Në Kosovë ende nuk është shënuar asnjë rast me ethe hemorragjike. E me ethe hemorragjike nuk ka as raste në komunat e Malishevës, Rahovecit, Suharekës dhe Klinës, komuna këto që njihen si më endemikët.
Këto informacione u dhanë sot gjatë një takimi që pati Këshilli i ri Ndërministror për parandalimin dhe luftimin e Etheve hemorragjike Krime Kongo në Kosovë.
Megjithatë, në takim, është kërkuar kujdes i shtuar nga ana e qytetarëve, sidomos për periudhën: mesi i majit-mesi i qershorit 2015, në zbatim të masave preventive, me qëllim të parandalimit të rasteve të Etheve hemorragjike.
Në takim u raportua për aktivitetet e edukimit dhe vetëdijesimit shëndetësor të ndërmarra në komunat më të rrezikuara nga ana e IKSHP-së, masat e repelimit të shtazëve dhe dezinsketimit të shtazëve nga ana e Agjensionit të Ushqimit e Veterinës, aktivitetet e dezinsektimit sekektiv nga Komuna e Malishevës si dhe aktivitetet e tjera të ndërmarra edhe nga Ministria e Mjedisit dhe Planifikimit Hapësinor si dhe Ministria e Bujqësisë.
Sipas komunikatës për media, këto masa do të vazhdojnë përgjatë tërë periudhës që është më e ndjeshme sa i përket mundësisë së shfaqjes së Etheve hemorragjike.
Ndërkohë, në takim thuhet se është bërë e ditur se MSh dhe SHSKUK kanë siguruar terapi për raste eventuale të sëmundjes si dhe Klinika Infektive i ka kapacitetet e caktuara për të trajtuar në mënyrë specifike rastet eventuale të të prekurve nga Ethet hemorragjike.
Gjithashtu, në takim, u raportua se numri i pickimeve, krahasuar me të njëjtën periudhë të vitit të kaluar, është lehtësisht më i vogël.