Kryetari i Komunës së Malishevës, Ekrem Kastrati, ka bërë të ditur se kjo komunë ka arritur një sukses të jashtëzakonshëm për vitin 2024, duke realizuar 100% të investimeve kapitale të planifikuara.
“Bazuar në raportet financiare, për vitin 2024, ne vazhdojmë të jemi Komuna më e mirë në Kosovë lidhur me investimet kapitale, me 100% të realizimit,” deklaroi Kastrati përmes një njoftimi të tij në Facebook.
Kryetari falënderoi të gjithë bashkëpunëtorët, këshilltarët komunalë dhe administratën komunale për punën dhe përkushtimin e treguar gjatë gjithë vitit. Ai theksoi se ky rezultat është dëshmi e një pune të koordinuar dhe të përkushtuar në shërbim të qytetarëve të Malishevës.
“Të unifikuar do vazhdojmë të bëjmë më të mirën për Komunën dhe qytetarët tanë,” shtoi ai./PrizrenPress.com
