Ministri i Punës, Punësimit dhe Çështjeve Sociale në Qeverinë e Serbisë, Aleksandar Vulin, Kosovën e ka krahasuar më Sirinë.
“Janë vetëm dy qytete në Botë ku të krishterët nuk lejohen të hyjnë në tempujt e tyre fetar. Një gjë e tillë ndodh në Raqa të Sirisë dhe në Gjakovë. Kjo është hera e tretë që për festën tonë më të rëndësishme fetare, pelegrinët tanë nuk lejohen që të kryejnë ritualet e tyre në kishën e Gjakovës “, ka thënë Vulin.
Aleksandar Vulin është duke qëndruar për natën e Krishtlindjeve Ortodokse në manastirin e Zoqishtës të Komunës së Rahovecit.
Ai në Gjakovë është pritur me protesta nga Lëvizja Vetëvendosje dhe Shoqata “Thirrja e Nënave.
Ministri serb Vulin, tha se moslejimi i serbëve në Gjakovë do të rëndojë vazhdimin e dialogut Kosovë – Serbi.
“Për këtë çështje do të ankohemi në BE që të merren masa për të kritikuar Prishtinën .
”Incidenti i sotëm do të vështirësojë dukshëm procesin e dialogut, dhe do të ankohemi në instancat e BE-së që për këtë gjë të kritikojë Prishtinën e cila asnjëherë nuk i ka ndëshkuar ata të cilët po pengojnë që serbët për këtë festë të madhe ti kryejnë lutjet e tyre në kishën e Gjakovës”./TVPZ/