Dy letra të shkruara me dorë nga James Joyce, në të cilat shkrimtari i njohur irlandez ankohej për vështirësitë që po haste për të gjetur botues për atë që do të bëhej kryevepra e tij – Uliksi, janë shitur në Amerikë për gati dhjetëfishin e çmimit fillestar.
E shkruar më 1 nëntor 1918, në letrën e parë Joyce falënderon dikë që besohet të ketë qenë admirues i krijimtarisë së tij.
“Falemnderit për fjalët e mira për librin tim, Uliksin! Nëntë pjesë janë shtypur në Little Review, por fatkeqësisht nuk po gjej dot një botues”, shkruan Joyce, i cili shton gjithashtu se shkak është bërë edhe një sëmundje e syve që kishte prekur atë vit.
Kjo letër dhe një tjetër e shkruar më 1 qershor 1919 u blenë nga një koleksionist për rreth 25 mijë dollarë.
Letrat janë shkruar gjatë një periudhe interesante në jetën krijuese te Joyce, i cili po mundohej ta përfundonte Uliksin ndërsa përballej edhe me problemet e rënda me sytë.
Ashtu si shumë shkrimtarë të tjerë britanikë, Joyce e pati më të lehtë ta botonte veprën e tij në Francë, ku gjërat e konsideruara të turpshme në Britani ose anashkaloheshin ose nuk kuptoheshin fare.