Deputeti i Parlamentit të Kosovës Fatmir Limaj e ka mirëkuptuar vendimin e Bashkimit Demokratik për koalicion me Lidhjen Demokratike të Kosovës në Prizren.
Limaj në një deklaratë ekskluzive për “PrizrenPress” ka theksuar se beson që Zafir Berisha dhe Bashkimi Demokratik, kur e kanë marrë vendim për këtë koalicion kanë pasur parasysh të mirën për Prizrenin.
“E uroj Zafir Berishën për rezultatin e arritur në zgjedhje. Natyrisht, Berisha këtë rezultat e ka arritur në emër të ndryshimit për qeverisje më të mirë për Prizrenin. Prandaj, e mirëkuptoj mikun tim për hapin që ka ndërmarrë. Ai e ka lexuar vullnetin e votuesve të vet për ndryshim. Në fund të fundit, Berisha dhe Bashkimi Demokratik janë ata që e kanë arritur këtë rezultat të respektueshëm në Prizren dhe vendimi është i tyre dhe askujt tjetër. Prandaj, besoj se kur e ka marrë vendimin e ka pas parasysh cila është e mira për Prizrenin”, ka theksuar Limaj për “PrizrenPress”.
Dje, Bashkimi Demokratik dhe Lidhja Demokratike e Kosovës e kanë zyrtarizuar marrëveshjen për koalicion, duke e mbështetur Eqrem Kryeziun për kryetar të Prizrenit. Ata janë shprehur të sigurt se ky koalicion do të dalë fitues me 1 dhjetor. /PrizrenPress.com/