Ka mjaftuar një denoncim që policia të marrë në mbrojtje një vajzë 10-vjeçare.
10-vjeçarja me inicialet G.T., banuese në qytetin e Korçës, sipas burimeve zyrtare të policisë rajonale, është marrë në mbrojtje, “pasi e ëma e saj, në mënyrë të vazhdueshme, ushtronte dhunë psikologjike ndaj saj”.
“Dje (të dielën) është plotësuar kërkesë-padia për lëshimin e urdhrit të mbrojtjes së menjëhershme për shtetasen e mitur, e cila u mor në mbrojtje nga policia, pasi nëna e saj me inicialet Sh.T., 39 vjeçe, në mënyrë të vazhdueshme ka ushtruar dhunë psikologjike ndaj saj”, saktësuan burimet.
Policia ka sqaruar se vajza i përket komunitetit rom dhe mamaja e saj, Shpresa Trimi, 39 vjeç, e dhunonte vajzën pasi kjo e fundit kishte dëshirë të shkonte në shkollë.
Megjithatë Shpresa tha për mediat se nuk është e vërtetë që nuk e ka lejuar vajzën të shkojë në shkollë.
Ajo tha se vajza dilte rrugëve dhe kthehej shumë vonë.
“Unë nuk do e lë vajzën time të lypë”, tha Shpresa, duke shtuar se nuk e ka dhunuar ndonjëherë të bijën. /Mapo/