Hulumtimi më i madh i opinionit në botë për korrupsion tregon se më se gjysma e të aketuarve besojnë se ai është përkeqësuar në vendet e tyre.

Por, monitorimi i kryer nga organizata Transparency International me seli në Berlin, thotë se afro 90% të të anketuarve janë të gatshëm ta luftojnë korrupsionin, duke nënshkruar peticione dhe duke protestuar.

Barometri Global i Korrupsionit 2013 është mbështetur në intervistat me 114 mijë njerëz në 107 vende.

Më tepër se një e katërta e të anketuarve në gjithë botën, kanë raportuar se kanë paguar ryshfet në vitin e fundit, përfshirë më se 40% në Afganistan dhe Kirgizi, më se 30% në Kazakistan dhe Ukrainë dhe më se 20% në Irak dhe Serbi.

15 – 19.9% të të anketuarve në Kosovë dhe Maqedoni kanë thënë se kanë paguar ryshfet gjatë vitit të fundit, në njërin nga sektorët e policisë, judikaturës, regjistrimit, pronësisë, mjekësisë, arsimit, tatimit dhe shërbimeve, transmeton REL.

Më pak se 5% kanë paguar ryshfet në Gjeorgji.

Partitë politike konsiderohen institucionet më të korruptuara në pjesën më të madhe të vendeve.

Koordinatori i Këshillit Koordinues të Asociacioneve Familjare të të Zhdukurve të Kosovës, Haki Kasumi, ka bindjen se çështja e të pagjeturve mund të zgjidhet vetëm me një presion të madh ndërkombëtar ndaj qeverisë serbe. Sipas tij, qeveria aktuale i ka të gjitha shënimet për të zhdukurit në Kosovë.

Në një intervistë për Tribunën, Haki Kasumi ka deklaruar se EULEX-i e ka pranuar se një pjesë e trupave të shqiptarëve janë djegur, mirëpo, sipas tij, deri më tani misioni evropian për sundimin e ligjit nuk ka bërë asgjë për të hedhur dritë në këtë çështje,shkruan Tribuna

“Në raportin e punës vjetore për vitin 2011, Njësiti i EULEX-it pranë Departamentit të Drejtësisë për Mjekësi Ligjore dhe të Zhdukur thotë se një numër i madh i trupave të të zhdukurve shqiptarë dihet se janë djegur? Ndërsa nuk tregon ku dhe nuk ka filluar në bazë të njoftimeve të tyre asnjë procedurë të hetimit ndaj kryesve të veprave të tilla kriminale, përfshirë këtu edhe afro 900 trupa të masakruar të shqiptarëve nga varrezat masive të zbuluara deri më tash nëpër Serbi”, ka thënë Kasumi

Intervenimi i Forcës së Sigurisë së Kosovës (FSK) në veri të Kosovës, në kuadër të implementimit të marrëveshjes për normalizimin e marrëdhënieve në mes Kosovës dhe Serbisë, është legjitim dhe i mbështetur në Kushtetutën e Kosovës. Kështu i ka thënë Telegrafit eksperti i sigurisë, Nuredin Ibishi. Kurse, ministri i Forcës së Sigurisë së Kosovës, Agim Çeku tha se FSK-ja nuk do të shkojë në veri pa u koordinuar me KFOR-in.
Ministri i Forcës së Sigurisë së Kosovës (MSFK), Agim Çeku, ka theksuar se FSK-ja i bindet çdo urdhri të Kryeministrit dhe Presidentes së Kosovës dhe në këtë ccështje, sipas tij, nuk ka kurrfarë dileme.

Ai tha se FSK-ja nuk do të marrë asnjë vendim, i cili do ta fuste në veprime aventureske, sepse, sipas tij, ky institucion është pjesë e përpjekjeve për normalizimin e marrëdhënieve në mes Kosovës dhe Serbisë.

“Ne do të japin kontributin tonë që marrëdhëniet në mes Prishtinës dhe Beogradit të normalizohen, dhe do të jemi të kujdesshëm që me asnjë veprim të mos ngrisin tensione të panevojshme. Çdo gjë që kërkohet nga FSK-ja, ajo do ta bëjë. FSK-ja i përgjigjet çfarëdo detyre, e cila i caktohet nga eprorët legjitimë dhe kushtetues”, tha Çeku për Telegrafin.

Sipas tij, Kryeministri i Kosovës, Hashim Thaçi është zotuar se FSK-ja, tash për tash nuk do të shkojë në veri pa u koordinuar me KFOR-in.

“FSK-ja me asnjë veprim nuk do të lejojë ngritjen e tensioneve të panevojshme, por me qëndrimin dhe punën e vet do të jep kontribut në implementimin e marrëveshjes për normalizimin e marrëdhënieve në mes Kosovës dhe Serbisë”, ka deklaruar ai.

Në anën tjetër, eksperti i sigurisë Nuredin Ibishi, ka theksuar se është plotësisht e pritur që Forca e Sigurisë së Kosovës (FSK), të intervenojë në veri në rast se një gjë e tillë kërkohet prej saj, edhe pse, sipas tij, serbët e veriut nuk pranojnë prezencën e FSK-së në atë pjesë.

Ibishi ka shtuar se kërkohet kohë që serbët të binden me prezencën e FSK-së dhe ky mospranim nuk mund të kalohet menjëherë, sepse atyre iu është imponuar një urrejtje artificiale ndaj institucioneve të Kosovës.
“Unë mendoj qe kjo mund të tejkalohet, sepse ekstremistët serbë ngadalë kanë filluar ta pranojnë dorën e shtetit të Kosovës në atë pjesë”, ka thënë Ibishi për Telegrafin

Ibishi ka sqaruar se neni 2 i Kushtetutës së Kosovës thotë se integriteti territorial i Kosovës është i pacenueshëm, i patjetërsueshëm dhe i pandashëm dhe sipas tij, mbrohet me të gjitha mjetet e parapara me kushtetutë.

Prandaj, sipas tij në bazë të Kushtetutës dhe ligjit nuk ka kurrfarë pengese që FSK-ja, në kuadër të detyrave të saj, të ndërhyjë edhe në veri. /Telegrafi/

Kryeministri i Kosovës, Hashim Thaçi dhe ai i Serbisë, Ivica Dacic i kanë përafruar qëndrimet për arritjen e marrëveshjeve për telekom dhe energji.
Arsyeja e mos nënshkrimit të këtyre marrëveshjeve ne raundin e së hënës që zgjati disa orë pasdite ishte interpretimi gjuhësorë që pala serbe ka kërkuar t’u bëhej marrëveshjeve.

Një zyrtar i lartë që ka marrë pjesë në takimet trepalëshe të hënën në Bruksel i ka treguar Tribunës me kusht anonimiteti se pala serbe i ka pranuar gjitha konkluzionet e Bashkimit Evropian për të dyja marrëveshjet mirëpo ka kërkuar disa fjalë të lihen me dykuptimësi për ta “shitur” si fitore në publikun serbë.

Ende një njeri pa shtetësi dhe i bllokuar në një aeroport të Moskës, spiuni i inteligjencës amerikane, Edward Snowden, duket se po shqyrton disa mundësi pas kërkesave të tij për azil.
Venezuela i ka zgjatur një ofertë për azil Snowden-it; presidenti Nicolas Maduro tha se qeveria e tij ka marrë një kërkesë zyrtare për azil nga ai, teksa tashmë po pret përgjigjen e tij, bëri të ditur një zëdhënës i qeverisë të hënën.
Nëse Snowden pranon azilin në Venezuelë, Elias Jaua, ministër i Jashtëm, tha për median shtetërore VTV gjatë fundjavës, se “ne do të nisim kontaktet me qeverinë e Federatës Ruse. Ai ndodhet atje, sigurisht nuk ndodhet në një territor venezuelian. Na duhet të marrim edhe mendimin e qeverisë ruse për të”.
Venezuela është një nga 3 kombet e Amerikës Latine, me prirje të majta të shkallëve të ndryshme, që kanë shprehur faktin se mirëpresin Snowden-in. Të tjerë ofertues janë Bolivia, e cila ia ka ofruar azilin politik tashmë, si dhe Nicaragua, që ka deklaruar se do ta konsiderojë kërkesën e tij.
Snowden, një ish-kontraktor i Agjencisë të Sigurisë Kombëtare (NSA), i cili përballet me akuzat e spiunazhit në Shtetet e Bashkuara, është konsideruar si tradhëtar nga kritikët, ndërsa është lavdëruar si hero nga mbështetësit e tij. Ai ka mbetur “në harresë”, prej më shumë se 2 javësh nga mbërritja e tij në aeroportin ndërkombëtar “Sheremetyevo” të Moskës, nga Hong Kongu