Këmbëzbathur, si gjithmonë, këngëtarja e famshme e xhazit, Elina Duni, interpretoi në amfiteatrin e Gërmisë këngët e albumit të saj të ri, para rreth 1000 personash që kishin ardhur për të dëgjuar albumin e titulluar “Dallëndyshe”.
Ky album përfshinë këngë të Shqipërisë Veriore, të Mesme, të Jugut, arbëreshe e arvanitase të ndërthurura me xhazin.
Siç tha edhe Duni, albumi i saj qëndron mes dy temave të mëdha, dashurisë e mërgimit, që sipas saj janë shumë të lidhura me njëra tjetrën.
Koncerti u përkrah edhe nga Komuna e Prishtinës dhe të pranishëm në Gërmi u panë kryetari i Prishinës, Shpend Ahmeti, drejtoresha e Drejtorisë komunale të kulturës, Saranda Bogujevci, e artistë të njohur të skenës kulturore të vendit.
Ky turne i saj ballkanik ka nisur më 14-15 shtator në Tiranë, për të vazhduar më 16 shtator në Shkup, 18 shtator në Prishtinë dhe për të përfunduar më 19 shtator në Beograd. /KosovaLive