Paçka jetës së saj të gjatë e plot arritje, Pelinku ka lënë pas dy pengje… “Duke biseduar me Drita Pelinkun, artikuj, intervista, opinione”. Ky është titulli i librit mbi aktoren, që duhej të promovohej në javët në vijim. “Për fat ajo mundi ta shikojë, ta prekë dhe të gëzohet për librin, vetëm një javë më parë kur mori kopjet e para. Dëshira e Dritës ishte ta promovonim te ‘Piaca’, kur të bëhej pak më mirë…”, – tregon Flori Slatina, specialist pranë Arkivit Shtetëror të Filmit, e që është ndërkohë njeriu që është kujdesuar për realizimin e librit. Ndërsa e konsideron si “testamentin” e Pelinkut, tregon se në të përmblidhen intervistat e botuara në shtyp, këto 30 vitet e fundit. Nga ana tjetër, miq të saj tregojnë se ajo kishte kontaktuar drejtoreshën e Arkivit të Shtetit, znj. Nevila Nika, për të dorëzuar aty, disa sendet të sajat personale: një erashkë, disa fotografi, kujtime nga rolet, nga skena. Nuk mundi kurrë ta bëjë këtë, nuk ia doli dot ta çonte deri në fund këtë dëshirë. Nuk mundi as të ringjitet në skenë. Por, emri i saj, atje do të mbetet.

Mihal Luarasi
Miku i saj Mihal Luarasi tregon nga ana tjetër se ajo ka qenë shumë optimiste për rikthimin e saj në skenë. “Fola me të në telefon para 4 ditësh. Ishte mirë. Më tha që e përsërit shpesh tekstin e ‘Përjetësisht dashuri’, sepse sapo të përmirësohej, donte të ngjitej në skenë”, – tregon regjisori Luarasi, që këtë pjesë e shkroi enkas për të në vitin 2003. “Më thoshte që e shihte veten në ëndërr teksa luante rolin në skenën e teatrit. Ndaj, më premtonte se sapo të bëhej më mirë, do të dilte sërish para publikut, qoftë edhe duke u mbajtur mbi një shkop”, – kujton Luarasi. Miq prej vitesh, ata flisnin a takoheshin së paku një herë në tri ditë. Por herën e fundit që prof. Mihali i telefonoi asaj, foli me të nipin. Drita, nuk qe edhe aq mirë.

Ditari
Ditari është pjesa e pandashme e saj për 66 vite me radhë, që nga fillimet si aktore, tek njohja me bashkëshortin Hysen Pelinku, e deri në ditët e fundit. Detaje nga skena e prapaskena, detaje mbi familjen, teatrin, vështirësitë, mëritë, miqtë, gjithçka mbi Dritën, të përshkruara nga vetë ajo.

Familjarë, miq të shumtët artistë të skenës së teatrit e filmit, muzikës, spektaklit, politikanë, dashamirës së artit i janë drejtuar Teatrit Kombëtar për t’i dhënë lamtumirën “Artistes së Merituar”, Drita Pelinku. 87-vjeçarja u nda nga jeta dje nga një sëmundje e rëndë.

Homazhet u zhvilluan deri në orën 13:00 në Teatrin Kombëtar ndërsa më pas u zhvillua ceremonia e varrimit të aktores në Varrezat e Sharrës.
Duartrokitjet e fundit aktorja i mori teksa trupi zhvendosej nga teatri Kombëtar për tu dërguar drejt automjetit qe priste te nisej tek Varrezat e Sharrës.

Elvira Diamanti: Nga zysh Drita do më mungojë zemra e saj
Aktorja Elvira Diamanti pas homazheve që i bëri “zysh Dritës”, u shpreh për mikrofonin e “News 24” se: “Do më mungojë shumë zemra e saj, i jam shumë mirënjohëse, zysh Drita ka qenë një njeri i jashtëzakonshëm, me një mirësi që i buronte nga brenda, ajo ka nxjerrë më të mirën nga të gjithë ne, brezi që ajo edukoi dhe mësoi”.

Fjalët më të mira për zysh Dritën dhanë dhe të tjerë artistë, që u rritën nën dijet e artistes së madhe.

Basha: Vepra e Pelingut, frymëzuese për breza të tërë artistësh
Kryetari i Bashkisë së Tiranës, Lulzim Basha ka bërë sot homazhe, për nder të Artistes së Merituar, Drita Pelingu. Zoti Basha tha se vepra që la pas artistja, regjisorja dhe pedagogia Drita Pelingu do të frymëzojë breza të tërë artistësh edhe në të ardhmen.

“Qytetarët e Tiranës dhe mbarë shqiptarët ndahen sot nga një bashkëqytetare, e cila ka një domethënie të madhe për identitetin e shumë brezave, për kulturën dhe artin shqiptar. Sot, dua t’i shpreh ngushëllimet e mia, por edhe në emër të qytetarëve të Tiranës, familjarëve të artistes, regjisores, pedagoges së artit Drita Pelingu si dhe komunitetit të artistëve shqiptarë, që sot ndahen nga një kontribuese e palodhur dhe që la mbresa të thella në artin skenografik shqiptar, në kujtesën e shumë brezave, të publikut dhe të artdashësve shqiptarë. Galeria e qindra personazheve që ajo i bëri të dashur, të pranishëm dhe të pashlyer nga kujtesa dhe arkivi historik i artit shqiptar, nga kujtesa e qytetarëve shqiptarë do ta shoqërojnë përgjithmonë emrin dhe veprën e saj. Tek ndahemi sot fizikisht nga ajo, një gjë është e sigurt. Vepra, arti, frymëzimi që la pas do të vazhdojë të frymëzojë breza të tërë artistësh dhe të jetë pjesë e identitetit qytetar dhe artistik të çdo shqiptari” – u shpreh pas homazheve kryebashkiaku Basha.

Rama në “Twitter”
“Një tjetër xhevahir u shkëput nga kurora e trashëgimisë sonë skenike! Drita Pelingu u largua përgjithnjë duke lënë pas shkëlqimin e saj…”, shkruan në “Twitter”, kryeministri Rama pak minuta pasi u bë publik lajmi për ndarjen nga jeta të Pelingut.

Nata e dytë e “Kamerfest” i është kushtuar artistëve italianë, të cilët kanë interpretuar kompozime nga vepra të ndryshme të kompozitorëve të njohur, duke përfshirë edhe Verdin e Bachun.

Luigi Santo në trumpet dhe Daniela Gentile në piano kanë hapur natën e dytë të Festivalit ndërkombëtar “Kamerfest”, që po mbahet në kryeqytet.

Daniela Gentile e cila luante gishtat e saj në piano si dhe artisti me prejardhje shqiptare nga Kalabria e Italisë, Luigi Santo me trumpetën e tij, kanë hapur performancën e tyre me interpretimin në kompozimin e kompozitorit Edward Mc Dowell “To a Wilde Rose” (Për një trëndafil të egër) para një publiku jo edhe aq të madh, transmeton portali KultPlus.

Instrumentistët italianë më pas kanë performuar edhe në kompozimet e Bach-ut, të Peskjn…Dyshja italiane ka arritur ta bëjë për vete publikun e mbledhur në ambientin e kishës katolike “Shën Ndou”, edhe me ekzekutimin e “Arie dal Belcanto Italiano” të Gussepe Verdit, “Salmo” nga Joseph Turrin, kurse në përmbyllje të kësaj mbrëmjeje ishte përzgjedhur kompozimi i Gerswhinit .

Mit’hat Saidi, profesor i muzikës i cili ishte më i koncentruari në këtë mbrëmje për ta përcjellur performancën e artistëve italianë, tha se interpretimi nga këta artistë po ia kujtonte kohën e artë të tij.

“Performanca e mysafirëve nga Italia e largët, ma përkujtoi rininë ku kam luajtur vetë në trumpetë g-mol. Por, me keqardhje dua të them se nuk kishte publik aq sa duhet, kurse programi ishte jashtëzakonisht i një niveli të lartë artistik. Sinqerisht më vjen keq, pse publiku vendas heziton t’iu përgjigjet këtyre programeve fantastike”, ka thënë Saidi.

“Është hera e parë që marr pjesë në festivalin “Kamerfest”, dhe që performoj në Kosovë”, ka thënë për KultPlus, Luigi Santo. “Prishtina si kryeqytet i Kosovës është emër shumë i njohur për italianët, dhe ne e dimë se çka ka ndodhur pikërisht në këtë qytet vite me parë, ku ka pasur edhe luftë. Dje duke u nisur nga Kalabria, takova një shoqe time e cila quhet Jozefina, dhe më pyeti se ku po shkoj. Unë iu përgjigja se po nisem për një koncert që do ta mbaj në Prishtinën e Kosovës. Ajo mbeti e mahnitur dhe më tha se kishte qenë këtu 15 vite më parë në një projekt humanitar”, ka thënë ai, duke tërhequr një paralele për këtë vend, sot e 15 vite më parë.

“Unë vërejta sonte se populli i Kosovës është popull shumë i dashur dhe që e dëshiron shumë muzikën klasike. Ne muzikantët e kemi mundësinë që askush tjetër nuk e ka, pra të komunikojmë direkt me audiencën nëpërmjet ritmeve të instrumenteve”, ka thënë Santo.

Nga ana tjetër, Daniela Gentile, është shprehur për përshtypjet e mira që i ka lënë publiku prishtinas. Sipas saj, ajo e ka vërejtur se interpretimi i tyre është përcjellë me shumë ëndje.

“Kamerfest” do të ketë prezantimin e radhës më 8 tetor, në kishën katolike “Shën Ndou”, në Prishtinë.