“Birdman” është fituesi i madh i edicionit të 87 të çmimeve Oscar.
Komedia e zezë me regji të meksikanit Alejandro Inarritu u vlerësua si filmi më i mirë mes tetë kandidaturave.
I njohur ndryshe si virtyti i paparashikuar i injorancës, “Birdman” sjell jetën e një aktori që pas suksesit të portrezimit të një superheroi përpiqet të sjellë një shfaqje të suksesshme në Broadway.
Deri në ditët e shfaqjes, ai është në një luftë të vazhdueshme me egon e tij, teksa përpiqet të rivendosë ekuilibrat me familjen, karrierën dhe veten e tij.
Filmi rrëmbeu edhe tre statuja “Oscar”, për regjinë, skenarin origjinal dhe arritjen më të mirë kinematografike. Është hera e dytë që një meksikan fiton “Oscar” për regjinë më të mirë.
Aktori më i mirë shkoi për britanikun Eddie Redmayne, në rolin e fizikanit të famshëm Stephen Hawking në filmin “The Theory of Everything”. Ndërsa “Oscar” për aktoren më të mirë iu dha Julianne Moore” për perfomancën e saj në “Still Alice”.
Aktorja e cila bëri që i gjithë teatri Dolby të pushtohet nga duartrokitjet ishte Patricia Arquette, aktorja më e mirë jo protagoniste e cila ishte në sfidë me veteranen Meryl Streep.
Filmi më i mirë i huaj e meritoi prodhimi polak “Ida”.
Në mbrëmjen më të rëndësishme të kinematografisë, që bën bashkë me të famshmit e skenës dhe ekranit ishte edhe Rita Ora. Këngëtarja me origjinë shqiptare performoi një nga hitet e saj “Grateful”.