Netflix, një nga shërbimet më të mëdha të videotransmetimit në botë, ka marrë të drejtat e komedisë satirike “War Machine”, me protagonist Brad Pitt.
Filmi është bazuar mbi librin e Michael Hastings, “The Operators: The Wild and Terrifying Inside Story of America’s War in Afghanistan”.
Hastings, shkrimtar dhe gazetar, në vitin 2010 zbuloi një skandal që çoi në dorëheqjen e gjeneralit McChrystal, në atë kohë komandant i trupave të NATO-s në Afganistan, për komentet mbi Barack Obamën. Vetë gazetari vdiq në një aksident me makinë më 2013-n, kur ishte vetëm 33 vjeç.
“Jam i lumtur që marr pjesë në këtë projekt të Netflix, për prodhime kaq inovative dhe për t’ia transmetuar publikut të madh”, ka thënë Brad Pitt.
Filmi i prodhuar nga Netflix do të drejtohet nga regjisori australian David Michod. Xhirimet do të nisin në gusht dhe filmi duhet të dalë në vitin 2016.