Monopolet dhe paligjshmëritë nuk po arrin t’i ndalë askush, as Qeveria e dy partive të mëdha. Sipas analistëve, LDK-ja është e interesuar të marrë hisen e vet të kulaçit të pushtetit, e jo ta luftojë të keqen
Ndonëse janë bërë 6 muaj që po e drejtojnë Qeverinë e Kosovës në koalicion me PDK-në, krerët e LDK-së dhe kryeministri Isa Mustafa nuk e kanë bërë madje as hapin më të vogël për shkapjen e shtetit për të ndërprerë kontrabandën dhe evazionin fiskal që dita-ditës po e shkatërron ekonominë e vendit.
Analistë të ekonomisë, përfaqësues të shoqërisë civile dhe deputetë të Kuvendit të Kosovës, ankohen se koalicionit po i mungon vullneti që të goditet kontrabanda dhe paligjshmëritë në vend, pasi po përfitojnë nga kjo gjendje kaotike.
Përfaqësuesi i shoqërisë civile, Fidan Kalaja, nga lëvizja “FOL”, tha për “Kosova Sot” se luftimi i krimit të organizuar dhe korrupsionit janë peng dhe varen nga vullneti politik në vend.
“Përpjekjet për ndërprerjen dhe pastaj luftimin e këtyre dukurive do të duhej të ishin barrë dhe përgjegjësi për institucionet e drejtësisë e jo të partive politike”, tha ai./Kosova Sot/