Kryetari i Komunës së Malishevës, Ragip Begaj, ka pritur një delegacion nga Shoqata e Arsimtarëve shqiptar në Suedi, me të cilët kanë biseduar për bashkëpunimin e ndërsjellë dhe kontributit të përbashkët në ngritjen e arsimit shqip në Suedi, pasi në këtë shtet jetojnë një numër i madh bashkatdhetarëve shqiptar, përfshi edhe mërgimtar nga Malisheva.
Kryetari Begaj, i ka falënderuar arsimtarët shqiptar, për kontributin e tyre në shkollën shqipe në Suedi, duke e vlerësuar lartë punën e tyre, që fëmijët tanë, të mos e harrojnë gjuhën, kulturën dhe historinë shqiptare, pavarësisht se jetojnë në një vend të huaj. Po ashtu i ka falënderuar edhe për vizitën në Malishevë.
Nga ana tjetër, delegacioni i arsimtarëve shqiptar, e ka ftuar kryetarin Begaj dhe një pjesë të qeverisë komunale, që të marrin pjesë në tridhjetë vjetorin e shkollës shqipe në Suedi.
Njëri nga arsimtarët shqiptar, në Suedi, z.Nuhi Mazreku, i cili është nga Malisheva, përveç falënderimeve për pritjen, po ashtu ka bërë një gjest human, duke dhuruar, 500 euro për familjet e dëshmorëve nga Malisheva, të cilat jetojnë në kushte të vështira, si dhe ka ndihmuar me dy mijë euro, 10 studentë nga Komuna e Malishevës.