Presidentja e Kosovës, Atifete Jahjaga ka kërkuar nga Kryeprokurori, Ministri i Brendshëm, ai i Drejtësisë, i Integrimeve dhe nga Shefi i Policisë të ndërmarrin hapa për të parandaluar migrimin ilegal.
Në një takim të përbashkët, Presidentja ka kërkuar nga Sylë Hoxha, Skender Hyseni, Hajredin Kuçi, Bekim Çollaku e Shpend Maxhuni të punojnë për t’i plotësuar kërkesat që dalin nga procesi i liberalizmit të vizave.
Lexojeni të plotë njoftimin
Presidentja e Republikës së Kosovës, zonja Atifete Jahjaga, priti sot në takim udhëheqësit e institucioneve përgjegjëse për sundimin e ligjit, të drejtësisë dhe të integrimeve evropiane, ministrin e Punëve të Brendshme, zotëri Skënder Hyseni, ministrin e Drejtësisë, zotëri Hajredin Kuçi, ministrin e Integrimeve Evropiane, zotëri Bekim Çollaku, kryesuesin e Këshillit Gjyqësor të Kosovës, zotëri Enver Peci, ushtruesin e detyrës së kryeprokurorit të shtetit, zotëri Sylë Hoxha dhe drejtorin e përgjithshëm të Policisë së Kosovës, zotëri Shpend Maxhuni.
Takimi i Presidentes Jahjaga me udhëheqësit e institucioneve përgjegjëse u zhvillua me qëllim të bashkërendimit dhe të harmonizimit të veprimeve ndërinstitucionale në përmbushjen e rekomandimeve të mbetura në procesin e liberalizimit të vizave për qytetarët e Kosovës. Në këtë takim u diskutua edhe për angazhimin e institucioneve të Kosovës në parandalimin e migrimit ilegal.
Presidentja Jahjaga dhe udhëheqësit e institucioneve përgjegjëse biseduan për përshpejtimin e procesit të plotësimit dhe të miratimit të pakos legjislative, për bashkërendimin më të mirë institucional në fushën e sundimit të ligjit, për efikasitetin e sistemit gjyqësor dhe prokurorial si dhe u pajtuan për dinamikën e zbatimit të të gjitha rekomandimeve të mbetura për procesin e liberalizimit të vizave, i cili tashmë është në fazën përfundimtare.