Duket që edhe moti do të jetë në anën e opozitës të mërkurën që vjen. Me datën 17 Shkurt kur do të organizohet protesta gjithëpopullore në Prishtinë priten temperatura deri në 19 gradë celsius. Kështu së paku sipas Institutit Hidrometeorologjik të Kosovës, në ditët në vazhdim, vendi ynë do të jetë nën ndikimin e masave të ngrohta të ajrit me origjinë nga jugperëndimi. Po sipas IHMK-së, si pasojë e rritjes së shtypjes së ajrit dhe depërtimit të këtyre masave mbi vendin tonë, kjo periudhë pesë ditore do të jetë me temperatura pranverore.
“Vlera minimale e temperaturave minimale do të lëvizë nga 4-7 gradë Celsius, kurse maksimalet e ditës do të lëvizin ndërmjet 17-19 gradë Celsius”.
“Të hënën në pjesën e parë të ditës do të fryjë erë herë-herë me vrull nga drejtimi i jugperëndimit me shpejtësi mbi 15m/s, do të ketë reshje shiu vetëm në jug dhe jugperëndim të vendit, kurse të martën dhe të mërkurën sipas imazheve satelitore dhe situatës sinoptike parashihet të mbajë mot kryesisht me diell dhe me maksimalet që do të arrijnë deri në 19 gradë Celsius. Nga dita e enjte do të ketë vranësira të dendura të cilat pasdite, vende–vende do të shoqërohen me reshje shiu të cilat do të vazhdojnë edhe të premten, thuhet në njoftimin në fjalë./ Gazeta Blic/