Pas raportimit të ndryshimeve në buxhetin e vitit 2015 nga ministri i Kulturës, Rinisë dhe Sportit, Kujtim Shala, ka pasur reagime të ashpra nga artistët që udhëheqin projekte kulturore të prekura nga këto shkurtime drastike të buxhetit.
Të enjten gazeta “Express” publikoi dokumentin e buxhetin të këtij viti, sipas të cilit festivali DokuFest do të financohet me 25 mijë euro, me një rritje prej 5 mijë eurosh, kurse festivali PriFilmFest ka rënë nga 20 mijë në 5 mijë euro, SkenaUp nga 15 mijë në 4 mijë euro, Chopin Piano Fest nga 9 mijë në 2 mijë euro, Dam Fest nga 5 mijë në 2500 euro, Lidhja e Shkrimtarëve nga 10 mijë në vetëm 2 mijë euro, kurse qendra “Stacion” as që është përkrahur fare.
Reagimet në rrjetet sociale qenë të shumta, duke filluar nga Besa Luzha, organizatore e Chopin Piano Fest, e cila tha se 2 mijë eurot që i ka ndarë Shala për këtë festival, mund t’i mbajë për vete.
Ilir Bajri, një ndër artistët e njohur të muzikës jazz në vend, i cilësoi këto shkurtime si rezultat i mungesës së aftësive dhe kualitetit human të njerëzve në pozita.
“Ne anen tjeter, disa nga festivalet e perkdhelura nga ministrat e meparshem ma ne fund e kane rastin me e provu shijen e ithte te mosperkrahjes, shije qe disa festivale me vite e perjetojne – festivali DAMfest p.sh. – zor ka ndonji festival qe ka sjelle per 10 vite me rradhe artiste e performanca bashkekohore e interesante, shpesh te niveleve koxha te larta aristike qe padyshim asht me dobi per komunitetin e shoqnine ne përgjithësi”, ka shkruar Bajri.
Albert Heta, drejtor i qendrës së artit bashkëkohor “Stacion”, gjithashtu ka kritikuar tendencat politike për këtë neglizhim të skenës së pavarur kulturore.
“Zevendes-Kryeministri Ministri i ‘Kultures’, qe i bjen Qeveria, e paskan sfidu skenen e pavarur te artit dhe kultures ne Kosove, ekzistenca e te ciles eshte tregues i demokracise dhe fundit te kohes me artin dhe kulturen ne sherbim te partise. Mos reagimi i mekanizmave kordinues te institucioneve te pavarura te kultures do te ishte edhe nje deshmi qe keta mekanizma jane vegla te politikaneve te vegjël”, ka shkruar Heta.
Edhe këngëtarja e mirënjohur, Alma Bektashi, përmes një komenti e ka quajtur turp shkurtimin buxhetor. Në anën tjetër, ministri Shala dhe këshilltari i tij i lartë, Vehbi Miftari, të cilin KosovaLive e ka kontaktuar në lidhje me çështjen, ende nuk kanë reaguar.