Në Qendrën për Ngritje profesionale në shkollën fillore “Isa Boletini” në Rahovec, 22 drejtorë të shkollave fillore u pajisën me certifikata të trajnimit për menaxhim të shkollave, në kuadër të projektit të USAID- BEP (Programi për Arsim themelor).
Drejtori i DKA-së Behar Rama, tha se ky trajnim do të ndikojë në ngritjen e cilësisë së mësimit dhe do të bëjë të mundur që drejtorët të kryejnë më me përgjegjësi detyrat e tyre. Ndër të tjera drejtori Rama falënderoi donatorin (USAID) për këtë ndihmë dhe u shpreh i bindur se bashkëpunimi do të vazhdojë edhe në të ardhmen.
Përgjegjësi i projektit të USAID-it Keith Prenton, tha se ndjehet i lumtur për drejtorët që e kanë ndjekur këtë trajnim, ndërsa përvoja e fituar do të shërbejë për një lidership më të mirë në shkolla.
“Ju jeni pionierët që do ta modernizoni arsimin fillor në Kosovë. Puna juaj do të reflektojë në përfitimin e shkathtësive që ju duhen nxënësve për të përballuar sfidat e shekullit 21”, tha ndër të tjera Prenton.
Më pas Prenton dhe Rama bënë shpërndarjen e 22 certifikatave për pjesëmarrësit e trajnimit, që ka nisur në shtator të vitit 2012 dhe ka zgjatur një vit.
Basic Education Program (BEP) i USAID-it në Kosovë synon të përkrahë të gjitha shkollat fillore dhe të mesme të ulëta (klasat I-IX). Moto e programit është, “Zhvillimi i shkathtësive të shekullit 21 tek nxënësit në partneritet me shkollën dhe komunitetin”. Programi mbështet edhe nga MASHT dhe punon për zgjerimin e kapaciteteve të menaxhimit të shkollave në mjedis të decentralizuar, për fuqizimin e vlerësimit të rezultateve të të nxënit dhe për përmirësimin e mësimdhënies përmes zhvillimit profesional të mësimdhënësve në detyrë. Programi zbatohet nga FHI, në partneritet me MASHT-in dhe Qendrën për Arsim të Kosovës (KEC). /PrizrenPress.com/