Në takimin e fundit të Koordinimit Lokal për Siguri për këtë vit, të kryesuar nga nënkryetarja e Komunës së Suharekës, Mihrije Suka, u diskutua për situatën aktuale të sigurisë dhe aktivitetet e zhvilluara gjatë vitit.
“Falënderoj të gjithë për bashkëpunimin gjatë këtij viti. Si Komunë, ju jemi mirënjohës për kontributin e dhënë në takimet e sigurisë dhe uroj që viti i ardhshëm të jetë i suksesshëm për të gjithë”, tha, ajo, përcjell PrizrenPress.
Komandanti i Stacionit Policor në Suharekë, kapiten Afrim Sylaj, raportoi për gjendjen e sigurisë, duke e cilësuar si të qetë dhe stabile, pavarësisht një rritjeje të aksidenteve për shkak të shtimit të trafikut gjatë festave. “Në dy javët e fundit kanë ndodhur 10 aksidente, të gjitha me dëme materiale. Lus qytetarët që të festojnë dinjitetshëm, ashtu siç na ka hije, dhe jo me krisma apo armë,” tha Sylaj.
Policia e Kosovës ka shqiptuar 365 tiketa dhe ka realizuar 21 urdhëresa gjatë kësaj periudhe. Nga data 20 dhjetor, në rrugët e qytetit do të ketë më shumë patrulla, si me uniformë ashtu edhe civilë, për të parandaluar rastet e mundshme dhe për të shtuar kontrollet në trafik.
Komuna dhe Policia apelojnë për bashkëpunim nga qytetarët, duke theksuar se festat duhet të jenë një kohë për gëzim dhe jo për rrezik./PrizrenPress.com/
Përjetoni pushime të paharruar dhe dasma magjike në Hotel “Albes Residence”
