Kandidati i VV-së, për kryetar të Prizrenit, Arbër Rexhaj është takuar edhe me përfaqësuesit e KDI-së. Rexhaj ka çmuar rolin e konstruktiv të KDI-së, që ka pasur në zhvillimin e institucioneve demokratike dhe parlamentarizmit në vend.

“Lëvizja Vetëvendosje! konsideron se aktiviteti dhe veprimtaria profesionale e KDI-së në këtë drejtim, ka një rëndësi jashtëzakonisht të veçantë në promovimin e vlerave demokratike në Komunën e Prizrenit dhe më gjerë”, tha Rexhaj.

Sipas tij, se publikimet, vërejtjet dhe rekomandimet e vazhdueshme të KDI-së, përherë kanë qenë një burim i pazëvendësueshëm i informacionit objektiv dhe të pavarur për punën dhe veprimtarinë e pushtetit lokal.

Përfaqësues i KDI-së për Prizren, Naim Cahani, falënderoi Lëvizjen Vetëvendosje! për vizitë dhe uroi që ky subjekt të jep angazhimin dhe potencialin e vetë në funksion të zhvillimit demokratik të institucioneve të pushtetit lokal. /PrizrenPress.com/

Partia Demokratike e Kosovës (PDK) në Prizren ka ndërruar datën e fillimit të mbajtjes së fushatës zgjedhore. Fushta nuk do të mbahet me 4 nëntor ashtu siç ishte paralajmëruar, por me 3 nëntor.

Sekretari për Marrëdhënie me Publikun, Samir Hoxha,tha se PDK-ja i ka bërë të gjitha përgatitjet e nevojshme për organizimin e fillimit të fushatës zgjedhore me datë 3 nëntor, si dhe për fitoren bindëse të PDK-së në Komunën e Prizrenit.

“Kandidati për kryetar të komunës, Ramadan Muja, në takimin me strukturat drejtuese të Degës, kryetarët e nëndegëve dhe Kryesinë e Rinisë, kërkoj nga ta që të angazhohen maksimalisht në aktivitetet përgaditore si dhe ta ftojnë anëtarësinë e gjerë të PDK-së, në Prizren për pjesëmarrje në hapjen e fushatës dhe në të gjitha aktivitetet tjera elektorale”, tha Hoxha.

Sips tij, fillimi i fushatës elektorale i Partisë Demokratike të Kosovës, në komunën e Prizrenit, do bëhet me datën 3 tetor në Qendrën Sportive “ Sezai Surroi” duke filluar nga ora 16:00.

Në ceremoninë e hapjes së fushatës zgjedhore do të marrë pjesë edhe lideri i PDK-së, Hashim Thaçi. Në këtë tubim do të bëhet edhe prezantimi i kandidatëve për Asamblenë Komunale.

Shtabi Zgjedhor i Degës së PDK-së në Prizren, ka hartuar agjendën e takimeve me qytetarët, përmes së cilës do të prezantohet aktiviteti elektoral në të gjitha lokalitetet e Komunës së Prizrenit. /PrizrenPress.com/

Kryeparlamentari, Jakup Krasniqi, i cili muajt e fundit doli si “disident” nga partia e tij, thotë sa struktura e re e Partisë Demokratike të Kosovës po i mbyt intelektualët me autoritarizëm dhe injorancë.
Duke e humbur rrugën në mes, për të qenë parti substanciale në Kosovë, PDK, sipas Krasniqit, e ka humbur ekuilibrin politik, prandaj për këtë arsye së bashku me Fatmir Limajn dhe disa të tjerë ka ndarë mendjen për ta formuar një parti të re politike.

Në intervistën dhënë “Zërit”, ai tha se është bërë gati për ta formuar një parti të re, ku dominon vlera demokratike dhe jo zëri i liderit totalitar, siç është në PDK.

Jakup Krasniqi thotë se PDK i dhimbset që po e braktis, por këtë e konsideron si rrugën e vetme për ta përmbushur boshllëkun politik.

Megjithatë ia tha se nuk e ka në agjendë të shndërrohet si “kamikaz” për ta djegur veten dhe për ta dëmtuar PDK-në, por tha se politika ka edhe arsyet e veta. Duke iu përgjigjur Ramë Bujës, që tha se Limaj dhe Krasniqi po vetëdigjen, ky i fundit thotë se do të “ringjallet si feniks”.

Ai tha se disa herë njerëzit kanë menduar se “kam marrë vendime të gabuara dhe jam djegur, por kam fituar.

“Mirëpo thjeshtë nuk i kuptoj, ata njerëz që dje për Kosovën kanë rrezikuar gjithçka dhe sot e bëjnë të kundërtën, e sakrifikojnë Kosovën për veten, për interesat meskine”, deklaroi Krasniqi, i cili po ashtu u shpreh kundër lidhjeve të forta me Ankaranë.

Ish-sekretari i përgjithshëm i PDK-së tha se nuk do t’u bashkohet partive të tjera, sepse shumica nga to, sipas tij, kanë synim zhvatjen e buxhetit dhe qeverisjen.

Kandidati i VV-së për kryetar të Prizrenit, Arbër Rexhaj,bashkë me kandidatët për Asamblenë Komunale, sot ka vizituar Shoqatën e Zejtarëve dhe Afaristëve.
Në këtë takim me Kryesinë e Shoqatës, Rexhaj ka diskutuar për gjendjen aktuale ekonomike në Komunën e Prizrenit.  Aktualisht kjo shoqatë numëron rreth 5000 anëtarë dhe roli i saj në zhvillimin ekonomik të Komunës padyshim është i padiskutueshëm. Lëvizja Vetëvendosje! në Prizren ka paraqitur vizionin e saj qeverisës që ka të bëjë me fushëveprimin e bizneseve si dhe lehtësirat tatimore të parapara në këtë program.

Kryetar i Shoqatës së Zejtarëve dhe Afaristëve të Prizrenit, Afrim Tejeci, tha se do ta analizojë me kujdes alternativën e Lëvizjes Vetëvendosje! si dhe do t’i jap sugjerimet me shpresë të përfshirjes së tyre në program.

Palët u pajtuan për vazhdimin e bashkëpunimit të ndërsjellët për çështjet e interesit të përbashkët si dhe bashkërendimin e veprimeve që janë në dobi ekonomike për Komunën e Prizrenit./PrizrenPress.com/

Ministri i Punëve të Jashtme i Republikës së Kosovës, Enver Hoxhaj, ka shtruar një drekë pune për nder të vizitës në Kosovë, të një delegacioni nga Parlamenti i Sllovakisë, i kryesuar nga Ivan Stefanec. Shkarko me rezolucion më të madhShkarko me rezolucion më të madh.

Gjatë bisedës me parlamentarët sllovakë, ministri Hoxhaj ka prezantuar progresin e jashtëzakonshëm që është arritur në Republikën e Kosovës, fuqizimin e gjithanshëm të shtetësisë dhe subjektivitetit ndërkombëtar.

Hoxhaj ka veçuar angazhimin e fuqishëm të Qeverisë së Republikës së Kosovës për përmbushjen e agjendës integruese evropiane.

Në këtë kontekst, ai theksoi prioritetet e Kosovës që lidhen me negocimin e Marrëveshjes së Stabilizim Asociimit dhe përmbushjen e kritereve për liberalizimin e vizave për qytetarët e Kosovës.

Gjatë bisedës me parlamentarët sllovakë, ministri i Jashtëm i Kosovës ka shprehur vullnetin e Qeverisë së Kosovës për forcimin e bashkëpunimit dhe shkëmbimeve me Sllovakinë, duke kërkuar përkrahjen e këtij shteti për proceset eurointegruese.

Duke iu referuar takimit të fundit në Nju Jork me zëvendëskryeministrin dhe ministrin e Jashtëm, Miroslav Lajçak dhe përkrahjes së ofruar nga ai për proceset integruese, Hoxhaj tha se Kosova mund të përfitojë shumë nga përvoja sllovake në rrugën integruese në BE.

Kryesuesi i delegacionit nga Parlamenti i Sllovakisë, Ivan Stefanec, pasi vlerësoi të arriturat në Kosovë, shprehu mbështetjen e Parlamentit sllovak për proceset integruese evropiane.

Stefanec po ashtu shprehu gatishmërinë e Parlamentit të Sllovakisë për thellimin e bashkëpunimit me Parlamentin e Kosovës, si dhe forcimin e shkëmbimeve në shumë fusha të jetës ndërmjet dy shteteve./PrizrenPress.com/