Kyetari i PDK-së, Hashim Thaçi, votën për kandidatin për kryetar të Prizrenit, Ramadan Muja, kërkoi edhe në fshatin Atmaxhë.

“Fitoren e kryetarit Muja dhe të PDK-së e përcakton pjesëmarrja kaq masive e banorëve të Atmaxhës, dhe qeverisja e mirë që ka bërë në dy mandate”, tha Thaçi.Kandidati Ramadan Muja tha ndërkaq, se gjatë qeverisjes së tij,janë realizuar projekte të shumta në Komunën e Prizrenit.

“Të gjitha projektet e realizuara janë meritë dhe rezultat i diskutimit të hapur, duke pasur në epiqendër të vëmendjës politikat publike qe iu shërbejnë qytetarëve të Komunës së Prizrenit”.

Kandidati për Kuvendin e Komunes së Prizrenit, Kujtim Gashi,tha se në fshatin Atmaxhë janë realizuar shumë projekte. /PrizrenPress.com/

Kandidati i PDK-së, për kryetar të Prizrenit, Ramadan Muja, vizitoi fshatin Korishë.

Në këtë fshat, Muja është pritur nga qindra qytetarë. Ai tha se në Korishë janë realizuar disa projekte kapitale.“Rregullimi i rrugëve dhe rrugicave, kanalizimeve trotuareve e shumë e shumë projekte të tjera janë realizuar gjatë mandatit sa ka qeverisur PDK-ja”.

Muja tha se në konceptin tij qeverisës për ta bërë Prizrenin qytet Europian, do të investohet edhe më shumë në mënyrë që fshati Korishë të shndërrohet në qytezë.

Ministri i Punëve të Jashtme Enver Hoxhaj, tha se ndjehet krenar që është përkrah Mujës.  “ Muja Korishën e ka shndërruar në qytezë, nderkaq komunen e Prizrenin e ka bërë qytet Europian”./PrizrenPress.com/

Kryetari i Rahovecit Smajl Latifaj, ka punuar shumë, puna e tij vërehet në çdo vend të Rahovecit, në qytet e fshatra, dhe kjo më bën që të kërkoj votën edhe për një mandat tjetër, është shprehur kryetari i AAK-së, Ramush Haradinaj, në takimet e sotme në komunën e Rahovecit, me banorët e Opterushës dhe të fshatrave përreth.
Haradinaj u ka thënë banorëve të këtyre anëve se “si kryetar i Qeverisë së vendit në mandatin e ardhshëm ne do të investojmë edhe më shumë në komunën e Rahovecit dhe nuk do të bëjmë vetëm premtime milionëshe si të tjerët”.

“Ju po e vërtetoni se jeni në rrugën e drejtë, rrugë së cilës i prinë Smajl Latifi edhe për katër vitet e ardhshme” , tha Haradinaj.

Në fjalën e tij kryetari i Rahovecit dhe kandidati i AAK-së për kryetar të Komunës, në zgjedhjet e 3 nëntorit, Smajl Latifaj, ka thënë: “Ne rahovecianët po punojmë shumë që përveç kësaj fitoreje të 3 nëntorit, në vitin e ardhshëm të kemi edhe fitoren tjetër të madhe, që Ramush Haradinaj të jetë kryeministri i ardhshëm i vendit. Në mandatin e ardhshëm kemi në plan të vazhdojmë me ndërtimin e shkollës së re, qendrën e mjekësisë familjare dhe rregullimin e shtratit të lumit”.

Kryetari i Lidhjes Demokratike të Kosovës , Isa Mustafa, u kërkoi të dielën banorëve të fshatit Samadrexhë të Therandës (Suharekës) ta mbështesin LDK-në dhe kandidatin e saj për kryetar komune, sepse, në këtë mënyrë, i hapet perspektiva zhvillimore komunës.

Ai tha se ishte i bindur se kandidati i LDK-së për kryetar komune, Sali Asllanaj, do t’i fitojë bindshëm zgjedhjet e 3 nëntorit dhe Therandës do t’i kthehet qeverisja demokratike, transparente dhe e përgjegjshme.

“LDK-ja do të fitojë Therandën dhe shumicën e komunave, jo pse kam dëshirë ta them këtë, por po duket se përkrahja që kemi gjithandej Kosovës është përkrahje që flet për rikthimin e LDK-së. Ne po kthehemi, i pëlqeu apo jo dikujt. Ne do ta marrim qeverisjen e Kosovës, sepse demokracia është vullnet i shumicës”, tha kryetari Mustafa.

Sipas tij, LDK-ja nuk dëshiron që as Asllanaj, e as kandidatët për këshilltarë komunalë t’u premtojnë gjëra që nuk bëhen.

“Jam i bindur se ata po premtojnë ato që do të mund t’i realizojnë, sepse ne vitin tjetër do ta kemi përgjëgjësinë për qeverisjen e Kosovës”, tha kryetari Mustafa, duke shtuar se qeverisja e LDK-së nuk do të jetë diskriminuese, por do të shtrihet në tërë territorin e Kosovës dhe do t’u shërbejë të gjithë qytetarëve të saj.

Duke folur për programin e LDK për qeverisjen e Therandës, kryetari Mustafa theksoi se në këtë pjesë duhet kujdes i posaçëm, pasi bëhet fjalë për njerëz që janë të njohur për virtytin e punës dhe përgjëgjësisë që kanë.

“Është pjesë e njerëzve që jetojnë prej djersës së tyre dhe nuk meritojnë t’i qeverisë dikush që nuk jeton prej punës dhe nuk njihet për qëndrim të mirë, as ndaj punës, as ndaj pronës dhe as ndaj qeverisjes”, tha kryetari Mustafa, sipas të cilit, kjo pjesë e Kosovës, por edhe tërë Kosova, meriton të qeveriset nga programi dhe njerëzit e LDK-së. Sali Asllanaj, kandidat për kryetar të Therandës, premtoi se programi i tij qeverisës për katër vjetët e ardhshëm ka paraparë investime edhe në fshatin Samadrexhë, duke theksuar se prioritet do t’i japë urbanizimit të fshatit dhe futjes së tij në funksion të zhvillimit ekonomik.

“Programi ka paraparë financimin në shëndetësi, mjekë të rregullt dhe 24 orë shërbim shëndetësor. Programi i zhvillimit ekonomik parasheh mundësi të mëdha dhe lehtësi bizneseve, investime në zonën industriale në Shirokë dhe Mirash, e cila do të krijojë kushte për punësimin në komunën e Therandës”, tha Asllanaj.

Ai premtoi se subvencionimi në bujqësi do të jetë për 20 për qind më i lartë se aktualisht, ndërkaq theksoi se përparësi do t’u jepet serave dhe vreshtave.

Po ashtu, Sali Asllanaj pohoi se ishte i bindur për mbështetjen që Samadrexha dhe fshatrat e tjera do t’i japin programit të LDK-së, duke thekusuar se do ta kthejnë traditën e qeverisjes së përgjegjshme, transparente dhe që u përgjigjet nevojave të qytetarëve. Ai u bëri thirrje qytetarëve të kësaj ane të mobilizohen për rikthimin e LDK-së sivjet në pushtetin lokal të Therandës, kurse vitin tjetër në drejtimin e qeverisë së Kosovës.

Kryetari i LDK-së, Isa Mustafa dhe kandidati për kryetar të Komunës së Therandës, Sali Asllanaj, kërkuar mbështetjen edhe për kandidatët për këshilltarë të Kuvendit Komunal, duke theksuar se ata përfaqësojnë interesat e zgjedhësve dhe krejt qyetetarëve të komunës.

Në kuadër të pjesës së dytë të fushatës elektorale dhe vizitave derë më derë me moton “Ndryshimet trokasin në dyert tuaja”, Partia Konservatore e Kosovës ka organizuar një takim me qytetarët e në sheshin “Shatërva” në Prizren.

Kandidati i këtij subjekti politik për kryetar të Prizrenit,Beni Kizolli, bashkë me kandidatët për Asamblenë Komunale, ka shpërndarë matriale të programit zgjedhor.

“Takimet e tilla publike dhe të rastit tregojnë përkushtimin e Partisë Konservatore të Kosovës për të dëgjuar dhe kuptuar brengat dhe nevojat e qytetarëve nga dora e parë dhe komunikimi i drejtpërdrejt mundëson një qasje ndryshe për zgjidhjen e problemeve dhe i bind qytetarët se Partia Konservatore e Kosovës është afër tyre, është zëri dhe mjeti i tyre për adresimin e brengave të tyre”

Gjatë këtyre takimeve është prezantuar vizioni dhe plani i Partisë Konservatore të Kosovës për një të ardhme më të mirë duke premtuar se edhe pas ardhjes në pushtet ky subjekt politik do të jetë afër dhe me qytetarin për të dëgjuar vazhdimisht brengat, nevojat dhe kërkesat e tyre.

Dita e 18 e fushatës ishte e frytshme duka mbajtur kontaktet e drejtpërdrejta me qytetarët dhe do të vazhdojë edhe me tubime të tjera të planifikuara në bazë të strategjisë dhe planit veprues të shtabit zgjedhor të Partisë Konservatore të Kosovës. /PrizrenPress.com/

Kryetari i Lidhjes Demokratike të Kosovës (LDK), Isa Mustafa, tha të dielën në Prizren, se partia që ai drejton po e ndien përkrahjen e frymës rugoviane për fitore nëpër komunat e Kosovës.

“Ne po e ndiejmë frymën e mbështetjes së qytetarëve për frymën rugoviane, për qeverisjen demokratike të komunave të Kosovës. Në kuadër të frymës së kësaj politike, ne do të jemi të fortë, të ndërgjegjshëm, për besimin dhe mandatin që do të na e japin qytetarët në zgjedhjet e tanishme lokale dhe në ato nacionale, që do të mbahen vitin e ardhshëm”, tha Mustafa.

Ai tregoi se LDK-ja synon ta marrë përkrahjen e shumicës së qytetarëve, sepse me fitoren e LDK-së Kosova, do ta ketë një qeverisje demokratike, do ta çojmë përpara procesin e integrimeve evropiane.”Do ta kemi një besim më të mirë të Kosovës nga Bashkimi Evropian dhe do të kemi një miqësi të përhershme me Shtetet e Bashkuara, ashtu siç thoshte dhe na e ka lënë amanet Presidenti ynë Rugova”

Kryetari i LDK-së, gjatë tubimit me qytetarët e Prizrenit, po ashtu tha se pas fitores së Eqrem Kryeziut në Prizren dhe kandidatëve për këshilltarë komunalë,LDK-ja nuk do të ndalet, “por do të vazhdojë vitin e ardhshëm për t’i fituar zgjedhjet nacionale”.

Mustafa ka qenë kritik me mënyrën e menaxhimit të parasë publike, shpërndarjes së projekteve dhe menaxhimit të pronës në Prizren.

“Ne jemi të bindur se me fitoren e LDK-së nëpër komuna, puna në të gjitha nivelet do zhvillohet më mirë, buxheti do të shpërndahet më mirë, paraja publike do të shfrytëzohet si duhet. Me LDK-në pronarët e pronave do të kenë sigurinë e tyre dhe nuk do t’ju cenohet e drejta themelore e pronës, ndërsa shëndetësia do të jetë në nivelin siç e meritojnë qytetarët”.

“Ne jemi të bindur se do ta fitojmë komunën e Prizrenit, sepse puna e Eqrem Kryeziut, si ish-kryetar i Komunës, si deputet i Kuvendit të Kosovës, si nënkryetar dhe anëtarë i Kryesisë së LDK-së, na bën të bindur se ai është njeriu më i mirë, më i qëlluar, njeriu i cili mund ta realizojë fitoren e LDK-së në Prizren dhe njeriu, i cili do të punojë shumë për të mirën e banorëve të këtij qyteti”, tha Mustafa.

Ndërsa, z. Eqrem Kryeziu, kandidat i LDK-së për kryetar të Prizrenit, tha se me fitoren LDK-së, prizrenasit do të fitojnë një pushtet të përgjegjshëm, të vendosur dhe të drejtë. “Prandaj besimi i qytetarëve na obligon që të bëjmë më të mirën për qytetin dhe qytetarët”.

“Besimi që na u pat dhënë për shtatë vjet (gjatë qeverisjes së LDK-së në Prizren), ne nuk kemi bërë dallime me ato pak para që i kemi patuar atëherë dhe me ato hiç kompetenca në kohën e UNMIK-ut. Ne i kemi shpërndarë projektet gjithandej komunës së Prizrenit, pa marrë parasysh a kemi simpatizues të partisë, apo nuk kemi”, tha Kryeziu./PrizrenPress.com/

Kandidati për kryetar të Komunës së Prizrenit Zafir Berisha,mbajti takim elektoral me banorët e fshatit Nashec dhe Atmaxhë.

Berisha  banorëve  të  këtyre fshatrave iu premtoi se në qeverisjen katër vjeçare të Prizrenit, synon thellimin dhe përshpejtimin e reformave drejt një ekonomie moderne të tregut të lirë, të orientuar në proceset integruese dhe praktikat më të mira ndërkombëtare, si domosdoshmëri për zhvillimin dhe të ardhmen e vendit.

“Qytetarët e Prizrenit nuk do t’i besojnë më gënjeshtrave të Hashim Thaçit, i cili javën e kaluar premtoi 100 milionë euro investime, kurse dje  rriti premtimin  e tij në 200 milionë, dhe siç ka filluar deri në fund të fushatës do t’i premtojë 1 miliardë euro. Para se  t’u besojmë këtyre fjalëve të Hashim Thaçit dhe suitës së tij,  duhet t’ua sqarojë qytetarëve të Prizrenit se çka ndodhi me Hidrocentralin e Zhurit, që është premtuar para 4 viteve dhe çfarë ndodhi me 30 milionë eurot e premtuara për rregullimin e shtratit të ‘Lumëbardhit’ “. /PrizrenPress.com/

Kandidati për kryetar të Prizrenit Zafir Berisha mori pjesë në hapjen e fushatës elektorale të Degës së Ballit Kombëtar në Prizren.

Berisha tha se ndjehet i nderuar dhe i respektuar që sot i drejtohet elektoratit të Ballit Kombëtar, të cilët i ka aleat në përpjekjen për ta përmbysur krimin dhe korrupsionin në  Komunën e Prizrenit.

“Deri sa Hashim Thaçi dhe garnitura e tij kanë humbur besimin tek popullata shumicë në Prizren, ata po mundohen që përmes disa liderëve të manipuluar të pakicave tjera, jo shqiptare, të mbajnë në pushtet të akuzuarin nga EULEX-i, për krim dhe korrupsion Ramadan Mujën.  Unë ju siguroj se edhe komuniteti turk, boshnjak dhe REA do të bëhen bashkë me ne dhe deri më 3 nëntor do të bëjmë ndryshimet e shumëpritura në Prizren”.

Berisha në këtë tubim  shpalosi programin e BD-së për zgjedhjet e 3 nëntorit, si dhe prezantoi  listën e kandidatëve për Kuvend të Prizrenit nga radhët e Ballit Kombëtar.

Kryetar i Degës së Ballit Kombëtar, Luzim Hebiballari,  i cili është dhe bartës i listës, pasi shpalosi pjesë të programit zgjedhor, nga partia e tij, tha se janë të nderuar që mbështesin njeriun e sakrificave të mëdha, Zafir Berishën. /PrizrenPress.com/