Me një solemnitet rasti, sot është përuruar projekti i konservimit të shtëpisë në të cilën ka jetuar njëri ndër ideatorët kryesor të Lidhjes Shqiptare të Prizrenit, Ymer Prizreni.
Pjesë e këtij solemniteti ishin drejtuesit më të lartë komunal të Prizrenit, dhe pasardhës të kryeministrit të parë të Lidhjes Shqiptare të Prizrenit.
Pas prerjes së shiritit, kryetari i Prizrenit, Ramadan Muja, tha se ne si institucione me këtë projekt po dëshmojmë se jemi të përkushtuar për të nderuar jetën dhe veprën e kolosëve tonë të kombit, në mesin e të cilëve ishte edhe Ymer Prizreni, i cili i takon një historie të lavdishme për të cilën amanet duhet lënë brezave të rinj.
Stërmbesa e patriotit të shquar, Ymer Prizreni, Sevime Drini- Dobroshi dhe bashkëshorti i saj Reshat, falënderuan komunën e Prizrenit për këtë investim të rëndësishëm i cili në një farë forme përkujton edhe figurën madhore të Ymer Prizrenit.
Projekti i konservimit të shtëpisë së Ymer Prizrenit që ndodhet në afërsi të LSHP-së është financuar në shumë prej mbi 43 mijë eurove nga drejtoria komunale për Urbanizëm dhe Planifikim. /TV Prizreni/