Agjencia e Kosovës Kundër korrupsionit ka hapur rast ndaj deputetit të pavarur Blerim Shala, nën dyshimet për konflikt interesi.
Hetimet ndaj Shalës janë hapur pak ditë pasi ai në cilësinë e deputetit është emëruar koordinator i ekipit qeveritar të dialogut politik që zhvillohet në Bruksel, i cili për synim ka normalizimin e marrëdhënieve me Serbinë.
Me Kushtetutën e Kosovës, përkatësisht me nenin 72-të të saj thuhet se: Deputeti i Kuvendit të Kosovës nuk mund të mbajë ndonjë post ekzekutiv në administratën publike ose në ndonjë ndërmarrje në pronësi publike, dhe as të ushtrojë ndonjë funksion tjetër ekzekutiv, sikurse është përcaktuar me ligj.
Hapjen e rastit ndaj Shalës e ka konfirmuar për Tribuna Channel, Hasan Preteni, drejtor i AKK-së.
Ai ka thënë se procedura është e mbyllur për publikun dhe se vendimi përfundimtarë do të bëhet i ditur për opinionin.
Blerim Shala, ishte larguar nga AAK-ja për t’iu bashkuar Qeverisë Mustafa- Thaçi dhe momentalisht është deputet i pavarur në Kuvendin e Kosovë.