Maturantët e Kosovës sot do t’i nënshtrohen pjesës së dytë të Testit të Maturës.
Pjesa e parë e Testit është mbajtur më 6 qershor, ku nuk pati menaxhim të mirë për shkak të shpërndarjes së testit në rrjetet sociale, derisa ndalohej përdorimi i telefonit.
Drejtoritë komunale të arsimit (DKA) kanë marrë të premten një listë me emrat e 67 maturantëve, të cilëve duhet t’ua ndalojnë hyrjen në pjesën e dytë të testit të maturës, që do të mbahet sot.
Informatën e ka konfirmuar për gazetën Azem Guri, këshilltar i ministrit të Arsimit, Arsim Bajrami.
Në letrën që MASHT-i ua ka dërguar DKA-ve, thuhet se DKA-të e kanë listën dhe kodet e komunave dhe janë të obliguara që t’i ndalojnë këta maturantë të hyjnë në provimin e maturës për shkak të komunikimeve në rrjetet sociale rreth testit të maturës.
Testi fillon në orën 10:00 dhe përfundon në orën 13:00.
Ministri i Arsimit do të vizitojë disa shkolla për të parë për së afërmi si po shkon ky proces, ndërkohë, pasdite Komisioni Qendror Shtetëror i Maturës, do të mbajë konferencë për media për mbarëvajtjen e Provimit të Maturës.
Testi monitorohet nga përfaqësuestë caktuar nga Ministria e Arsimit.