Ashtu siç kishte paralajmëruar, kryetari i FRD, Bamir Topi ka nisur takimet me Edi Ramën për të vendosur për koalicionin e ardhshëm.
Topi është takuar me kryeministrin në ambientet e Hotel Sheraton në Tiranë.
Rama ishte i pari që i bëri një ftesë publike FRD-së për koalicion në këto zgjedhje.
Topi e pranoi këtë ftesë. Ai nuk shprehu pretendime për ndonjë njësi të veçantë bashkiake, por tha se synojnë të fitojnë sa më shumë këshilltarë vendorë.
Megjithatë Topi tha se nisja e negociatave nuk nënkupton vendosjen e koalicionit.
Pas takimit, kryeministri Edi Rama foli për mediat.
“Ky është një rast specifik pasi është një parti e pozicionuar qartazi në një pozicion opozitar, të moderuar, i spektrit të djathtë,” tha Rama.
“Ky është një shembull pozitiv për politikën dhe shoqërinë shqiptare”, shtoi ai.
Ndërkohë kreu i FRD, Bamir Topi, tha se ishte takimi i parë dhe nuk u paraqitën kërkesa.
“FRD është e vendosur mbi bazën e parimeve shumë të qarta, që kanë të bëjnë me funksionimin e shtetit dhe institucioneve.
Ne shohim me keqardhje që administrimi i pushtetit vendor mbetet shumë problematik, sidomos në qytetet e mëdha.
Ne jemi në një pozicion modern në politikë, jemi për komunikim,” tha Topi.