se, varësisht nga komuna në komunë, PDK-ja do të realizojë koalicione për balotazh që, sipas tij, do të jenë në funksion të fitoreve të kandidatëve këtij subjekti politik.

Krasniqi ka thënë se fushata zgjedhore pesëditore do të shërbejë për rikonfirmimin e zotimeve dhe rimobilizimin e qytetarëve.

“Sa i përket kohëzgjatjes së fushatës, mendoj se është e mjaftueshme për faktin se 30 ditë të fushatës së raundit të parë kanë qenë mjaft konsumuese në kuptimin e paraqitjes së vizionit dhe të programit të PDK-së. Kështu që, pesë ditë do të shërbejnë për rikonfirmim të zotimeve tona dhe për rimobilizim të qytetarëve për ta mbështetur vizionin tonë”, ka thënë Krasniqi.

Edhe nënkryetari i Lidhjes Demokratike të Kosovës (LDK), Haki Rugova, ka thënë se kjo parti është e përgatitur për balotazhin e 1 dhjetorit. Ai ka thënë se fushata jozyrtare ka vazhduar që nga 4 nëntori në komunat ku LDK-ja është në balotazh.

“Strukturat janë duke punuar në terren aty ku LDK-ja është në balotazh. Jemi të përgatitur fort dhe do ta vazhdojmë prezantimin e projekteve tona që janë vazhdimësi e fushatës paraprake. Presim që në balotazh të fitojmë shumë komuna të tjera. Fushata zgjedhore nuk është ndal, por në njëfarë forme jozyrtarisht ka vazhduar. Tani edhe pesë ditë fushatë zyrtare për balotazh do të jenë të mjaftueshme”, është shprehur Rugova.

Aleanca për Ardhmërinë e Kosovës (AAK) ka ndërmarrë të gjitha masat për të hyrë sa më e fuqishme në raundin e dytë të zgjedhjeve më 1 dhjetor. Kështu ka thënë nënkryetari i këtij subjekti politik, Ahmet Isufi.

“AAK-ja është e përgatitur për raundin e dytë të zgjedhjeve. Besojmë se do ta fitojmë këtë garë sepse i kemi ndërmarrë të gjitha masat në mënyrë që fitorja të jetë e sigurt. Mendoj se pesë ditë fushatë janë të mjaftueshme për balotazh. Prandaj, elektorati është i përgatitur të dalë në zgjedhje dhe të votojë për atë që mendon se është kandidati i duhur për kryetar komune”, ka thënë Isufi për “Epokën e re”.

Edhe anëtarja e kryesisë së Aleancës Kosova e Re (AKR), Myzejene Selmani, ka thënë se strukturat e kësaj partie nuk janë shkëputur nga elektorati, por kanë vazhduar punën e tyre për balotazhin e 1 dhjetorit.

“Edhe pse ka përfunduar raundi i parë i zgjedhjeve, ndarja nga elektorati nuk ka ndodhur. Pesë ditë të fushatës elektorale besoj se janë të mjaftueshëm dhe kandidatët e AKR-së, si në Gjakovë ashtu edhe në Mitrovicë, do të fitojnë bindshëm pasi ata ofrojnë projekte konkrete për daljen nga kriza në të cilën gjenden këto dy komuna”, ka thënë Selmani “Epoka e re”.

Kurse Dardan Sejdiu nga Lëvizja Vetëvendosje! (VV) ka thënë se kandidati i saj për kryetar të Prishtinës edhe një herë do të dëshmojë se Vetëvendosje! është alternativa e duhur për kryeqytetin. “Fushata e Lëvizjes Vetëvendosje! gjatë balotazhit do të përqendrohet në shpalosjen e mëtutjeshëm të programit tonë në çdo cep të Prishtinës. Më duhet të përkujtoj se Lëvizja Vetëvendosje! e ka alternativën e saj qeverisëse e derivat i saj është alternativa qeverisëse për Prishtinën, e cila ka projektet konkrete për përmirësimin e jetës së qytetarëve të Prishtinës”, është shprehur Sejdiu për “Epokën e re”.

KQZ pritet që të publikojë sot rezultatet përfundimtare të zgjedhjeve të 3 nëntorit për kandidatët për kryetarë komunash.
Kryetarja e KQZ-së, Valdete Daka, ka thënë se të mërkurën ka gjasa të publikohen rezultatet përfundimtare të zgjedhjeve të 3 nëntorit për kandidatët për kryetarë komunash.Komisioni Qendror i Zgjedhjeve të hënën ka marrë vendim që 61 vendvotime të rinumërohen për shkak të parregullsive të evidentuara në zgjedhjet lokale të 3 nëntorit. Daka ka treguar se në këto vendvotime ka pasur mospërputhje në formularin e rezultateve. Por, sipas saj, ende nuk dihet nëse ka pasur manipulime apo gabime teknike në këto vendvotime.

“Pas këtij procesi të rinumërimit për këto vendvotime do të dalim me rezultatet finale. Prandaj, po besoj se të mërkurën do të dalim me rezultate finale për kandidatët për kryetarë komunash. Po ashtu, shumë shpejt do të dalim edhe me rezultatet për kandidatët për asamble komunale”, ka deklaruar Daka.

Vendvotimet të cilat kanë shkuar në rinumërim kryesisht janë nga komuna e Prishtinës, Podujevës, Prizrenit, Ferizajt, Malishevës, Skenderajt, Lipjanit Suharekës dhe komunave të tjera.

Nënkryetari i Partisë Demokratike të Kosovës (PDK), Enver Hoxhaj, ka thënë se, pavarësisht lidhjes së koalicionit në Prizren mes Lidhjes Demokratike të Kosovës dhe Bashkimit Demokratik, fitoren e PDK-së në këtë qytet më 1 dhjetor askush s’mund ta ndalë.

Hoxhaj ka thënë për ‘Epokën e re’ se ky koalicion në mes të LDK-së dhe BD-së në asnjë mënyrë nuk e rrezikon fitoren e PDK-së në qytetin e Prizrenit.

“Në asnjë mënyrë nuk e rrezikon fitoren e PDK-së. Vendimi i qytetarëve është marrë për Ramadan Mujën. Askush s’mund ta ndalë këtë proces të fitores së madhe në Prizren më 1 dhjetor”, ka thënë Hoxhaj.

Pas nënshkrimit që kandidati i LDK-së për kryetar të Prizrenit, Eqrem Kryeziu ka bërë me Zafir Berishën e Bashkimit Demokratik, nënkryetari i LDK-së Sabri Hamiti ka thënë se qendra e mbështet një bashkëpunim të tillë.

Por Hamiti në komentet e tij ka thumbuar kreun e PDK-së Hashim Thaçin i cili javë më parë çoi në Prizren Kryeministrin turk ndërkohë që atje ka marrë edhe mbështetjen e turqve lokalë.

Hamiti ka thënë se bashkëpunimi ndërmjet LDK-së dhe BD-së është për një Prizren shqiptar.

“Është lajm i mirë nëse këto dy subjekte janë marrë vesh. Qendra e përkrah këtë koalicion për sa kohë janë marrë vesh që të bashkëpunojnë për një Prizren shqiptar”, ka thënë Hamiti.