Analistët vlerësojnë se Bashkësia ndërkombëtare duhet të distancohet nga Qeveria e korruptuar dhe të mos anatemojë kot opozitën që po proteston, por nuk ka asgjë në dorë
Analistë dhe përfaqësues të shoqërisë civile konsiderojnë që ka ardhur koha e fundit që faktori ndërkombëtar në Kosovë të jetë shumë i kujdesshëm kësaj radhe me politikën kosovare, sepse bëhet fjalë për një sistem të instaluar, tepër mashtrues e të inkriminuar, korruptiv dhe të krijuar, që bie ndesh me vlerat universale të shoqërive të përparuara. Sipas analistëve, vazhdimi i mbështetjes së kësaj politike e qeverie të korruptuar në pushtet vetëm sa do të acarojë dhe eskalojë gjendjen, sepse populli është lodhur me këtë qeverisje të keqe, kështu që bashkësia ndërkombëtarë duhet të ndihmojë sa më parë rrëzimin e këtij regjimi të inkriminuar për një kohë të gjatë.
Politologu Faik Krasniqi thotë se derisa Kosova është çliruar nga Bashkësia ndërkombëtare dhe pavarësia është projekt ndërkombë- tar, ata kanë përgjegjësi për këtë vend, edhe për vazhdimin e kontributit për ndërtimin e një qeverisje funksionale të dekriminalizuar, pa krim të organizuar dhe korrupsion. Ai ka pohuar se deri më tani të gjitha misionet ndërkombëtare, si UNMIK dhe EULEX, janë bashkëfajtore për krijimin e një klase politike kriminale dhe mafioze, sepse të gjithë e dimë fare mirë se përfaqësues të këtyre dy misioneve kanë qenë pjesë e korrupsionit bashkë me politikanë të profilit të lartë të Kosovës../kosova sot/