Azilkërkuesit që ndodhen në Kosovë, nga vende të ndryshme të botës, kanë kushte të mira në Qendrën për Azilkërkues. Ndërsa, azilkërkuesit kosovarë përballen me kushte të vështira në kampet hungareze dhe franceze.
Prej fillimit të këtij viti, Qendra për Azilkërkues në Kosovë ka pranuar dhe ka trajtuar gjithsej 47 azilkërkues të vendeve të ndryshme, ndërsa aktualisht në këtë qendër janë 15 të tillë.
Drejtues të kësaj qendre thonë se Qendra plotëson të gjitha kushtet dhe nevojat për personat që kërkojnë azil në Republikën e Kosovës, raporton KTV.
Një 14-vjeçar nga Nigeria ka një muaj që ka ardhur në Kosovë. Ai nuk ka dashur të flasë para kamerave, por thotë se në këtë qendër janë kushtet shumë të mira.
Ndërkohë, Rroksana Qarri, drejtoreshë për Informim në Ministrinë e Punëve të Brendshme, ka deklaruar se është rritur numri i azilkërkuesve në Kosovë. Shumica e tyre janë nga Algjeria, Maroko, Pakistani, Siria, Nigeria etj.
Azilkërkuesit janë të lirë të dalin nga Qendra, prej orës 07:00 deri 22:00, pasi u plotësohet formulari inicial i azilit.