Fillimi i këtij viti në komunën e Malishevës ka shënuar rënie të numrit të të pickuarve nga rriqrat, që konsiderohen ndër shkaktarët kryesorë për shkaktimin e etheve hemorragjike Krime-Kongo (EHKK).
Krahasuar me të njëjtën periudhë të vitit të kaluar del se në katërmujorin e parë të këtij viti numri është zvogëluar për katërfish, pasi sivjet janë regjistruar vetëm 34 raste, ndërsa në vitin 2014 numri i tyre ka qenë 128 sosh.
Përmirësimi i kohës dhe ngritja e temperaturave shihet me ndrojtje në rrethinën e Malishevës, që konsiderohet zonë e ndjeshme për shfaqjen e EHKK-së.
Moti i përcjell me temperatura të ulëta dhe bora në fillim të prillit, si duket kanë penguar mospërhapjen e shpejtë të rriqrave.
Drejtori Komunal për Shëndetësi në Malishevë, Hajdin Berisha, ka thënë se nga fillimi i vitit e deri më tash janë regjistruar shumë më pak apo vetëm 34 raste të të pickuarve nga rriqrat, krahasuar me vitin paraprak.
Mbështetur në raport del se në të njëjtën periudhë numri i tyre më 2014 ka qenë 128 sosh../zeri/