Një shtetas i Republikës së Shqipërisë është arrestuar të shtunën në pikën kufitare në Vërmicë, si i dyshuar kryesor për kultivimin e mbi 1 ton droge të llojit kanabis në fshatin Sferkë të Klinës, rast që ishte zbuluar nga Policia e Kosovës në shtator të vitit të kaluar.
Zëdhënësi i Prokurorisë Themelore në Pejë, Shkodran Nikçi, deklaroi për Telegrafin se personi i ndaluar dyshohet për përfshirje direkte në kultivimin e një sasie të madhe narkotikësh në territorin e Kosovës.
“Është ndaluar një person në Vërmicë, i cili dyshohet për kultivim të narkotikëve, përkatësisht për kultivimin e mbi 3 mijë kg narkotik në fshatin Sferkë të Klinës. Është shtetas i Republikës së Shqipërisë. I njëjti është ndaluar me urdhër të Prokurorit të Shtetit, ndërkohë prokurori është duke përpiluar kërkesën për caktimin e masës së paraburgimit”, deklaroi Nikçi.
Sipas autoriteteve, droga e konfiskuar në shtator të vitit 2024 kishte një vlerë që kapte mbi 5 milionë euro në tregun ilegal. Rasti u konsiderua ndër më të mëdhenjtë të zbuluar në territorin e Kosovës në vitet e fundit, për nga sasia dhe organizimi.
Hetimet për këtë rast janë në vazhdim, ndërsa autoritetet po punojnë për identifikimin dhe kapjen e të gjithë personave të përfshirë në rrjetin e kultivimit dhe shpërndarjes së drogës.
