Miq dhe kolegë do ta kujtojnë sot në një takim që do të mbahet në Akademinë e Filmit dhe Multimedias “Marubi”, ku mbante postin e Presidentit të Nderit
Nuk është rastësi që Vath Koreshi, një nga emrat më të njohur të prozës shqipe do të kujtohet sot, në dhjetëvjetorin e ndarjes nga jeta në një aktivitet në Akademinë e Multimedias dhe Filmit “Marubi”. Me emrin e Koreshit nuk lidhet vetëm letërsia, pas së cilës ai u kap fort, por dhe kinematografia, ku ai spikati si skenarist. Janë disa prodhime kinematografike ku Koreshi shfaqet si skenarist, ku më i fundit është “Dasma e Sakos”, bazuar në një novelë të tij të shkruar më 1980-n, nën regjinë e Dhimitër Anagnostit, vetëm dy vjet para se të ndahej nga jeta. “Rrugë të bardha”, filmi i realizuar në vitin 1974, i cili mbahet mend për personazhin e Dedës, interpretuar nga Rikard Larja, është shkruar nga Koreshi. Po kështu “Gjeneral Gramafoni” (1978) nën regjinë e Viktor Gjikës, dhe “Balada e Kurbinit” (1990)nën regjinë e Kujtim Çashkut, janë shkruar prej tij.
Ajo çfarë i bashkon skenarët dhe letërsinë e Koreshit është mënyra e të vështruarit të jetës. I konsideruar si shkrimtari i brendësisë, Koreshi është tejet lirik në prozën që shkroi. I lindur në Lushnjë në vitin 1936, ai do t’i përkiste brezit të letrarëve që studiuan në Universitetin e Tiranës për letërsi pas viteve ’60. Më 1964 ai përfundon studimet, për të nisur punën si gazetar më pas te “Zëri i Rinisë” ku punoi për gati 10 vjet. Më vitin 1973, teksa kishte botuar dy librat e tij të parë “Kur zunë shirat e vjeshtës” (1964) dhe “Dy të shtunat e Suzanës” (1972), Koreshi ftohet të punojë në gazetën më të madhe dhe të vetme letrare në vend “Drita”. Katër vjet do të zgjaste eksperienca e tij te “Drita” për të filluar punë më vitin 1977 si skenarist në kinostudion “Shqipëria e re”.
I dalluar mbi mënyrën sesi e strukturonte karakterin e një personazhi, Koreshi do ta kishte më të lehtë të komunikonte me gjuhën e kinemasë. Gjatë kësaj periudhe ai boton librin “Mali mbi kënetë” (1977). Në vitin 1987 ai del me profesion shkrimtar i lirë, për t’iu përkushtuar tërësisht letërsisë deri në fillim të viteve ’90, ku do të veshë mantelin e një intelektuali të angazhuar. Në këto vite ai përfshihet në politikë, dhe në vitin 1992 ai do të ishte ministër i Kulturës dhe deputet në legjislaturën XVI të Kuvendit të Shqipërisë. Pavarësisht kontributit të tij në politikë, Koreshi ruajti staturën e shkrimtarit. Janë shumë libra që ai ka lënë pas të cilët lexohen me dëshirë dhe sot, si “Rekuiem për një grua”, “Çafka”, “Një grua me të verdha” etj.