Partia e Drejtësisë në Prizren është takuar me qytetarët e lagjes “Gani Çavdarbasha”, ku shpalosi programin dhe objektivat për zgjedhjet lokale të 3 nëntorit..

Kryetari i Degës së PD-së Azzam Dida, tha se Partia e Drejtësisë në zgjedhjet komunale 2013, do të garojë me kandidatin për kryetar komune dhe 43 kandidatë për Kuvendin Komunal. “Në këtë listë janë të përfshirë shumë emra kompetentë si në aspektin profesional, ashtu edhe në atë moral dhe njerëzor. Vlerat e tyre dhe përkushtimi që të jenë në shërbim të qytetarëve dhe atdhedashuria e tyre, kanë qenë kriteret kryesore për përzgjedhjen e tyre në listën e kandidatëve.Nëse votojmë vlerat tona do t’i dalim zot atyre; dhe nëse ia dalim që të ruajmë vlerat tona, atëherë do të jemi shumë të fuqishëm! “, tha Dida.

Ai tha se ndjehet i nderuar që para opinionit të gjerë do të paraqitet kandidati për kryetar të Komunës, një njeri familjar, humanist, i dashur dhe që është favorit,, Pajtim Kosova. “E paçim ndihmën e Zotit të Madhërishëm dhe na priftë e mbara!”

Kandidati i PD-së për kryetar të Prizrenit Pajtim Kosova, gjatë prezantimit të tij tha se disa nga çështjet kryesore që brengosin popullsinë e Prizrenit. Ai vuri theksin veçanërisht te papunësia e të rinjve dhe sidomos e atyre të shkolluar; te çështja akoma e pazgjidhur e pensionistëve dhe promovimit të turizmit lokal në përgjithësi dhe gjatë muajit të Ramazanit në veçanti.

Osman Krasniqi foli për politikat komunale dhe programin ekonomik dhe zhvillimin ekonomik, i cili është kusht pa të cilin nuk mund të mbijetojë një shoqëri, si dhe një strukturë politike që synon të veprojë në skenën politike, duke u ikur mënyrave tashmë të tejkaluara të planifikimit ekonomik nga një qendër. PD-ja në komunë do të nxisë investime në vendbanime dhe regjione për të mundësuar zhvillim të drejtë ekonomik.

Qemal Mehmeti trajtoi çështjen e kursimeve në ekonominë tonë, duke theksuar kursimin në energjetikë; si dhe shpalosi edhe mënyrën e funksionimit më efikas dhe më ekonomik të trafikut urban në mënyrë të atillë që me uljen e çmimit të biletave të trafikut urban, përdorimi i automjeteve do të ulej ndjeshëm dhe njëkohësisht do të ulej edhe ndotja e ajrit, pasi veturat do të përdoreshin më pak.

Yllka Berisha, kandidate për kuvendin komunal u zotua se do të jetë një zë i fuqishëm i qytetarëve në përgjithësi dhe i personave me aftësi të kufizuar dhe të atyre me nevoja të veçanta në veçanti për të realizuar pjesën më të madhe të nevojave dhe kërkesave të tyre./PrizrenPress.com/

Takimi me qytetarët u mbyll pas një seance diskutimi me pyetje të ndryshme që erdhën nga ana e qytetarëve dhe përfundoi me moton: “Votoni për drejtësi, ruajeni identitetin tuaj kombëtar dhe fetar; me buzëqeshje drejt fitores”

Takimin e hapi kryetari i nëndegës “Gani Çavdarbasha” Sait Llopari, i cili pasi i prezentoi kandidatët e nëndegës për Kuvendin Komunal, në pika të shkurtra paraqiti programin dhe synimet e PD-së.

Isni Kilaj dhe PDK, kanë vazhduar prezantimin e programit në fshatrat Llapqevë e Panorc, për zhvillimin e turizmit, ku planifikohet futja e këtyre vendbanimeve në hartën turistike të Kosovës, pasi ka një trashëgimi me vlera të veçanta, si kullat, por edhe trashëgimia natyrore, siç janë Ujëvarat e Mirushës dhe Shpella e Flladit.

“Qindra hektar, të zonës përreth Ujëvarave të Mirushës, tashmë janë zona të mbrojtura, ndërsa ne, pasi paraprakisht kemi investuar në rregullimin e kullës në Llapqevë dhe kemi bërë hapjen e shpellës së Flladit në Panorc, planifikojmë, ti shtojmë edhe akumulacionin në afërsi të shpellës, duke i bërë kështu, këto dy vendbanime, të hyjnë në hartën turistike të Kosovës, si pika të veçanta, përderisa edhe në programin tonë qeverisës për katër vitet e ardhshme, mbrojtja e ambientit dhe turizmi, janë njëra prej shtyllave kryesore, ku do të orientohet qeverisja katërvjeçare. Jemi orientuar në këto çështje tash, sepse pjesa më e madhe e rregullimit të infrastrukturës, tashmë ka përfunduar, ndërsa prioritet i dytë do të jetë Bujqësia, dhe pika e tretë do jetë Mbrojtja e ambientit dhe Turizmi”, tha Kilaj, para banorëve të Llapqevës dhe Panorcit.

“Infrastruktura, në asnjë mënyrë duk do të mbetet prapa, pasi rrugët në lagje, në tërë komunën tonë, brenda dy viteve do të përfundojnë, ndërsa do të përfundojnë edhe ndërtimi i shkollave në fshatrat e mbetura me shkolla të vjetra, sikur do të rregullohen trotuaret në vendet që kanë më së shumti nevojë dhe përfundimi i kanalizimeve, deri në fund të këtij viti. E gjithë kjo, neve na jep mundësinë, që të investojmë edhe fushën e bujqësisë, dhe do të jemi komuna e vetme në vend, që do të ndaj, brenda katër viteve afër dy milion euro në zhvillimin e bujqësisë”, tha mes tjerash Kilaj, para banorëve të këtyre dy fshatrave./PrizrenPress.com/

Partia Konservatore e Kosovës ka trajnuar 100 vëzhguesit e saj për ditën e zgjedhjeve duke u fokusuar në detyrat, obligimet dhe përgjegjësitë e tyre. Rëndësi të veçantë është dhënë problemeve dhe keqpërdorimeve të evidentuara nga zgjedhjet e kaluara komunale me qëllim që ato të mos përsëriten më.

Kandidati i Partisë Konservatore për kryetar të Prizrenit, Beni Kizolli, është përqendruar në aftësitë dhe shkathtësitë e lobimit për përfitimin e votave duke prezantuar metodat e avancuara dhe të dëshmuara moderne.

“Metodat klasike të fushatave kur kombinohen me metodat moderne krijojnë mjete të fuqishme elektorale që zgjojnë interesimin e qytetarëve për të votuar, dhe Partia Konservatore e Kosovës është duke bërë këtë me sukse”, tha Kizolli.

“Puna juaj është madhore dhe e rëndësishme. Me përkushtimin tuaj ju do të parandaloni keqpërdorimet dhe do të garantoni votën e qytetarit. Puna e vëzhguesit ndahet në dy pjesë me rëndësi të barabarta. Pjesa e parë ka të bëjë me vëzhgimin e procesit të votimit dhe pjesa e dytë me vëzhgimin e numërimit të votave pas mbylljes së vendvotimeve. Prandaj, përqendrimi i juaj është i domosdoshëm për sigurimin e një të ardhme demokratike të shoqërisë sonë”, theksoi Nderim Pasuli, kandidati për asamblenë komunale të Prizrenit, i cili ishte edhe ligjërues dhe trajnues i vëzhguesve./PrizrenPress.com/

Inspektorati i Ministrisë së Ambientit ka ndërprerë për një ditë rrënimin e vikend shtëpizave dhe vilave në Prevallë të komunës së Prizrenit. Kjo për t’u dhënë afat një ditor pronarëve t’i mbledhin gjërat e tyre. Pushuesit, duke e parë tashmë se Ministria është e vendosur në shkatërrimin e tërësishëm të këtij kampingu, po mundohen që me shpejtësi t’i largojnë gjërat nga aty. Por dikush ka shfrytëzuar këtë rast natën e së premtes për të vjedhur në vilat gjysmë të rrënuara. Në disa vila mungojnë shumë gjëra, për çka ankohen pronarët, të cilët nuk ishin të pranishëm aty.

Ministri i Mjedisit, Dardan Gashi, është shprehur i vendosur të vazhdojë rrënimin e vilave që kanë tejkaluar përmasat e ndërtimit edhe në fshatin turistik, të cilat u takojnë zyrtarëve e politikanëve të shumtë, transmeton KTV.

Siç dihet, me kërkesën e Ministrisë së Mjedisit dhe Planifikimit Hapësinor, më 18 tetor kanë nisur rrënimet pa leje në kampingun veror në Prevallë të Prizrenit.

Sipas një vendimi të Ministrisë së Mjedisit dhe Planifikimit Hapësinor pronaret e këtyre ndërtimeve ishin urdhëruar që në afat prej 15 ditësh të bëhet largimi i të gjitha objekteve montazh, të rrënohen të gjitha ndërtimet përcjellëse në kamp, të bëhet pastrimi i zonës së kampingut nga mbeturinat ndërtimore dhe të rehabilitohet sipërfaqja e degraduar natyrore.

Kandidati i koalicionit AAK-LDD, për kryetar të Prizrenit, Lulëzim Kabashi,ka zhvilluar fushatën zgjedhore në fshatin Gërnçar dhe në lagjen “28 Nëntori” në Prizren.

Në të dy dubimet, Kabashi ka prezantuar platformën e tij zgjedhore për qeverisjen e komunës së Prizrenit gjatë mandatit të ardhshëm katër vjeçar.

Ai para banorëve të Gërnçares tha se platforma zgjedhore e koalicionit AAK-LDD, synim kryesor ka zhvillimin ekonomik të vendit. Sipas tij, zhvillimi ekonomik do të realizohet përmes katër shtyllave kryesore, që janë funksionalizimi i zonave industriale, investimeve në bujqësi, turizëm dhe ndërtim.“ Të gjitha këto katër shtylla do të krijojnë vende të reja të punës, dhe i kemi vënë synim vetës që gjatë mandatit të ardhshëm katërvjeçar, secila familje në komunën e Prizrenit, të ketë së paku një anëtar të punësuar”, tha Kabashi.

Ai premtoi se në këtë fshat do të realizojë rregullimi i sistemit të ujësjellësit, ndërtimi i objektit të ri të shkollës, rregullimi i rrugëve dytësore pa participim të komunitetit, ndriçimi i fshatit, si dhe rregullimi i rrjetit të kanalizimit. “Po ashtu në këtë fshat do të investohet edhe në sektorin e blegtorisë dhe pemëtarisë”.Kabashi edhe në tubimin në lagjen “28 Nëntori”, premtoi se do të angazhohet që t’i zgjidhë të gjitha problemet dhe kërkesat e kësaj lagjeje.

Ai kërkoi nga elektorati e kësaj lagjeje që të angazhohen maksimalisht për të kërkuar vota.“Zgjedhjet po afrohen, dhe vota është shumë e vlefshme, për të sjell ndryshime e ndryshimet do të vijnë me ardhjen në qeveri të koalicionit AAK-LDD”. / PrizrenPress.com/