Organizatorët e festivalit Eurovizion sivjet kanë treguar se kanë instaluar teknologjinë anti-boo, e cila do ti largojë nga transmetimi televiziv zërat dhe brohoritjet e shikuesve për këngëtarë të ndryshëm.
Vitin e kaluar, përfaqësueset e Rusisë gjatë tërë performancave janë përcjellur me “buu” nga të pranishmit në sallë kjo për shkak të ligjeve anti-homoseksuale që ky shtet i ka implementuar për vite me radhë. Duke qenë se Eurovizion konsiderohet si një prej festivaleve që përkrah dukshëm komunitetin LGBT, pjesëmarrja e Rusisë gjithmonë përshendetet me brohoritma dhe me revoltë.
Edhe sivjet, këngëtarja Polina Gagarina është përcjellë me të tilla brohoritje por të cilat nuk janë dëgjuar tek publiku nëpër Evropë.
“Nuk duam situata të tilla. Kjo është garë e cila bashkon muzikën dhe njerëzit, dhe jo politikën. Prandaj kemi vendosur sistemin që e monitoron zërin brenda sallës ku mbahet Eurovizioni” thonë organizatorët.
Gjysmëfinalja e dytë e Eurosong mbahet sonte, ndërsa finalja me datë 23 maj. /KultPlus.com/