Ora 10:00 e paradites të së premtes do ta gjejë Aleksandër Lumezin para anëtarëve të Këshillit Prokurorial, shkruan sot Koha Ditore.
Do të intervistohet në cilësinë e kandidatit për kryeprokuror të Shtetit. Po të premten, prej orës 15:00, KPK-ja do të mblidhet për të votuar kandidaturën e tij. Lumezi është i vetmi kandidat për kryeprokuror. Pesë të tjerë – Shyqyri Syla, Imer Beka, Metush Biraj, Laura Pula e Agron Galani – janë tërhequr nga gara, me arsyetimin se në të kishte anshmëri dhe ishte e komprometuar.
Me largim nga gara ata kanë humbur të drejtën që të ankohen për procesin e zgjedhjes së kryeprokurorit të Shtetit në të gjithë mekanizmat, përfshirë Gjykatën Kushtetuese. I vetmi që ka të drejtë ankese në këtë Gjykatë është Aleksandër Lumezi, në rast se konsideron që i janë shkelur të drejtat kushtetuese.