Sot, në Prizren, u zhvillua një aksion i rëndësishëm për dhurimin vullnetar të gjakut, organizuar nga Qendra Kombëtare e Kosovës për Transfuzionin e Gjakut në bashkëpunim me Qendrën Kryesore të Mjekësisë Familjare “Dr. Nexhip Berisha”.
Aktiviteti, i cili u mbajt në ambientet e QKMF-së, arriti të mobilizojë shumë qytetarë që kontribuuan në këtë kauzë jetike.
Kryetari i Prizrenit, Shaqir Totaj, falënderoi të gjithë ata që morën pjesë në këtë aksion dhe theksoi rëndësinë e dhurimit të gjakut për shëndetin e komunitetit.
“Dhurimi i gjakut është një veprim që ka ndikim të drejtpërdrejt në shpëtimin e jetëve dhe ndihmon në sigurimin e furnizimit të mjaftueshëm të gjakut për qytetarët që kanë nevojë për të,” deklaroi ai.
Ky aktivitet është një hap i rëndësishëm në mbështetje të sistemit të shëndetësisë dhe kontribuon në përmirësimin e shërbimeve mjekësore për të gjithë qytetarët. Organizatoret dhe përfaqësues të institucioneve shprehen mirënjohës për angazhimin e qytetarëve dhe inkurajojnë të tjerë të ndjekin shembullin e tyre në të ardhmen./PP/
/
