Rreth dyzet ankesa kanë shkuar në rektoratin e Universitetit të Prishtinës “Hasan Prishtina” nga aplikantët për studimet e doktoratës. Kriteri i fundit i përcaktuar në senat për shtim të gjuhës angleze, intervistës dhe publikimeve shkencore, që duhej plotësuar nga kandidatët si kriter për t’u pranuar në këtë nivel të studimeve, ka ngjallur reagime të shumta, pasi pretendohet se është thyer ligji dhe janë bërë dallavere me to, transmeton KTV.
Por, rektori i UP-së Ibrahim Gashi, ka thënë se gjithçka ka shkuar sipas ligjit dhe neni 122, pika 3, që flet për kriteret e pranimit në doktoratë, lejojnë senatin të bëjë ndryshime pasi, sipas tij, kushti për pranim me notën mesatare 8.0 nuk ka dalë i suksesshëm dhe ka pasur ankesa.
Ky ndryshim ka ardhur pasi është ankuar Parlamenti i Studentëve për nivelin e dobët të të pranuarve në këto studime. Ndërkaq, se ka pasur manipulime dhe emra të ofruar me ndërhyrje, nuk e ka pranuar as Ministria e Arsimit.