Thaqi ishte heroi i derbit të Anamoravës, duke shënuar golin e vetëm në fitoren 1:0 të Gjilanit ndaj rivalit të qytetit, FC Drita, njofton Klankosova.tv.
Pas marrjes së këtij çmimi, Thaqi shprehu kënaqësinë e tij për vlerësimin, duke theksuar rëndësinë e fitores në këtë përballje.
“Tradicionalisht dihet që është derbi, një nga më të mëdhenjtë në rajonin tonë. Është një ndeshje që çdo futbollist do të donte ta luante, pasi është ajo që të bën të ndihesh futbollist. Fitimi i tij sjell shumë benefite, përfshirë rikthimin e besimit në skuadër”, tha Thaqi.
Ai shtoi se kjo fitore jo vetëm që i siguroi skuadrës tri pikë të rëndësishme, por edhe motivim të madh për vazhdimësinë e sezonit.
“Kur fiton derbin, jo vetëm që mposht rivalin në tabelë, por gjithashtu fiton rivalitetin e qytetit, që është një motiv i jashtëzakonshëm për ndeshjen e ardhshme”, u shpreh ai.
Ky vlerësim u bë nga Komisioni i Veteranëve të Futbollit, i përbërë nga Lulzim Berisha, Enver Prapashtica dhe Berat Berisha, të cilët unanimisht zgjodhën Thaqin për performancën e tij të shkëlqyer në derbin e javës.
Fitorja e Gjilanit ndaj Dritës dhe performanca e Thaqit rikthyen atmosferën pozitive te “Skifterat”, duke forcuar synimet e klubit për një vend në garat europiane.
